Thursday, February 12, 2009

أنا مش هاصدقهم





قابلني بابتسامة عريضة جدا، بس مش الابتسامة اللي ينشرح لها القلب، لا دي الابتسامة اللي وراها مصلحة
سمعت صوته وهو بينادي عليّ: يا شيخ يا شيخ
ماهو أي حد بلحية يبقى شيخ في عرف الناس، المهم من طريقته وهو بينادي عليّ عرفت هو عايز إيه
هو: ممكن أسألك سؤال
أنا مضطر أقول له: اتفضل
هو: أنا جاي من المنوفية في مصلحة وقضيت المصلحة الحمد لله، بس النهاردة بعد ما اتوضيت وطلعت أصلي (ماهو لازم يدخل المسجد في الموضوع بأي طريقة، عشان قلبي يرق ناحيته) اكتشفت ان المحفظة مش في جيبي وفيها الفلوس والبطاقة وكل حاجة
وبعدين يبتدي يمثل ببراعة إنه بيدمع شوية وهو بيقول: والله أنا راجل محترم مش شحات بس عايز أي مساعدة ولو سلف
أنا ترتسم على وجهي ابتسامة صفراء، وهنا يشتغل الـAnswer Machine، بأقول الكلمتين اللي حفظتهم من كتر ما كررتهم: تقدر حضرتك تروح المسجد اللي هناك ده، والإدارة هناك هتعرف تساعدك إن شاء الله
انا عارف إنه هيقول لي: ما أنا رحت كل المساجد اللي هنا وماحدش عايز يساعدني ... وإلخ إلخ
بس أنا ما باديلوش فرصة، باكون مشيت، بابتسامة صفرا برضه



كتروا أوي أوي
وخلاص الحوار بقى مفقوس والواحد بقى بيشوف نفس القصص بتتكرر قدامه
أنا شفت من الصنف ده أكتر من عشرة (أنا عديتهم فعلا، دول اللي افتكرتهم)، ومش قادر أصدق إن كلهم تصادف معهم نفس المشكلة
ولولا ان مش من حقي أفتي، لكنت أفتيت بعدم جواز اعطائهم أي أموال
نصيحة.. ما تدوش اي مخلوق بيشحت اي فلوس اطلاقا



* اللي "شكله" محترم وجاي من المنوفية (أو غيرها) ومش معاه ثمن تذكرة القطر عشان يرجع
* واللي بيعمل عملية في الطحال الصليبي ولا مش عارف فين (أي كلام) ومعاه شوية ورق ماحدش فاهم منهم حاجة
* واللي جاي من آخر الدنيا عشان يشحت (مثال: أنا في مصر الجديدة وواحدة ست بتقول إنها من المهندسين، طب ايه اللي جابك هنا؟)
* واللي بقى له 15 سنة بيشحت في المنطقة لحد ما حفظنا شكله
* واللي عمال يلف على المساجد المختلفة زي ما يكون عامل جدول زمني للأماكن اللي بيشحت فيها
* واللي "بيقول" إن فلوسه اتسرقت في المسجد وعايز فلوس عشان يعرف يروّح
* واللي أسلم وحرق ايده بمية النار عشان يشيل الصليب وعايز 30 جنيه مصاريف إشهار إسلامه (كذب طبعا، مافيش حاجة كده)
* واللي عايز يدفن أمه ومش معاه ثمن الكفن
* واللي سنه صغير وعايش على الشحاتة بأي كلمتين حلوين كده يضحك بيهم على الناس
* واللي سنها صغير وجاية تقول لك: عمو عمو (أو طنط طنط) أنا وماما ضاعت مننا الفلوس وعايزين حق مواصلات عشان نروح، والعجيب إنك تلاقيها في نفس المكان تاني بعد أسبوع وبتقول نفس الكلام
* واللي عامل نفسه سايس عربيات ويقعد يزن على دماغك وانت بتركن عربيتك: تعالى تعالى ماشي ماشي، ولا ليه أي فايدة أصلا
* واللي تلاقيه عمال ع الفاضي وبلا مناسبة شغال: باشا.. ازيك يا شيييخ.. صباح الفل.. كل سنة وانت طيب
* واللي وظيفتها إنها دادا في الكلية وتيجي وقت الامتحانات تعدي على واحد واحد بعلبة بوريو فاضية: كل وسنة وانت طيب يا بشمهندس (بشمهندس عشان أنا في كلية هندسة)، مافيش حاجة كده تراضي بيها الدادا؟
كل النماذج دي وغيرها كتير أوي نماذج واقعية جدا ومتكررة جدا ومنتشرة جدا

كل دول (فيما أظن) ما يستاهلوش ولا مليم





أنا في حياتي ما صدقتش غير اتنين شحاتين بس
واحدة كان كل طلبها كتابين ثانوية عامة لابنها، هي مش عايزة فلوس ولا اي حاجة، هي عايزة كتاب كذا وكذا لسنة كذا
وواحد تاني عايز انسولين مصري أبو 9 جنيه (على ما أذكر)
والناس دي برضه اوعوا تدوهم فلوس، لو عايز تعمل حاجة لله خده من إيده وروح معاه الصيدلية (أو المكتبة بالنسبة للست اللي فاتت دي) واشتري له اللي هو عايزه
وربنا يتقبل



ممكن واحد يسأل سؤال منطقي جدا: طب افرض جالي شحات وكان صادق فعلا، ليه ما أديلوش وربنا يحاسبني على نيتي سواء هو صادق فعلا أو كاذب، وعشان ما أبقاش ظلمته
سؤال جميل
مبدأيا أكرر: أنا مش بافتي خالص، أنا بس باعرض وجهة نظري
انت بتاخد بغالب الظن، يعني الشحات اللي قدامك ده غالبا صادق ولا غالبا كاذب؟
واقعيا.. واضح جدا من تكرار قصص الشحاتين ومن رؤية بعضهم اكتر من مرة، وأنا شخصيا أعرف شحاتين بقى لهم سنين بيشحتوا وبعضهم بيقعد يكرر نفس الكلام ونفس القصص الواهية بتاعتهم دي
فوجهة نظري المتواضعة إن اغلب الناس كذابين أو محترفي تسول
مرة واحدة شحاتة جت تشحت مني، فقلت لها الكلمة اللي أحيانا باقولها automaticly: الله يسهل لِك
فردت عليّ بعصبية: أهه انتوا كده ما بتدوش حاجة (قصدها اللي بذقون اللي زي حالاتي كده)
كان نفسي أقول لها: عشان احنا اللي فاهمينكم
بس ما قلتش



طب إيه بقى اللي يخليني ادي فلوس لواحد غالبا كاذب، أو على الأقل مش ضامن مدى صدقه، في حين إن فيه أماكن تانية موثوق بها كتير جدا جدا
مساجد أو جمعيات خيرية مشهرة بتعمل "أبحاث" دقيقة عن حالات معروفة وبتصرف عليهم
دول بقى يعرفوا يوصلوا للناس الغلابة بجد، الناس الفقرا بجد، الناس اللي عايشين حياة كتير مننا لا يتخيلها من شدة صعوبتها
دول اللي تتبرع لهم وانت متطمن ان شاء الله
فاللي عايز يعمل خير او يتصدق او يدفع زكاة ماله يروح لمكان موثوق به، المفروض تتحرى كويس المكان اللي بتتصدق لله عن طريقه



أما الحديث اللي كذا واحد يقوله بتاع "أعطوا السائل وإن جاء على فرس" ده ضعفه كثير من العلماء
لو دخلتوا على الموقع ده تلاقوا مافيش ولا نتيجة فيهم تقول انه صحيح او حسن او حتى حسن لغيره
الظاهر ان اللي مألفه كان شحات تِنِك شوية
ده غير إن فيه حديث تاني صريح وصححه الألباني عن النبي (صلى الله عليه وسلم) أنه قال: "لا تحل الصدقة لغني ولا لذي مرة سوي"



هنا فتوى مهمة خاصة بالموضوع من موقع الشيخ محمد حسين يعقوب yaqob.com

ودي فتوى من موقع الشيخ محمد المنجد islamqa.com
ومما ورد فيها الآتي: "والأفضل في كل الأحوال تحويل هؤلاء على لجان الزكاة والصدقات لتقوم بعملها من التحري عن أحوالهم ومتابعة شئونهم حتى بعد إعطائهم، فمن علمتَه أنه ليس بحاجة أو غلب على ظنك هذا فلا تعطه"





قيل (والله أعلم بمدى صحة الكلام) ان شحات راح لهارون الرشيد يشحت منه، فما ادالوش حاجة
قال الشحات: أين الذين يؤثرون على أنفسهم ولو كان بهم خصاصة؟
قال هارون: ذهبوا مع الذين لا يسألون الناس إلحافا
رحم الله هارون "الرشيد"



أهم حاجة إن الواحد يحافظ على أسلوبه في الكلام معاهم، ويحافظ على ابتسامته وهو بيكلمهم، هو ده أفضل أسلوب للرد على الناس دي
قال الله تعالى: قَوْلٌ مَّعْرُوفٌ وَمَغْفِرَةٌ خَيْرٌ مِّن صَدَقَةٍ يَتْبَعُهَآ أَذًى وَاللّهُ غَنِيٌّ حَلِيمٌ [البقرة - 263]
وأمرنا أيضا عز وجل قائلا: وأمَّا السَّائِلَ فَلا تَنْهَرْ [الضحى - 10]
وقد قال رسول الله (صلى الله عليه وسلم): تبسمك في وجه أخيك لك صدقة[رواه الترمذي وصححه الألباني]



