Saturday, December 8, 2007

قشور وسفاسف






السلام عليكم



دلوقتى لما ييجي واحد يتكلم مع واحد تانى عن حكم السواك مثلا أو اللحية أو الختان
أو نتف الحواجب أو الأغاني أو امتى الصلاة تبقى سرية وامتى تبقى جهرية أو أقرا
الفاتحة وانا بأصلي ورا الإمام ولا لا

مثلا مثلا يعني

تلاقي بقى بعض الناس هاجت وماجت وشنوا هجوم بري ضده ويقولوا له:

ماتتكلمش في سفاسف الأمور، دي قشور، ديننا دين عظيم، شوف حاجة تانية تتكلم فيها
تفيد الأمة



الكلام ده بصراحة بيستفزني



أولا أنا عايز أسأل واحد من الناس دي سؤال

يعنى لو جينا نتكلم عن نتف الحواجب ولاقينا النبي (صلى الله عليه وسلم) بيقول: لعن
الله النامصة

هل كده بقى النبي (صلى الله عليه وسلم) بيتكلم في قشور؟ وسفاسف الأمور؟ النبي (صلى
الله عليه وسلم) كان سايب أحوال الأمة وعمال يتكلم في كلام مالوش أهمية؟؟؟

ما أعتقدش إن فيه مسلم يقدر يقول كده، والمفروض نتأدب شوية مع الله ومع رسوله صلى
الله عليه وسلم

وعلى هذا فقس



ثانيا سؤال تانى

طب ايه بقى من وجهة نظر سعادتك اللى يعتبر لب الدين ويفيد الأمة؟

ساعتها تلاقي كل واحد منهم بقى وليه تفكيره، واحد يقول لك اتكلموا عن فلسطين، وواحد
تانى يقول اتكلموا ازاى نصلح البلد، تالت يقول الدين المعاااااااااملة، ورابع يقول
اتكلموا عن الغش والكذب والرشوة

كل واحد ودماغه بقى، وزي ما يكون الناس اللى من النوعية دي مافكروش في إن الإسلام
في الحقيقة يشمل كل الكلام ده وأكتر، ووالواحد ممكن يتكلم في كل ده، لكن كل واحد
يحب يتكلم في اللى على مزاجه بس، واللى مايجيش على مزاجه يبقى قشور وسفاسف وتفاهات

وبعدين إذا كان على فايدة الأمة، فأغلب الحاجات اللى هي من وجهة نظره السطحية تعتبر
قشور، هي تعتبر مفيدة للأمة برضه، ماهو الواحد لما يعرف معلومة جديدة ويطبقها وياخد
ثوابها ويرضي بيها ربنا مهما كان الثواب بسيط، دي فايدة كبيرة في حد ذاتها، خاصة لو
ماضيعتش في الكلام ده وقت أكثر من اللازم

وده اللى يدخلنا على ثالثا



ثالثا

اللى بيقول الكلام ده بقى تلاقيه مثلا في وقت تانى عمال يقول: فلان البقال بيبيع
اللبن أغلى من علان ب20 قرش، فتلاقيه تلقائيا بيحب يشتري من علان الأرخص قال يعني
بيوفر

نقول له بقى يعنى الـ20 قرش هم دول اللى انت وفرتهم، ليه تحط في دماغك سفاسف الأمور
دي، ليه تفكر في قشور، كل ده عشان 20 قرش؟؟؟

أو غير اللبن، تلاقي الواحد مثلا رايح يسأل على هارد ديسك معين، يلاقيه عند واحد
بـ410، وعند واحد تانى بـ400، فتلاقيه تلقائيا عايز يوفر الـ10 جنيه دي ويشتري من
التاني

وهكذا في كل حاجة تقريبا طالما الجودة واحدة

طب جميل، فكر اقتصادي جميل، بس بتنكروا علينا ليه اننا نعمل كده مع ربنا سبحانه
وتعالى

يعني لما أعرف أنا معلومة هي في نظره السطحي من القشور، ولما أطبقها هاخد عليها
ثواب ولو قليل أوي أوي، ايه المانع يعني؟؟؟ مش ده تفكير كويس برضه ومنطقي واقتصادي؟



رابعا بقى

العجيب إنك تكون فاكر بقى إن الواحد من الناس دي مابيتكلمش في حاجة في حياته مع أي
حد إلا في نهضة الأمة، لكن تكتشف بعد كده إنه ساعات يتكلم عن الأفلام، وماتشات
الكورة، والأغاني، ويجيب في سيرة الناس، وقيل وقال، أو يقعد يقول ويسمع نكت وهكذا

تقول له يعني انت كده مش بتضيع وقتك في سفاسف الأمور؟

يقول لك ماهو أنا لازم كمان أرفه عن نفسي، مش كل كلامي يبقى جد كده

طيب ياعم، سيبني أنا في حالى بقى أتكلم في اللى انا عايزه، لما تلاقيني باتكلم عن
حاجات من القشور في وجهة نظرك السطحي اعتبرني بأرفه عن نفسي أنا كمان، والحمد لله
إن ترفيهي ممكن ييجي بفايدة، مش أفلام وماتشات ونكت