المسخرة بقى في الموضوع إن كتير من اللي بيشحتوا دول شباب، أو كبار بس ما شاء الله الواحد فيهم فيه صحة كده
الواحد من دول بيشحت ليه؟
ولو صبرت عليه وقعدت تسمع قصة حياته وجيت في الآخر تقول له: طب أنا هاشوف لك شغلانة
يقول الجملة الجميلة اللي تثبت لك عدم مصداقيته: طب مافيش أي مساعدة كده دلوقتي؟
أنا أحترم اللي يشتغل بـ200 جنيه في الشهر ولا يشحتش
أنا أحترم اللي يبقى فني بسيط أو حتى فواعلي ولا يشحتش
أنا أحترم بياع اللمون والجرجير اللي ما بيشحتش
أنا أحترم أي حد ينفذ أمر رسول الله (صلى الله عليه وسلم): اذهب فاحتطب [رواه أبو داود] ولا يشحتش
لكن اللي يشحت، ويتخذ الشحاتة مهنة وحرفة
فعذرا.. أنا مش هاصدقهم
















جملة مصرية جدا



يعني كويس كده؟ طب معلش متهيألي لسه شوية، استنى بقى دلوقتى يا واد لحد زي امبارح برضه


جملة مصرية صرف
قعدت أتفكر شوية في الكلمات دي عشان احاول اعرف مصدرهم من اللغة العربية، وعرفت بعضهم (فيما أظن)، وبعضهم ساعدني في فهمه بعض أصدقائي اللي اتناقشت معهم في الموضوع، وبعضهم لسه مش عارف مصدره
فده مثال لما توصلت إليه، قد أكون محقا وقد أكون مخطئا، بس أهي محاولة متواضعة لتفتيح الدماغ، ومعرفة أصل كلام كتير من اللي بنقوله
وياريت لو حد يساعدني ويصحح لي أو يضيف لي معلومة

* يعني: لما تيجي في صيغة السؤال بيبقى أصلها "أيعني هذا أنه" كذا كذا؟ غير كده الكلمة دي بتستخدم في الوسط الكلام كتير أوي وغالبا ع الفاضي

* كويس: مش عارف، ناس قالت لي إنها تصغر "كَيّس"

* كده: أصلها "كذا"، أعتقد نقدر نقول انها بنفس معنى كلمة "هكذا"، بس كعادة المصريين زمان كانوا يقلبوا حرف الذال إلى حرف دال

* طب: أصلها "كلام طيب"، وحذفت كلمة "كلام" فبقت "طيب"، واتحرفت إلى "طب" وأحيانا بنستسهل ونقول "طاه"، المهم انها بقت كلمة بتتقال في أي وقت من غير معنى برضه

* معلش: أصلها "ما عليه شيء"، طبعا مش متأكد أوي، بس الظاهر انها اتحرفت من الجملة دي، إلى "معلهشي"، ثم "معلشي"، ثم "معلش"

* متهيألي: أصلها "متهيأ ٌ لي"، يعني ظاهر لي أو باين ليّ، وأحيانا بنقولها "بتهيألي" أصلها "يتهيأ لي" فعل مضارع، واحنا بنضيف حرف الباء للأفعال المضارعة في اللهجة المصرية، فبقت "بيتهيأ لي"

* لسه: أصلها "للساعة"، يعني حتى الساعة الحالية أو حتى الآن لم يحدث كذا

* شوية: قيل لي أن أصلها "شويئ" وهي تصغير "شيء"، وما أعرفش إيه اللي خلاها مؤنثة "شويئة"

* استنى: عندي ليها نظرية عجيبة شوية، قد تكون أصلها "تأنى"، ثم "استأنى" (غريبة الكلمة دي)، ثم "استنى"

* بقى: أصلها بـَقـِيَ (فعل ماضي)، والظاهر انها من الكلمات اللي برضه بنستخدمها في أي وقت من غير معنى

* دلوقتى: أصلها "هذا الوقت"، وكلمة "هذا" أصلها "ذا" وأضيف إليها حرف الهاء للتنبيه، وبقينا احنا بننطقها "دا" ثم "ده"، فبقت "ده الوقت" ثم "دلوقت"، بس مش عارف حرف الياء اللي في الاخر ده جه منين، الظاهر دلع مصريين

* واد: أصلها "ولد"، ونلاحظ إن كلمة "يا ولد" اتحذف منها حرف اللام فبقت "يا واد" ثم "ياد"، أو ممكن يتحذف منها حرف الدال فبقت "يا ولا" ثم "يالا"

* لحد: بمعني "إلى حد" كذا، فكلمة "لحد" عبارة عن حرف جر (حرف اللام) واسم مجرور (كلمة "حد")

* زي: مش عارف

* امبارح: أصلها "اليوم البارح"، يعني "اليوم الماضي أو الليلة الماضية"، مش عارف بقى يمكن المصريين حسوا ان حرف اللام بعده حرف الباء صعبة شوية في كلمة "البارح"، فاتحرفت إلى حرف ميم

* برضه: وأحيانا تنطق "برضك"، بس مش عارف

ده اللي توصلت له حتى الآن
والله أعلم




تحديث
صاحبة مدونة "خمسة فضفضة" جمعت الجملة تاني بعد ترجمتها من اللهجة المصرية للغة العربية الفصحى

أيعني هذا أنه كيّس صغير هكذا؟ كلام طيب ما عليه شئ يتهيأ لي أنه للساعة شئ صغير، استأني بقِيَ هذا الوقت يا ولد إلى حد مثل اليوم البارح (برضه)

وده مصداقًا لما ورد في الأغنية الـ"لطيفة" (الحمد لله ربنا عافانا من الأغاني أصلا)
"تعرف تتكلم بلدي؟"
أو زي ما المصرية للاتصالات بتقول
"اتكلم بلدي يا ابن أرضي"
(تم تبديل الكلمتين عشان الحبكة الدرامية)











Thursday, October 30, 2008

متحرش مجرم .. لكنه ضحية


الكلام ده تابع للتدوينة السابقة

بم تفسر .. التحرش





طيب ماشي
حلو اوي
جميل جدا

اتحكم على "المجرم" بـ3 سنوات مع الشغل وغرامة مؤقتة 5000 جنيه وجنيه، بتهمة التحرش الجنسي بفتاة
القصة من الأول هنا
بصرف النظر عن مدى استحقاقه لعقوبة بالحجم ده من عدمه
شريف جمعة جبريل بقى عبرة لكل شاب ممكن يفكر إنه يتحرش بواحدة جنسيا
شريف جمعة جبريل انتهى أمله في إنه يتزوج ويحصن نفسه، لأنه ببساطة هيخرج من السجن إن شاء الله وهو 30 سنة، ويبتدي بقى يكوّن نفسه من الصفر، مع الاعتبار إنه في نظر المجتمع بقى إنسان غير محترم
ونهى رشدي بقت مثال للبنت اللي مش بتسيب حقها
كل ده كلام زي الفل

ولكن

سؤال باطرحه وأنا في غاية الاستياء والقرف
هل عاقبتم باقي "المجرمين" اللي دفعوا "المجرم" ده انه يعمل عملته دي؟؟؟
مزيد من التفاصيل في تدوينتي السابقة
شريف جمعة في نظري قبل ما يكون مجرم فهو ضحية
ضحية مجتمع قذر أحاط به، وضيق عليه الخناق، ثم أشار إليه بأصابع الاتهام، فقضى على مستقبله تماما

الخلاصة

1- نهى رشدي أحييها على شجاعتها وعلى عدم السكوت عن حقها

2- أنكر عليها عدم التزامها بالحجاب "الشرعي"، لأني ببساطة لا أعتقد أبدا إن ممكن واحد يقدم على فعل زي ده إلا إذا كان رأى منها شيئا يدفعه إلى ذلك
لا يمكن أصدق إنه مد إيده على حاجة ماكانتش ظاهرة أصلا من الأول، ومش هافصل أكتر من كده في الكلام

3- سؤال: هل عاقبتم باقي "المجرمين" اللي دفعوا "المجرم" ده انه يعمل عملته دي؟؟؟

Sunday, September 28, 2008

بم تفسر .. التحرش





أولا قبل ما أقول أي حاجة، عايز أوضح إني مش بأبرر تصرفات الهمج دول اللي بيتسببوا في التحرش في عديد من المواقف
أكرر .. أنا مش بأبرر التصررفات دي
أنا بس عايز أحاول أعرف الأسباب

الشاب المصري ..

* الشاب المصري غالبا مش لاقي ياكل

* الشاب المصري تعبان في دراسته (لو كان طالب)

* الشاب المصري مطحون في شغله (لو لقى شغل أصلا)

* الشاب المصري عنده فراغ بغيض (سواء طالب أو خريج عاطل)

* الفيديو كليبات بقت لا تطاق، وكله دلوقتي شغال بالوصلة، يعني الدش في بيت الجميع

* الأفلام بقت غير محتملة، والشاب المصري متعود إنه يروح السنيما في العيد

* الأفلام الإباحية بقيت في متناول الجميع، حتى لو فقير وماعندكش كمبيوتر انزل نت كافيه
وأقعد ساعة كاملة بـ2 جنيه مثلا أو أقل، واكتب فقط الكلمة إياها عشان تنفتح على عالم لا نهائي من القذارات، زمان أيام أبويا وجدي لما كان الصايع منهم عايز يشوف حاجة إباحية كان بالعافية يجيب مجلة أجنبية مش عارف منين، ويتلم مع أصحابه يقعدوا يتفرجوا عليها، أو يقصقصوا الصور ويحتفظوا بيها، ويقعدوا يقولوا في انبهار عجيب: "ايييييه ده؟؟ معقولة؟؟"، لكن دلوقتى انت ممكن تبقى على يوتيوب وبتتفرج حتى ولو على درس لشيخ معين، وتلاقي إعلان على جنب كده، بكليك واحد تنفتح برضه على العالم إياه، بالصوت والصورة وببلاش وانت قاعد مأنتخ في بيتك، يعني العالم كله بيقول لك "هيت لك"

* البنات في الشارع خاصة في العيد بقوا شيء غير عادي، للأسف حتى كتير من المحجبات، أنا عايز أقول حاجة وخايف أقولها، أقول؟ هاقول والله المستعان: يمكن أكتر من 90% من المحجبات .. مش محجبات، بلا مبالغة، ده مش حجاب ياجماعة

* حتى الإعلانات في الشوارع بقت بشعة، ما أنساش أبدا إعلانات جونسون اللي كان بتطاردني في كل حتة، واحد منهم كان عبارة عن رجل واحدة عارية، أو واحدة عارية شايلة ابنها
طبعا أنا آسف على أسلوبي ده في الكلام اللي هو مش من عادتي
بس ده أبسط أسلوب أقدر أوصف بيه شيء كان موجود فعلا في الشارع وكل الناس كانت شايفاه

* الشاب المصري مش لاقي يتنيل يتجوز، ولا شقة ولا فرش ولا شبكة ولا فرح ولا لاقي شغل أصلا، أعتقد متوسط سن الزواج بقى من 25 لـ30 سنة، في حين إن الشاب بيبلغ في متوسط سن 12 تقريبا، يعني 15 سنة من عمره تقريبا الشهوة بتحرق فيه وسط الفتن دي

* الشاب المصري تافه وماعندوش أي انتماء ولا لدين ولا لبلد ولا لقومية حتى ولا أي نيلة، أقصى انتماءاته للنادي الأهلي مثلا (ملحوظة: واضح إني مش باشتم الأهلوية أكيد، أنا باشتم اللي مالوش انتماء لدينه)

* الشاب المصري مبقاش عنده أخلاق زي زمان، زمان كان تلاقي الراجل عنده شهامة ورجولة وأخلاق، حتى لو مش متدين ولا بيركعها، لكن دلوقتى عادي جدا جدا إنك تلاقي سواق تتاكسي مثلا يشتم واحدة سايقة عربية جنبه، وأحيانا بتبقى شتايم خادشة للحياء، ده لو كان عم "حياء" ده لسه عايش أصلا

* الشاب المصري مش محترم، واتعود على المهانة، واتعود على قلة القيمة، الناس اللي بتقول إن المتحرشين دول حيوانات، أيوة ياعم حيوانات حيوانات بس نعيش، حيوانات حيوانات بس نتبسط، أكيد ده اللي بيدور في ذهن الحيوان منهم، ربنا يهديهم

كفاية كده وصف في الشاب المصري، مع مراعاة إن أكيد أكيد مش كل الشباب كده




نيجي بقى بعد كل ده وعايزين لما نروح للشاب المصري نقول له "حملة إحترم نفسك"، يقوم هو يطأطأ رأسه وينزل دمعتين ويرفع علم مصر عاليا وهو بيقول "لسه فيكي رجالة يا مصر"
الناس دي بتفكر ازاى؟؟؟

دلوقتى شعار الشاب المصري: حيوانات حيوانات .. بس نعيش
فالناس اللي بتفكر في حل للمصائب دي أنا بس عايزهم يحطوا نفسهم مكان الشاب المصري، ويفكروا كده: "إيه الشيء اللي يخلي واحد صايم وميت من الجوع لما يشوف الأكل قدامه ما يمدش إيده ياخد حتة ؟"
أو بمعنى أصح: "إيه الشيء اللي يخلي الشاب المصري يشوف واحدة مش لابسة كويس ما يمدش إيده ياخد حتة ؟"

رب اهدِ قومي
وربنا يثبتنا ويحفظنا ويقنا الفتن ما ظهر منها وما بطن
لأن أنا بقيت مقتنع تماما إن احنا في زمن أكبر فتنة شهوانية جنسية في تاريخ البشرية
بلا مبالغة، خاصة مع تعاون التكنولوجيا على كده


Monday, August 25, 2008

توقعات هلال رمضان 1429




اقترب موعد تحري رؤية هلال شهر رمضان لعام 1429 من الهجرة
نسأل الله أن يبلغنا رمضان
وأن يعيننا فيه على القيام والصيام وقراءة القرآن
وأن يغفر لنا ما تقدم من ذنوبنا
وأن يجعلنا من عتقائه من النار

وتختلف نتيجة رؤية الهلال من بلد لآخر
وفيما يلي توقعاتنا المتواضعة للبدايات الشهر في بعض البلدان الإسلامية
لنستخلص منها فائدة مهمة في نهاية المقال إن شاء الله

فلكيا
سيولد الهلال يوم 30 أغسطس في منتصف الليل (11:57 مساءً) بتوقيت مكة المكرمة، لذا يستحيل على الدول الإسلامية رؤيته في هذه الليلة
سيكون الهلال ظاهرا لبعض الدول الإسلامية يوم 31 أغسطس (لن يكون ظاهرا لكل الدول الإسلامية)، مما يعني أن بداية شهر رمضان (فلكيا) تكون في اليوم التالي، 1 سبتمبر
فيصبح بذلك شهر شعبان 30 يوما في معظم البلدان الإسلامية
إن شاء الله
هذه النتيجة بناء على حسابات وكالة ناسا، وتقويم أم القرى وغيرهما

للمزيد
حسابات وكالة ناسا
منتدى الجمعية الفلكية بجدة
المشروع الإسلامي لرصد الأهلة - محمد عودة

ليبيا
ستبدأ ليبيا شهر رمضان يوم الأحد 31 أغسطس بناء على طريقتها الخاصة في الحسابات الفلكية
إن شاء الله
وهذا التفرد يرجع إلى اختلاف مقياس ثبوت الرؤية عنها في باقي البلدان المعتمدة على الحسابات الفلكية
حيث تعلن ليبيا بداية شهر رمضان بناء على ولادة القمر حتى وإن لم يظهر لها، فإن ولد القمر في أي وقت قبل الفجر (في أي من بقاع الأرض) كان ذلك إعلانا لبداية الشهر
ربما كان ذلك له أصل فقهي، إلا أنه أسلوب غريب

نيجيريا
لأسباب غير معروفة لدينا قد تعلن نيجيريا عن بدء شهر رمضان أيضا يوم الأحد 31 أغسطس
إن شاء الله

السعودية
على الرغم من أن بعض الناس (في المعتاد) يدّعون رؤية الهلال في أوقات يستحيل رؤيته لأنه لم يولد بعد، فيبدأ الشهر مبكرا عن البداية الصحيحة فلكيا
إلا أنه ربما يتعذر هذا العام على عموم الناس إدعاء رؤية الهلال، مما يعني إعلان بداية شهر رمضان مع البداية الصحيحة له يوم 1 سبتمبر

دول الجزيرة العربية
تتبع تلك الدول السعودية في بداية الشهر، خاصة وأن دول كعمان التي بدأت باعتبار أقوال الفلكين لن تجد تعارضا بينه وقول السعودية
إن شاء الله

مصر وتركيا
يوجد في مصر أكثر من مرصد، إلا أنه من المعروف لديها مسبقا (فلكيا) أنه تستحيل رؤية الهلال يوم 30 أغسطس
فعلى أي حال سيتم إعلان أن غرة رمضان ستكون يوم 1 سبتمبر بناء على احتمال رؤيته يوم 31 أغسطس، وبناء على مرور 30 يوما على شهر شعبان
كذلك نفس البداية في تركيا بناء على الحسابات الفلكية
إن شاء الله

إيران
نظرا لاعتمادها على الحسابات الفلكية، فستبدأ يوم 1 سبتمبر
إلا أنه من المحتمل أن تعلن إيران عن بداية الشهر يوم 2 سبتمبر نظرا لأنه تصعب رؤية الهلال في إيران وفي بعض الدول الإسلامية المجاورة لها، بالإضافة إلى تأخرهم في بداية شهر شعبان عن العديد من الدول الإسلامية
فلا ندري ما قولهم في ذلك الأمر
إن شاء الله

باكستان والهند
من المعتاد أن تعلن باكستان عن دخول الشهر متأخرةً عن باقي الدول الإسلامية
ربما كان ذلك لصعوبة رؤية الهلال حتى في يوم 31 أغسطس، أي أنهم لن يروه إلا يوم 1 سبتمبر، مما يعني دخول شهر رمضان يوم 2 سبتمبر
إن شاء الله


كان ذلك مجرد توقعات لدخول الشهر المبارك في بعض الدول الإسلامية
وربنا يتم تحديث هذا المقال إذا ما جد جديد
إلا أننا نستخلص من هذا الخلاف بعض الدروس المستفادة التي ننصح بها المسلمين


* الخلاف في الرؤية لا ينبغي أن يكون سبب خلاف وشقاق بين الأمم وبين المسلمين، بل وبين أفراد الأسرة الواحدة
لكل دولة رأيها في معايير ثبوت الشهر التي تبنى على أسس فقهية
فلا داعٍ لكثرة الجدال والنقاش والمراء والشحناء وتضييع الأوقات بسبب خلاف في ثبوت الرؤية بين البلدان الإسلامية

* على كل مسلم أن يتبع أمر حاكم دولته، فلا داعٍ لأن يتبع مسلم في دولة ما رؤية دولة أخرى، مما يسبب حرجا ومشقة وخلافا بين المسلمين في البلدة الواحدة وحتى في البيت الواحد
كما أن ذلك لا يوحد الأمة الإسلامية كما يدعي البعض، بل على العكس، يكون ذلك سببا في الفرقة بين المسلمين، فتجد من هو صائم وأخيه مفطر، وفي آخر رمضان تجد من هو صائم وأخيه يكبر للعيد، ولا حول ولا قوة إلا بالله

* إن مسألة اعتبار اختلاف المطالع من عدمه فيه خلاف سائغ، وحكم الحاكم يرفع الخلاف

* لا ينبغي للمسلم أن يشكك في مصداقية أحد البلدان في تحري الرؤية الشرعية، فإن بعض الظن إثم، خاصة إذا اعتمد هذا الظن على أدلة واهية وأقوال غير موثوق بها


للمزيد
درس اختلاف المطالع - الشيح محمد سعيد رسلان
فتوى متعلقة بالموضوع - الشيخ محمد المنجد

نسأل الله أن يعيده علينا بالأمن والإيمان، والسلامة والإسلام
وتقبل الله منا ومنكم صالح الأعمال
ونسألكم الدعاء