أنا قصدي من الجزئية دي إن ماحدش ينكر على حد بقى، طالما الواحد لازم يجي له وقت
يرفه عن نفسه ويتكلم في اللى يعجبه



من الآخر كده، ديننا مافيهوش قشر ولب، ديننا كله لب، كله مهم

أي حاجة وردت في القرآن أو في السنة الصحيحة لا يمكن لا يمكن تكون من القشور،
حاشى
لله



والله لو لاقيتني عمال اتكلم في حاجة لا ينبني عليها عمل، زي مثلا يا تري لون كلب أهل الكهف كان ايه، ولون عصا سيدنا سليمان كان ايه، ساعتها اعترض براحتك


لكن لو كانت حاجة ينبني عليها عمل ولو بسيط، فمش من حقك تنكر علي


أنا الموضوع ده كان غايظني، وكويس إني قدرت أطلع اللى جوايا



والسلام عليكم



 

6 comments:

Unknown said...

أنا معاك إن في بعض (سفاسف) الأمور .. هي مش سفاسف و لا حاجة .. و الدليل إنك هتلاقي الناس اللي بتقول عليها سفاسف .. بيطلعوا بعد ماتشات الأهلي و الزمالك و تقعد تشتم في الفريق المنافس ليها .. و يحطوا العلم بتاعه علي حمار مثلا .. أو يقعدوا في الاستاد لما الحكم مايحسبش ضربة الجزاء .. يغنّوا و يقولوا .. "الصحافة فين .. الـ ***** أهو" .. و ما شابه من الأمور الهامة للأمة و التي تحدد مصيرها الأزلي

لذلك فالموضوع مش سفاسف الأمور .. إنما هي سفاسف العقول

لكن أنا أؤمن برضه إن في ضياع لفقه الأولويات عند غالبية الناس .. فتلاقي (كان زمان الموضوع ده) واحد يروح يسأل الشيخ في المسجد عندنا .. بعد ما اتعلم ييجي المسجد يصلي .. هل الصباع نرفعه لفوق في التشهد و لا لتحت .. فكل مشكلة الراجل دلوقتي هي رفع الصباع

و لم يسأل أخينا هذا عن كيفية تحقيق الخشوع في الصلاة .. أو أي شئ آخر

لإن طبعا اتجاه الصباع في التشهد هي مسألة حياة أو موت!!!

الحمد لله إن موضوع الصباع ده انتهي من زمان .. ده لإن الناس مش فارق معاها دلوقتي الصلاة أساسا

ربنا يهدينا جميعا
و جزاك الله خيرا علي الموضوع يا أسامة باشا
:D

Yasser said...

بص يا ابني

انا مره واقف انا واصحابي بنتكلم في تكبيرة الاحرام

جه واحد نعرفه قالنا ايه اللي انتوا بتتكالموا فيه ده
واحد رد قاله
بنحاول نشوف السنه في تكبيرة الاحرام

قالوا يا عم سنة ايه ؟؟
ادي يا سيدي الناس
هتفرق قي ايه يعني اعمل تكبيرة الاحرام كده ولا كده

اتكلموا في حاجه مهمه

Osama Sherif said...

السلام عليكم

for ahmed
أنا متفق معاك إلى حد بعيد
لكن فيه حاجة صغيرة
يوم لما واحد ييجي يسأل عن تحريك الاصبع بدل ما يسأل على الخشوع
فأنا أنكر عليه إنه ما سألش عن الخشوع
لكن ما أنكرش عليه إنه سأل على
كيفية تحريك الاصبع
واخد بالك من الفرق؟
لأن دي حاجة قد تكون بسيطة لكن عليها ثواب
ومش من حقي أنكر على حد بيسأل على أي حاجة ينبني عليها عمل
أرجو إن الفرق يكون واضح
وجزاك الله خيرا على ردك

for yasser mostafa
فعلا ربنا يهدي الناس
رب اهد قومي فإنهم لا يعلمون
جزاك الله خيرا على ردك
وأهلا بيك في مدونتي المتواضعة

والسلام عليكم

ayman said...

السلام عليكم ورحمة الله وبركاته


الصراحه يا اسامه قبل ماتكتب في الآخر أنك ارتحت نفسيا لما كتبت الكلام ده انا ارتحت :)

وبعدين انا كمان عايز اضيفلك نقطه

اغلب اللي بيقوللك لب وقشور والنظام ده

بتلاقيه
يا اما لا لب ولا قشور بيعملها

يا اما متناقض
مثلا بيقرا قرآن و مثلا بيشتغل شغلانه حرام

بتحفظ قرآن مثلا ومش محجبه

أو واحد بيتصدق وبيرعي يتامي ومش مؤمن بأحاديث النبي (صلي الله عليه وسلم) ولا حديث منها

والله يا اسامه ريحتني كتير لما كتبت الموضوع

وأستأذنك إني أنشره باسمك

والسلام عليكم ورحمة الله وبركاته

Osama Sherif said...

السلام عليكم

يافندم اتفضل انشره براحتك لو حسيت انه مفيد فعلا
جزاك الله خيرا

والسلام عليكم

Anonymous said...

بجد جزاك الله خيرا

وكلامك عجبنى جدا

والناس دى فعلا كترت اوى فى الزمن بتاعنا دة بس هنعمل ايه ربنا يهدى