Sunday, August 17, 2008

متولي في رمضان


الآن .. متولي على الـfacebook

http://www.facebook.com
group.php?gid=33279432264







محلوظة قبل ما نبدأ: اللي مش عارف من متولي ده يتفضل يروح هنا

الشوارع النهاردة شكلها عجيب
تحس كده إن الناس مش زي العادي
والشوارع شكلها اتغيرت
فوانيس فوانيس فوانيس
وبيتباع كمان ياميش وقطايف وقمر الدين
وأغنية "رمضان جانا" مالية المكان
ولو سألت الناس: ايه الموضوع؟
يقولوا لك: النهاردة 1 رمضان، كل سنة وانت طيب

غريبة
مع إن مافيش أي مظهر من المظاهر دي يدل على رمضان فعلا
ولا الأغاني ولا الفوانيس ولا قمر الدين حتى
مش هو ده رمضان الحقيقي يا جدعان

المهم متولي صاحبنا فين؟
متولي شايفينه أهه راكب المايكروباص، مروح بيته
السواق مشغل أغنية فيها كلام غريب وغير مفهوم من نوعية "وحوي يا وحوي، إياحا" (أو "إيوحة" حسب اختلاف الروايات)ـ
وفيه كذا واحد فاتح المصحف، وفيه ناس نايمة
السواق بيقول: أيوة الأجرة اللي ورا، ابعت
متولي طلع 75 قرش واداهم له
فقال السواق: الأجرة جنيه ونص
متولي: جنيه ونص ايه حرام عليكم، انا كنت باركب على طول بـ75
السواق: ياعم ما تتعبناش معاك واحنا صايمين وحرانين وكفرانين
متولي: لا إله إلا الله، كفرانين إيه بس، وحّد الله ياسطة
السواق: لا إله إلا الله ياعم، ابعت الباقي
متولي: خد ياعم، اللهم إني صائم
ودي كانت أبسط مشدة بين السواق وأحد الركاب
لكن غير كده السواق عمل له كذا خناقة الواحدة فيهم كافية عشان تضيع صيام الشهر كله

رجع متولي بيته أخيرا
وأدينا شايفينه مرمي على السرير
نايم على بطنه وعمال يقول: آه، آه، عطشاااااان
شوية وقام بالعافية قبل المغرب بنص ساعة عشان يلحق عزومة أول يوم
كان معزوم عند صديقة عم مصدق
بس ساعتها الشوارع شكلها كان مختلف تماما
كانت فاضية، والعربيات ماشية فيها بسرعات مجنونة
الناس نفسها كانت مجنونة
جعانين ياعيني، ومش متعودين على الصيام خالص خالص

وصل متولي لبيت عم مصدق اللي استقبله استقبال حار
متولي حب يلقي دعابة وهو داخل، فراح رازع عم مصدق السؤال التقليدي بتاع كل سنة: صايم يا عم مصدق؟ ولا زي كل سنة؟
عم مصدق نظر له شظرا من ثقل دم السؤال، وما ردش عليه، واستبدل متولي ابتسامته بوجه كله كسوف
جه الواد فارس (ابن مصدق) عشان يخطف كيس الفاكهة اللي جايبه معاه متولي
وطلعت جميلة (بنت مصدق) وهي لابسة الحجاب عشان تسلم على عمو متولي
فقال متولي في فرح: مبروووك، انتي اتحجبتي يا جميلة؟
فقالت جميلة مع ابتسامة: أيوة يا أونكل
متولي: ما شاء الله، ربنا يتقبل، ده من امتى؟
جميلة: من النهاردة يا أونكل
متولي: ممممم، آآآه، النهااااردة
عرف متولي على طول إن الحجاب ده عرض خاص ممتد طوال شهر رمضان المعظم فقط، وكل حجاب وأنتم بخير

بعد دقيقتين بالضبط، جت البشرى
"مدفع الإفطاااااااااار، إضرررررررب"
المهم ربنا ستر وماحدش حط في بؤه حاجة إلا لما سمعوا أذان المغرب، وإلا كان زمان صيامهم ده راح
فبمجرد سماع كلمة "الله أكبر" انقضت القوات الجوية عشان تنسف الأكل نسفا
بالعافية قدر متولي يقاوم نفسه عشان ينزل يصلي المغرب في المسجد
لكن عم مصدق فشل بصراحة في المهمة الصعبة دي

صلى متولي المغرب جماعة
والإمام كان بيراعي حال الناس الجعانة فصلى بـ"إنا أعطيناك الكوثر" و"قل هو الله أحد"
وبمجرد ما الإمام سلم، فوجئ متولي بالناس بتجري بسرعة شديدة بعد ما خلصت صلاة
وحتى اللي لسة ما خلصش صلاة وفاضل له ركعة أو أكتر ساب الصلاة وطلع يجري برضه، فيه ناس ماكانتش بتصلي أصلا
ولما سأل متولي عن السر ورا الموضوع ده، عرف إن الناس دي بتجري عشان تلحق لها مكان في مائدة الرحمن

رجع متولي ولقى عم مصدق لسه شغال طحن في الأكل
شوية وابتدى عم مصدق في الفاكهة اللي جايبها متولي
شوية وطلع سيجارة وقعد يحب فيها شوية
ماهو ياعيني محروم منها طول النهار
كل ده وعينهم هم الاتنين على التليفزيون
كأن على رءوسهم الطير
مش قادرين يرفعوا عينهم من عليه
ماهو أصل البرامج السنة دي تشد الواحد أوي
وشوية وتبدأ وصلة المسلسلات
كل ده ولسه عم مصدق ما صلاش المغرب
يعني يا دوب قام بسرعة يصليها قبل أذان العشاء بدقيقتين ونص ورجع تاني عشان يكمل القعدة قدام التليفزيون

فجأة قطع عم مصدق الصمت الرهيب اللي قدام التليفزيون ده بالحوار التالي
مصدق: بس السعودية هي اللي ماشية صح
متولي: هو ايه ده؟ مش فاهم؟
مصدق: كان المفروض رمضان يبقى امبارح
متولي: بس حسب الحسابات الفلكية رمضان مستحيل يبتدي امبارح
مصدق: ياعم انت بتصدق حسابات الفلكيين دي؟ احتمال الخطأ وارد
متولي: نسبة الخطأ تكاد تكون صفر، وغير كده ماهم طلعوا يبصوا على الهلال بالمراصد ما شافوش حاجة
مصدق: بس هناك الرؤية الشرعية المضبوطة
متولي: بس احتمال الخطأ وارد برضه
مصدق: حتى لو أخطأوا فربنا هيعذرهم عشان مطبقين الرؤية الشرعية صح

استمر النقاش مدة طويلة
واستمر، واستمر
واحتد الخلاف
وعلت الأصوات
وغضب الطرفان
وفضلوا شغالين في الحوار الساخن ده لحد ما نزلوا عشان صلاة العشاء
وطول السكة من بيت مصدق للمسجد
وحتى لما دخلوا المسجد
لحد ما واحد فيهم دخل في الصلاة الأول، فاضطر التاني إنه يسكت
وطبعا أثناء الصلاة هم الاتنين دماغهم في الحوار ده بشدة
وكل واحد عمال يحضر الحجج والبراهين الساطعة على إن كلامه هو الصح
وبمجرد التسليم من الصلاة رجعوا تاني يكملوا نقاش في الموضوع

استمر الوضع على هذا الحال حتى سمعوا صوت الناس في المسجد بيقروا سورة الإخلاص 3 مرات
ففهموا على طول إن دي بداية صلاة التراويح
ما حدش فاهم إيه السر في قراءة سورة الإخلاص 3 مرات قبل التراويح
بس أهي موضة وخلاص، الظاهر عشان يخشوا في الصلاة وهم مستعدين
فسخن أوي عم مصدق، ومع بداية الصلاة راح رافع إيده لفوووق أوي وقعد يمد في لفظ الجلالة بصوت جهوري وهو بيقول "الله أكبر"ـ
الظاهر إن الإمام كان مركب nitrous وهو بيصلي، شغال تربو، يعني الركعة ما ياخدش فيها أكتر من 3 آيات غير الفاتحة
ويا سلام بقى لما تتفرج على متولي وعم مصدق وهم بيعملوا حاجات عجيبة في الصلاة
آدي عم مصدق مش قادر يركع كويس من كتر الأكل اللي أكله
وأدي متولي وهو بيقوم من الركوع مندمج أوي وهو بيقول: ربنا ولك ألف حمد وألف شكر يا رب، ولازم طبعا يبوس إيده بعدها
وفي أثناء الصلاة رن موبايل عم مصدق، ودار بينه وبين نفسه الحوار ده
من هنا

وعلى صعيد آخر، في مصلى النساء
كانت الحاجة أم فارس (زوجة عم مصدق) جاية وبقى وريحتها فايحة من الكالونية اللي غرقت نفسها بيها دي
ماهو لازم طبعا لزوم الصلاة، سبحان الله
وكانت معاها بنتها جميلة وهي عمالة تشاور عقلها، شوية تنزل التندة .. عفوا أقصد تنزل الحجاب على كتفها، وهوب ترفعه وقت الصلاة
ونجحت بأعجوبة إنها تتسحب في الآخر عشان تقابل صاحبها اللي كان جاي يصلي في نفس المسجد
وكان الكلام مابينهم كله عن التراويح، وحلاوة صوت الإمام، والخشوع اللي كانوا فيه، والعياط اللي قعدوا يعيطوه في الصلاة
كان حوار شيق جدا ومؤثر جدا جدا

صلاة التراويح ما أخدتش أكتر من 30 دقيقة
ومع ذلك متولي مافيش حاجة في دماغة غير كلمة: آه يا بطني، آه يا بطني
وعم مصدق جه ع الآخر وما بقاش شايف قدامه
وأخيرا خلصوا صلاة، وخرجوا من المسجد
خرجوا وناويين يعملوا ايه يا ترى؟
خرجوا عشان يكملوا وصلة المسلسلات، مع القطايف والكنافة والبسبوسة وإلخ إلخ

وبالليل رجع متولي أخيرا لبيته
ونام زي الفسيخة، يمكن الفسيخة تزعل كمان من التشبيه ده
المهم إنه نام أخيرا
وصحي بالعافية قبل الفجر بربع ساعة
يا دوب اتسحر بسرعة بسرعة
وبعدها نزل يصلي الفجر
وإذا بالمسجد ممتلئ على الآخر في الفجر
سبحان الله
طب الناس دي فين طول السنة؟
طب كانوا فين امبارح؟ ولا امبارح ما كانتش ليلة أول رمضان؟
طب يا ترى الناس دي هتكمل معانا لحد آخر الشهر إن شاء الله؟
ولا زحمة الفجر والتراويح دي ما بتبقاش إلا في أول كام يوم كده؟
كل دي أسئلة دارت في ذهن متولي

مرت الأيام
والمصلين في المساجد عمالين يقلوا
ويقلوا
ويقلوا
وشوية شوية ابتدوا يزيدوا تاني
ويزيدوا
ويزيدوا
لحد ما جت إحدى الليالي اللي راح فيها متولي المسجد وفوجئ إنه مش عارف يدخل
مش عارف يقرب من المسجد أصلا
الناس بتصلي في الشارع من كتر الزحام
العربيات راكنة صف تاني وتالت ورابع
الشوارع واقفة
الناس في البلكونات بتصور المشهد الرائع ده

هو إيه الموضوع؟؟؟
الموضوع إن الليلة دي ليلة 27 رمضان
هو صحيح مش شرط تكون ليلة 27 هي ليلة القدر
ممكن تبقى 21 أو 23 أو 25 أو 27 أو 29
بس خير خير، متولي كان سعيد جدا جدا بالتجمع الإيماني الباهر ده
سعيد فعلا
من كل قلبه

لكن ننتقل الآن أعزائي المشاهدين قدام لـ3 أيام
ليلة 30 رمضان
وكل سنة وانتم طيبين
فعلا كل سنة وانتم طيبين
المساجد شبه مهجورة
في التراويح والتهجد عدد الصفوف معدود على الأصابع
حتى المعتكفين قرروا ينهوا اعتكافهم بدري، من منطلق "قشطة ماجتش من يوم يعني"
متولي لما بيدخل المسجد بيحس بوحشة
فين الناس؟
الناس في وادي تاني

في الوادي التاني ده لاقينا عم مصدق واقف في زحمة شديدة
في محلات الملابس
زحمة ودوشة وطوابير وظيطة
كله عايز يلحق يجيب لبس العيد
جميل ان الواحد يجيب لبس للعيد وشيء مستحب إن شاء الله
لكن مش جميلة المناظر دي
ومش جميل هجر المساجد

على العموم
كل رمضان وانتم طيبين
ونسأل الله أن يتقبل منا ومنكم صالح الأعمال وأن يغفر لنا
وربنا يستر في العيد
مش عارفين هنشوف ايه ساعتها
حتى ذلك الحين
نستودعكم الله
والسلام عليكم

صور خسوف القمر



السبت 16 أغسطس
الموافق 15 شعبان
كان في خسوف جزئي للقمر
وده أنا كنت مستنيه من سنتين تقريبا
زيه زي باقي الظواهر الفلكية اللي باحب اتابعها
وسبحان الله الحاجات دي بتساعد على التفكر في عظمة قدرة الخالق عز وجل

جدير بالذكر أنه لن يكون أي خسوف ملحوظ آخر للقمر في مصر قبل يوم 15 - 6 - 2011 (خسوف كلي)
ولن يكون أي كسوف للشمس أيضا قبل يوم 15 - 1 - 2010 (كسوف حلقي وقت شروق الشمس)
إن شاء الله

مزيد من التفاصيل

أترككم الآن مع الصور اللي صورتها امبارح بعد ما خلصنا صلاة الخسوف
وسبحان الله العظيم







كنت محتاجها ومستنيها



كنت محتاجها
وكنت مستنيها
وشايفها ضرورية جدا جدا
عشان الواحد يعرف يكمل المسيرة
بعد حبة ضغوطات كده

رحلة ترفيهية
أهم العوامل فيها هو البحر
نعمة عظيمة من ربنا سبحانه وتعالى
فمن باب الترفيه عن النفس
ومن باب "وأما بنعمة ربك فحدث"
اسمحوا لي أستعرض بعض المشاهد

-:المشهد الأول:-
المكان: محطة الرمل، الإسكندرية
الزمان: بعد العشاء، وبعد أكلة عظيمة من "محمد أحمد" بتاع الفول
الخلفية الصوتية: نشيد "مع الله"، مشاري راشد


-:المشهد الثاني:-
المكان: العصافرة، الإسكندرية
الزمان: بعد الفجر، وقت الشروق
الخلفية الصوتية: نشيد "صلاة الفجر"، محمد العزاوي


-:المشهد الثالث:-
المكان: قرية زمردة، الساحل الشمالي
الزمان: الساعة 11:30 صباحا
الخلفية الصوتية: تلاوة لسورة الرحمن، مشاري راشد


هذا من فضل ربي ليبلوني ءأشكر أو أكفر
كان لازم
عشان الواحد يقدر يستمر
ويرجع تاني بطاقة أكتر

والله المستعان

Wednesday, July 2, 2008

حقيقة الخلاف بين الصحابة

الفتنة الكبرى



هو خلاف بين الصحابة، سببه أن القضايا كانت مشتبهة، فلشدة اشتباهها اختلف اجتهادهم وصاروا ثلاثة أقسام:

قسم ظهر لهم بالاجتهاد أن الحق في هذا الطرف وأن مخالفه باغٍ، فوجب عليهم نصرة هذا الطرف وقتال الباغي مع الإمام، لقوله تعالى: {فَقَاتِلُوا الَّتِي تَبْغِي حَتَّى تَفِيءَ إِلَى أَمْرِ اللَّهِ} [الحجرات 9]
وقسم عكس هؤلاء: ظهر لهم بالاجتهاد أن الحق في الطرف الآخر، فوجب عليهم مساعدتهم وقتال الباغي عليهم، وأيضًا من نفس المنطلق ونفس الآية السابقة
وقسم ثالث: اشتبهت عليهم القضية وتحيروا فيها، فاعتزلوا الفريقين، وكان هذا الاعتزال هو الواجب في حقهم، لأنه لا يحل الإقدام على قتال مسلم حتى يظهر أنه مستحق لذلك
وقد قال رسول الله صلى الله عليه وسلم: (إذا حكم الحاكم فاجتهد ثم أصاب فله أجران، وإذا حكم فاجتهد ثم أخطأ فله أجر) [رواه البخاري]

فلا يجوز على الإطلاق الطعن في أحد من الصحابة، وحسن الظن مطلوب في حق كل المسلمين، وفي حق الصحابة أَولى، لقوله تعالى: {وَالَّذِينَ جَاؤُوا مِن بَعْدِهِمْ يَقُولُونَ رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلًّا لِّلَّذِينَ آمَنُوا رَبَّنَا إِنَّكَ رَؤُوفٌ رَّحِيمٌ} [الحشر 10]
وإذا تبين خطأ أي من الصحابة في اجتهاده فنقول: اجتهد فأخطأ فله أجر، وسيتبين إن شاء الله بعد عرض الموضوع بكامل تفاصيله أن المسألة كانت اجتهادية، ولكلٍّ اجتهاده السائغ، ولذلك نرى موقف عليّ بن أبي طالب مع أهل الشام -معاوية والذين معه- يختلف تمامًا عن موقفه من الخوارج! وذلك لأن أهل الشام كان لهم تأويلٌ سائغٌ واجتهاد، أما الخوارج فلا، ولذلك أيضًا نجد في النصوص الشرعية وصف الخوارج بأنهم يمرقون من الدين، وأنهم كلاب أهل النار، أما أهل الشام فكان عليٌّ رضي الله عنه يقول: قتلانا وقتلاهم في الجنة، وأيضًا، لم يكن في الخوارج صحابيٌّ واحدٌ، لا في الذين قتلوا عثمان رضي الله عنه، ولا في الذين حاربوا عليًّا وقتلوه رضي الله عنه، ولا في الذين حاولوا قتل معاوية وعمرو بن العاص رضي الله عنهما
فلا يجوز أن يقلل هذا الخلاف وهذه الفتنة من شأن علي بن أبي طالب، أو معاوية بن أبي سفيان، أو عمرو بن العاص، أو عائشة أم المؤمنين، أو الزبير بن العوام، أو طلحة بن عبيد الله ... إلخ، الذين شهد رسول الله صلى الله عليه وسلم لكل واحد منهم بالإيمان، أو غيرهم من الصحابة (رضوان الله عليهم أجمعين)

وفيما يلي -إن شاء الله- تلخيص لأهم احداث الفتنة، وتلخيص لوجهات النظر المختلفة


نسرد قبل البدء في الموضوع بعض الأدلة من الكتاب والسنة على فضل الصحابة الذي فاق فضل كل أحد:

* قوله تعالى: {وَالسَّابِقُونَ الْأَوَّلُونَ مِنَ الْمُهَاجِرِينَ وَالْأَنْصَارِ وَالَّذِينَ اتَّبَعُوهُمْ بِإِحْسَانٍ رَضِيَ اللَّهُ عَنْهُمْ وَرَضُوا عَنْهُ وَأَعَدَّ لَهُمْ جَنَّاتٍ تَجْرِي تَحْتَهَا الْأَنْهَارُ خَالِدِينَ فِيهَا أَبَدًا ذَلِكَ الْفَوْزُ الْعَظِيمُ} [التوبة 100]
* وقوله: {إِنَّ الَّذِينَ آَمَنُوا وَالَّذِينَ هَاجَرُوا وَجَاهَدُوا فِي سَبِيلِ اللَّهِ أُولَئِكَ يَرْجُونَ رَحْمَةَ اللَّهِ وَاللَّهُ غَفُورٌ رَحِيمٌ} [البقرة 218]
* قوله: {فَالَّذِينَ هَاجَرُوا وَأُخْرِجُوا مِنْ دِيَارِهِمْ وَأُوذُوا فِي سَبِيلِي وَقَاتَلُوا وَقُتِلُوا لَأُكَفِّرَنَّ عَنْهُمْ سَيِّئَاتِهِمْ وَلَأُدْخِلَنَّهُمْ جَنَّاتٍ تَجْرِي مِنْ تَحْتِهَا الْأَنْهَارُ ثَوَابًا مِنْ عِنْدِ اللَّهِ وَاللَّهُ عِنْدَهُ حُسْنُ الثَّوَابِ} [آل عمران 195]
* وقوله: {وَالَّذِينَ آَمَنُوا وَهَاجَرُوا وَجَاهَدُوا فِي سَبِيلِ اللَّهِ وَالَّذِينَ آَوَوْا وَنَصَرُوا أُولَئِكَ هُمُ الْمُؤْمِنُونَ حَقًّا لَهُمْ مَغْفِرَةٌ وَرِزْقٌ كَرِيمٌ (74) وَالَّذِينَ آَمَنُوا مِنْ بَعْدُ وَهَاجَرُوا وَجَاهَدُوا مَعَكُمْ فَأُولَئِكَ مِنْكُمْ} [الأنفال 74،75]
* وقوله تعالى: {لَقَدْ رَضِيَ اللَّهُ عَنِ الْمُؤْمِنِينَ إِذْ يُبَايِعُونَكَ تَحْتَ الشَّجَرَةِ فَعَلِمَ مَا فِي قُلُوبِهِمْ فَأَنْزَلَ السَّكِينَةَ عَلَيْهِمْ وَأَثَابَهُمْ فَتْحًا قَرِيبًا} [الفتح 18]
* وقوله تعالى: {...فَأَنْزَلَ اللَّهُ سَكِينَتَهُ عَلَى رَسُولِهِ وَعَلَى الْمُؤْمِنِينَ وَأَلْزَمَهُمْ كَلِمَةَ التَّقْوَى وَكَانُوا أَحَقَّ بِهَا وَأَهْلَهَا وَكَانَ اللَّهُ بِكُلِّ شَيْءٍ عَلِيمًا} [الفتح 26]
* وقوله تعالى: {مُحَمَّدٌ رَسُولُ اللَّهِ وَالَّذِينَ مَعَهُ أَشِدَّاءُ عَلَى الْكُفَّارِ رُحَمَاءُ بَيْنَهُمْ تَرَاهُمْ رُكَّعًا سُجَّدًا يَبْتَغُونَ فَضْلًا مِنَ اللَّهِ وَرِضْوَانًا سِيمَاهُمْ فِي وُجُوهِهِمْ مِنْ أَثَرِ السُّجُودِ} [الفتح 29]
* وبشّر الله الصحابة كلهم بالحسنى، وهي الجنة، في قوله تعالى: {لَا يَسْتَوِي مِنْكُمْ مَنْ أَنْفَقَ مِنْ قَبْلِ الْفَتْحِ وَقَاتَلَ أُولَئِكَ أَعْظَمُ دَرَجَةً مِنَ الَّذِينَ أَنْفَقُوا مِنْ بَعْدُ وَقَاتَلُوا وَكُلًّا وَعَدَ اللَّهُ الْحُسْنَى وَاللَّهُ بِمَا تَعْمَلُونَ خَبِيرٌ} [الحديد 10]
* وآيات أخرى كثيرة

* وقوله صلى الله عليه وسلم: (لا تسبوا أصحابي، فلو أن أحدكم أنفق مثل أحُدٍ ذهبًا، ما بلغ مُدَّ أحدهم ولا نصيفه) [رواه البخاري]، ومعنى الحديث: لو أنفق أحدٌ من غير الصحابة مثل جبل أحد من الذهب، لن يبلغ المُدّ الذي أنفقه الواحد من الصحابة، والمُدّ: ملء الكف!
* وقوله صلى الله عليه وسلم: (خير الناس قرني، ثم الذين يلونهم، ثم الذين يلونهم) [رواه البخاري]
* وقوله صلى الله عليه وسلم: (يأتي على الناس زمان يُبعث منهم البعث، فيقولون: انظروا هل تجدون فيكم أحدًا من أصحاب النبي صلى الله عليه وسلم؟ فيوجد الرجل، فيُفتح لهم به... إلى آخره) [رواه مسلم]
* وأحاديث أخرى كثيرة، حتى إن هناك كتب ومجلدات صُنّفت لجمع الأحاديث في فضائل الصحابة وما قاله النبي صلى الله عليه وسلم فيهم عمومًا وفي أفرادهم

وفيما يلي -إن شاء الله- تلخيص لأهم احداث الفتنة، وتلخيص لوجهات النظر المختلفة


عبد الله بن سبأ وأتباعه وبداية الفتنة

* رجل من يهود اليمن، ادعى الإسلام، هو الذي قاد التشيع وعمل على انتشاره خاصة في بلاد فارس والعراق ومصر
* قال بأنه يجب أن يكون رسول الله صلى الله عليه وسلم قد أوصى لأحد من بعده، فكذب على رسول الله صلى الله عليه وسلم، وادعى إنه قد أوصى من بعده لعلي رضي الله عنه وأن عليا أحق بالخلافة من عثمان بن عفان رضي الله عنه، بل ومن أبي بكر ومن عمر بن الخطاب (رضي الله عن الجميع)
* بدأ في نشر بعض المآخذ والسلبيات التي افتراها على عثمان، وجميعها يظهر كذبها بعد البحث والتمحيص
* عاونه الكثيرون في نشر تلك الفتنة، وازداد أتباعه من الجهلة في الكثير من البلدان، زوروا كتبا على ألسنة الصحابة تدعو الناس إلى الخروج على عثمان، وتبرّأ الصحابة مما نُسب إليهم لما بلغتهم تلك الكتب!!
* حاصر هؤلاء المتمردون بيت عثمان بن عفان، ثم قتلوه وهو صائم ويقرأ القرآن
* ظل المتمردون يطالبون عليا بأن يبايعوه كخليفة للمسلمين، وأصر على ذلك كبار الصحابة، حتى رضي علي بأخذ البيعة بعد فترة من الرفض، وكان عليٌّ رضي الله عنه أحق الناس بالخلافة بعد عثمان رضي الله عنه

منذ ذلك الحين اختلف كبار الصحابة والمسلمين في كيفية التصرف مع القتلة في فتنة مقتل عثمان (رضي الله عنه)


وجهة نظر معاوية بن أبي سفيان رضي الله عنه ومن معه (أهل الشام)

* قـُتِل صاحب رسول الله، أحد العشرة المبشرين بالجنة، ذو النورين، خليفة المسلمين، في الشهر الحرام، وأرسلت أم المؤمنين أم حبيبة إلى أخيها معاوية قميص عثمان ملطخًا بالدماء، ومعه أصابع زوجته نائلة اللي قطعت أثناء قتله، كل ذلك وأكثر من ذلك أجج مشاعر المسلمين، حتى قال رسول معاوية لعلي (رضي الله عنهما): (تركت ستين ألف شيخ يبكون تحت قميص عثمان وهو على منبر دمشق)
* حكم القصاص مقدم على حكم البيعة (حسب اجتهاده)، بمعنى أنه لن يبايع الخليفة حتى يُسلّمه القتلة الذين قتلوا عثمان رضي الله عنه، فحتى يُسلمه إياهم فقط: هو متوقف عن البيعة
* قال معاوية أنه لن يبايع من يؤوي القتلة، فقتلة عثمان مندسين في عسكر علي، لذا خشي معاوية إن بايع عليا أن تسنح الفرصة للقتلة أن يظلموهم ويعتدوا عليهم ويضيع دم عثمان
* يجب أن يحرص معاوية على القصاص لأنه ولي الدم (نظرا لقرابته من عثمان) تطبيقا لقول الله تعالى: {وَمَن قُتِلَ مَظْلُومًا فَقَدْ جَعَلْنَا لِوَلِيِّهِ سُلْطَانًا فَلاَ يُسْرِف فِّي الْقَتْلِ إِنَّهُ كَانَ مَنْصُورًا} [الإسراء 33]
* لم يكن معاوية حريصًا على الخلافة أبدًا، ولم يطلبها أصلاً، بل كان يعلم أن الخلافة في كبار الصحابة، خاصة في بقية الستة من أهل الشورى، كما أنه قال عن علي: (إني لأعلم أنه أفضل مني وأحق بالأمر)


وجهة نظر عائشة أم المؤمنين والزبير بن العوام وطلحة بن عبيد الله (رضي الله عنهم) ومن معهم

* كان لهم نفس رأي معاوية رضي الله عنه في البداية
* ورأوا أن القصاص فيه عزة للإسلام
* إلا أنهم قبلوا مبايعة علي رضي الله عنه
* خرجوا إلى البصرة مطالبين بدم عثمان وبالإصلاح بين المسلمين، لكنهم لم يريدوا الحرب أبدا، بل ولم يدُر في ذهن أحدهم حدوث أي قتال!
* استطاع القعقاع بن عمرو التميمي أن يقنعهم بوجهة نظر علي، فوافقوه واتفقوا على رأيه، لكن المتمردين أبوا إلا الفتنة كما سيأتي ذكره إن شاء الله



وجهة نظر علي بن أبي طالب رضي الله عنه ومن معه

* تبرأ علي من دم عثمان ولعن قتلته
* رأى أنه يجب التريث وعدم التعجل في القصاص حتى تستقر الأوضاع ويتملك زمام الأمور، حيث أن قتلة عثمان ومن عاونهم كانوا كثيرين، ولهم قبائل تحميهم وتثور حميتها لأجلهم، والفتنة مازالت قائمة
* رأى أن يعزل بعض الولاة (ومنهم معاوية) ويولي آخرين حتى يهدئ من ثورة المتمردين
* لم يكفر معاوية ومن معه أبدا، بل كان ينهى الناس حتى عن شتمهم، وحتى بعد معركة صفين كان يمر على قتلى الطرفين ويقول: (هؤلاء في الجنة وهؤلاء في الجنة)
* عليّ هو الإمام ومن رفض مبايعته فهو باغٍ وجب قتاله حتى ينقاد إلى الحق ويبايع الخليفة


وجهة نظر معتزلي الفتنة

* التبس عليهم الأمر ولم يتضح الحق، هل الحق في وجوب الإسراع بالقصاص ودعم أهل الشام في مطالبتهم بذلك؟ أم في التسكين والتريث؟
* رأوا عدم الدخول في الفتنة لقول رسول الله صلى الله عليه وسلم: (إنها ستكون فتن، ألا ثم تكون فتنة، القاعد فيها خير من الماشي فيها، والماشي فيها خير من الساعي إليها، ألا فإذا نزلت أو وقعت، فمن كان له إبل فليلحق بإبله، ومن كانت له غنم فليلحق بغنمه، ومن كانت له أرض فليلحق بأرضه)، فقال رجل: يا رسول الله أرأيت من لم يكن له إبل ولا غنم ولا أرض؟ قال: (يعمد إلى سيفه فيدق على حده بحجر، ثم لينج إن استطاع النجاء، اللهم هل بلغت، اللهم هل بلغت، اللهم هل بلغت) [رواه مسلم]
* رأوا أن قتال الفئة الباغية فرض كفاية وليس فرض عين
* رأوا أن الحل قد لا يكون في القتال، بل في الصلح
* كان منهم كبار الصحابة مثل: سعد بن أبي وقاص، أبو موسى الأشعري (شارك في التحكيم)، عبد الله بن عمر، عبد الله بن عمرو (اضطر للخروج طاعة لأبيه عمرو بن العاص، لكنه اعتزل القتال)، أبو هريرة، أبو أيوب الأنصاري، صهيب الرومي، محمد بن مسلمة، سلمة بن الأكوع، عبد الله بن سعد بن أبي السرح


والحق أن عليا كان الأقرب إلى الصواب، وذلك لأسباب وأدلة:

* قال رسول الله صلى الله عليه وسلم: (ويح عمار، تقتله الفئة الباغية) [رواه البخاري]، وكان عمار مع عليّ، وقُتل في معركة صفين التي كان فيها ضد معاوية ومن معه
* قال رسول الله صلى الله عليه وسلم عن الخوارج (الذين خرجوا على عليّ بعد التحكيم): (تمرق مارقة عند فرقة من المسلمين، يقتلها أولى الطائفتين بالحق) [رواه مسلم]، وكان عليّ ومن معه هم الذين قاتلوهم وهزموهم كما سيأتي ذكره إن شاء الله
* هذا لا ينفي أن الصحابة (رضوان الله عليهم) من كلا الطرفين مجتهدون، وقد قال رسول الله (صلى الله عليه وسلم): (إذا حكم الحاكم فاجتهد ثم أصاب فله أجران، وإذا حكم فاجتهد ثم أخطأ فله أجر) [رواه البخاري]، فعلي رضي الله عنه مصيب وله أجران إن شاء الله، ومعاوية مخطئ وله أجر إن شاء الله
* كون إحدى الفرق كانت أقرب للحق والأخرى باغية، فلا ينفي هذا عن الأخرى أن أتباعها من المؤمنين، حيث قال الله تعالى: {وَإِن طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا فَإِن بَغَتْ إِحْدَاهُمَا عَلَى الْأُخْرَى فَقَاتِلُوا الَّتِي تَبْغِي حَتَّى تَفِيءَ إِلَى أَمْرِ اللَّهِ فَإِن فَاءتْ فَأَصْلِحُوا بَيْنَهُمَا بِالْعَدْلِ وَأَقْسِطُوا إِنَّ اللَّهَ يُحِبُّ الْمُقْسِطِينَ}، فقد أثبت الله تعالى أن الطائفة التي بغت هي من المؤمنين، وقد أثبت ذلك أيضا رسول الله صلى الله عليه وسلم حين قال عن الحسن بن علي رضي الله عنه: (إن ابني هذا سيد، ولعل الله أن يصلح به بين فئتين عظيمتين من المسلمين) [رواه البخاري]، ومن المعلوم أن الحسن تنازل لمعاوية عن الخلافة بعد مقتل عليّ رضي الله عن الجميع، وأثنى عليه النبي صلى الله عليه وسلم بذلك، وهذا يعني أنه التصرف السليم، إما وجوبًا أو استحبابًا


موقعة الجمل

* خرجت عائشة ومعها الزبير وطلحة (رضي الله عنهم) ومن معهم إلى البصرة ليتوحدوا مطالبين بدم عثمان وبالإصلاح بين المسلمين، ولم يريدوا الحرب أبدا
* خرج إليهم عليّ وتجمع معه أثناء الطريق 20000 رجل، وقد تجمع مع عائشة 30000
* استطاع القعقاع بن عمرو التميمي أن يقنع عائشة والزبير وطلحة بوجهة نظر علي، فوافقوه واتفقوا على الصلح
* لكن السبئيون (أتباع عبد الله بن سبأ) المتمردون أبوا إلا الفتنة، فانتشروا ليلا في المعسكرين والناس نيام بعد الاتفاق على الصلح، فأعملوا فيهم السيوف حتى ظن كل فريق أن الآخر قد خانه، فدار القتال، وساهم السبئيون في إشعاله أكثر على الرغم من محاولات علي وطلحة في كلا الطرفين أن يوقفوا القتال
* انطلقت عائشة في هودجها على جملها وسط المعركة لتحض الناس على وقف القتال، لكن بلا فائدة، بل تجمع السبئيون حول الجمل يريدون قتل عائشة، حتى أنقذها عليّ حينما أمر بعض المسلمين بعقر الجمل وإخراج هودج عائشة من ميدان المعركة، فلما كان ذلك هدأت المعركة وانتصر علي بعد أن قـُتل الكثير من المسلمين
* قـُتل طلحة بن عبيد الله، فحزن عليه عليّ حزنا شديدا وقال بعد أن كان يمسح التراب عن وجهه: (عزيزٌ عليّ أبا محمد أن أراك مجندلا في الأودية)
* قـُتل الزبير بن العوام، واحتز قاتله رأسه وذهب بها إلى علي يظن أنه يبشره بمقتله، فحزن علي حزنا شديدا وقال: (بشر قاتل ابن صفية بالنار)، وقال لما رأى سيف الزبير: (إن هذا السيف طالما فرج الكرب عن وجه رسول الله)
* أمر علي برد عائشة إلى مأمنها معززة مكرمة بعد أن أعلنا للناس أنه ما كان بينهما إلا ما يكون بين المرأة وأحمائها، وقال علي: (هي زوجة نبيكم في الدنيا والآخرة)
* ندم الكل على تلك الموقعة ندما شديدا


موقعة صفين

* بعد إصرار كل طرف على رأيه، رأى عليٌّ أن يُجبر أهل الشام على المبايعة بالقوة، فسار بجيشه وخرج إليهم
* خرج معاوية بأتباعه من أهل الشام، والتقى الجيشان في منطقة تسمى صفين
* تمت بينهما بعض المراسلات كمحاولات للصلح خاصة حينما دخل الشهر المحرم وتوقف القتال، إلا أن كلا الطرفين كان متمسكا برأيه
* استغل ملك الروم هذا الخلاف وتقدم بجيشه نحو الأراضي الإسلامية، فكتب إليه معاوية: (والله لئن لم تنته وترجع إلى بلادك يا لعين، لاصطلحن أنا وابن عمي عليك، ولأخرجنك من جميع بلادك، ولأضيقن عليك الأرض بما رحبت)
* عامل عليّ الأسرى معاملة حسنة، فكان يعرض على الأسير أن يبايع عليا ويدخل في طاعته حتى يخلي سبيله، فإن أبي أخذ منه حلفه ألا يعود لقتاله، فإن أبى تحفظ عليه في الأسر، لكنه لا يقتله
* قـُتل عمار بن ياسر الذي قال عنه رسول الله صلى الله عليه وسلم: (تقتله الفئة الباغية)، فعلم بعض أتباع معاوية انهم اخطأوا في اجتهادهم، إلا أن معاوية رأى أن عمارا قتله من أتى به من أتباع علي بتشجيعهم له على القتال
* بعدما اشتد القتال وكثر عدد القتلى في الطرفين، دعا الأشعث بن قيس إلى الصلح مخافة أن تفنى العرب، ووافقه معاوية مخافة أن تغير الروم على الشام أو الفرس على العراق، فأمر بربط المصاحف على الرماح إشارة إلى طلب تحكيم كتاب الله، فوافق علي على ذلك، إلا أن قتلة عثمان لم يرضوا بذلك فظهر الخوارج كما سيأتي ذكره إن شاء الله


التحكيم

* اجتمع أبو موسى الأشعري (من طرف علي) وعمرو بن العاص (من طرف معاوية) رضي الله عنهما
* تحاورا كثيرا ولم يصلا إلى شيء عن تقديم البيعة أو القصاص
* فاتفقا على أن يتركا تحديد الخلافة إلى السابقين الأولين من كبار الصحابة، منهم علي، وليس منهم معاوية ولا عمرو لأنهما ليسا من السابقين الأولين
* اتفقا أن يجتمعا في العام المقبل في دومة الجندل، وحتى ذلك الحين يحكم كل من علي ومعاوية فيما تحت يده من الدولة الإسلامية (فمعاوية والي الشام وأميره منذ زمن عمر بن الخطاب)
* رضي الطرفان بهذا الاتفاق



الخوارج

* هم الذين خرجوا على علي رضي الله عنه من قتلة عثمان لرفضهم للتحكيم، فقد كانوا يقاتلون معه في صفين وأبوا إلا القتال
* اخترعوا مقولة: (الحكم لله)، فكانت (كما قال علي) كلمة حق أريد بها باطل
* كفـّروا المسلمين جميعًا، إلا مَنْ وافقهم، وقتلوا عليا بعد ما هزمهم في حروبه معهم، وحاولوا قتل معاوية بن أبي سفيان وعمرو بن العاص
* حذرنا منهم رسول الله صلى الله عليه وسلم حين قال: (يخرج فيكم قوم تحقرون صلاتكم مع صلاتهم، وصيامكم مع صيامهم، وعملكم مع عملهم، ويقرؤون القرآن لا يجاوز حناجرهم، يمرقون من الدين كما يمرق السهم من الرمي) [رواه البخاري ومسلم]


عام الجماعة

* بايع المسلمون بالإجماع الحسن بن علي رضي الله عنه
* بعد ستة شهور من خلافته، تنازل الحسن عن الخلافة لمعاوية رضي الله عنه لجمع شمل المسلمين وتوحيد كلمتهم، فسمي ذلك العام بعام الجماعة
* كان ذلك مصداقا لقول النبي صلى الله عليه وسلم عن الحسن: (إن ابني هذا سيد، ولعل الله أن يصلح به بين فئتين عظيمتين من المسلمين)


بعض القصص والروايات المكذوبة

* أن عائشة (رضي الله عنها) حرضت الناس على قتل عثمان، وقد بلغها ذلك فيما بعد وتبرّأت منه
* أن عليا رضيَ بمقتل عثمان
* أن عائشة خرجت على عليّ وأرادت الحرب
* أن الزبير بايع عليا والسيف على رقبته، أي يزعمون أنه أُجبر على البيعة
* أن معاوية خرج على عليّ لطلب الخلافة
* أن عمرو بن العاص خدع أبو موسى الأشعري في التحكيم بخدعة الخاتم الشهيرة
* أن عليا ومعاوية أخذ كل منهما يلعن ويدعو على الآخر حتى في الصلوات




الخاتمة

{"تِلْكَ أُمَّةٌ قَدْ خَلَتْ لَهَا مَا كَسَبَتْ وَلَكُم مَّا كَسَبْتُمْ وَلاَ تُسْأَلُونَ عَمَّا كَانُواْ يَعْمَلُونَ}
تلك دماء طهر الله أيدينا منها، أفلا نطهر بها ألسنتنا؟
قتال شهده الصحابة وغبنا عنه، وقد علموا وجهلنا، واجتمعوا فاتبعنا، واختلفوا فوقفنا
من عقيدتنا (أهل السنة والجماعة) ألا يذكر أحد من الصحابة إلا بأحسن ذكر، والإمساك عما شجر بينهم، فهم أحق الناس بحسن الظن
فقد شهدوا المشاهد والغزوات مع رسول الله صلى الله عليه وسلم، وشهد لهم بالإيمان، ونحن نتقرب إلى الله بحبهم كما أمرنا
فالخلاصة أنهم معذورون، إما مجتهدون مصيبون، وإما مجتهدون مخطئون

قال الله تعالى:
{مُّحَمَّدٌ رَّسُولُ اللَّهِ
وَالَّذِينَ مَعَهُ أَشِدَّاء عَلَى الْكُفَّارِ رُحَمَاء بَيْنَهُمْ
تَرَاهُمْ رُكَّعًا سُجَّدًا يَبْتَغُونَ فَضْلًا مِّنَ اللَّهِ وَرِضْوَانًا سِيمَاهُمْ فِي وُجُوهِهِم مِّنْ أَثَرِ السُّجُودِ ذَلِكَ مَثَلُهُمْ فِي التَّوْرَاةِ
وَمَثَلُهُمْ فِي الْإِنجِيلِ كَزَرْعٍ أَخْرَجَ شَطْأَهُ فَآزَرَهُ فَاسْتَغْلَظَ فَاسْتَوَى عَلَى سُوقِهِ يُعْجِبُ الزُّرَّاعَ لِيَغِيظَ بِهِمُ الْكُفَّارَ
وَعَدَ اللَّهُ الَّذِينَ آمَنُوا وَعَمِلُوا الصَّالِحَاتِ مِنْهُم مَّغْفِرَةً وَأَجْرًا عَظِيمًا
}
[الفتح 29]




المصادر

* كتاب حقيقة الخلاف بين الصحابة - دكتور علي محمد الصلابي
* موقع قصة الإسلام http://www.islamstory.com - دكتور راغب السرجاني
* كتاب يا أهل السنة خذوا حذركم - الشيخ عبد الرحمن يعقوب


مراجع للتوسع

* منهاج السنة النبوية - شيخ الإسلام ابن تيمية
* العواصم من القواصم - القاضي ابن العربي
* كتب العقيدة بصفة عامة
* كتب فضائل الصحابة

الموبايل بيرن؟



(المكان: أحد المساجد أثناء إحدى صلوات الجماعة)

أحد المصلين: سبحان ربي الأعلى، سبحان ربي الأعلى، سبحان ربي الأعلى
الله أكبر
بسم الله الرحمن الرحيم
الحمد لله رب العالمين


(صوت عالي لأغنية "أسماء الله" لسامي يوسف)

استمرت شفتا المصلي تتحركان بقراءة سورة الفاتحة
لكن في أعماق قلبه حوار آخر
حوار بينه
وبين نفسه

* ايه ده؟ الأغنية دي من الموبايل بتاعي ولا ايه؟
* آه، مش قلت لك اقفل الموبايل قبل الصلاة
* أيوة بس ما كنتش متوقع ان حد يتصل بيّ دلوقتى، موقف محرج جدا جدا
* قدر الله وما شاء فعل، طلع الموبايل من جيبك بقى واقفله
* ايه؟ بتقول ايه؟ أطلع الموبايل ازاي وانا باصلي؟؟؟
* ايه المشكلة يعني؟ مسكوف من الفضيحة ولا ايه؟
* مش كده، بس ما ينفعش أتحرك في الصلاة
* مين قال كده؟ هو انت لما بتحب تهرش ولا تهش دبانة مش بتتحرك؟
* أهه اللي كان بيتصل قفل خلاص الحمد لله
* طب ما هو ممكن يتصل تاني، طلع الموبايل واقفله فورا
* لا لا، ان شاء الله مش هيتصل

(نفس الصوت العالي لأغنية "أسماء الله" لسامي يوسف)

* مش قلت لك، خلـّصنا بقى وطلع الموبايل
* ما قلنا ما ينفعش أتحرك في الصلاة إلا للضرورة
* وهو فيه ضرورة أكتر من كده؟ أولا الحركة البسيطة لا تبطل الصلاة، ثانيا هو انت عشان ما تتحركش في الصلاة تقوم تضيع خشوع الناس دي كلها؟
* وبعدين ماهي أغنية دينية يعني، مش حاجة وحشة
* مش هنتكلم دلوقتى عن الأغاني ولا الموسيقى ولا حتى المتبرجات اللي كان سامي يوسف مطلعهم في الكليب بتاعه، لكن أي صوت عالي حتى لو كان دعاء بصوت العجمي بيشغل المصلين
* طب يعني رأيك أطلع الموبايل عادي؟ طب افرض كان حد مهم بيتصل بي، ما ينفعش "أكنسله"ـ
* انت بتهرج؟؟؟ يعني تضيع خشوعك وخشوع الناس دي كلها عشان واحد بيتصل بيك وقت الصلاة؟ دي غلطته اصلا إنه يتصل في وقت زي ده
* طيب طيب، استنى لحظة بس
* أستنى ايه؟
* استنى بس

(صوت الإمام: السلام عليكم ورحمة الله، السلام عليكم ورحمة الله)

(عودة مرة أخرى لمتابعة شفتا المصلي)

السلام عليكم ورحمة الله، السلام عليكم ورحمة اللـ... ألو
باشا
عامل ايه؟ أخبارك؟
لا أبدا ولا مشغول ولا حاجة

Thursday, May 29, 2008

موضة مقاطعة البضائع






استكمالا لتدوينة: الناقة الثائرة


انتشرت في الآونة الأخيرة "موضة" المقاطعات لدول كل من هب ودب من أحاد المسيئين للديننا؟


على سبيل المثال، حينما سمعنا عن العضو البرلماني الهولندي "جيرت فيلدرز" الذي نشر فيلمه "فتنة" للإساءة إلى القرآن الكريم، فعلى الرغم من اعتذار الحكومة الهولندية، وحظرها لعرض الفيلم حتى اضطر "فيلدرز" هذا إلى نشر فيلمه عبر الانترنت
مزيد من التفاصيل
على الرغم من كل هذا بدأت تتعالى الأصوات منادية بمقاطعة بضائع الحكومة الهولندية


أهذا هو التصرف الحكيم من المسلمين؟ نقاطع دولة، ونتسبب في ضرر لمصالحها ومصالح رجال أعمالها، لمجرد فعل عقيم فردي على الرغم من اعتذار الحكومة؟ أهكذا كانت تصرفات النبي (صلى الله عليه وسلم) في تلك المواقف؟
هل نقض عهوده (صلى الله عليه وسلم) مع اليهود أو أمر بمقاطعة بضائعهم لمجرد إساءات الشاعر اليهودي "كعب بن الأشرف" من بني النضير (قبل جلائهم عن المدينة)؟ أم أنه أمر صحابته فقط بقتله، دون قطع العلاقات السياسية أو الاقتصادية بيهود المدينة
هل نقض (صلى الله عليه وسلم) صلح الحديبة مع قريش لمجرد إساءة "عبد الله بن السرح" (قبل أن يدخل الإسلام في المرة الثانية)؟ أو لمجرد إساءات قينتين لـ"عبد العزى بن خطل"؟ أم أنه اكتفى بإهدار دمائهم يوم فتح مكة، دون أن يتسبب في عرقلة الهدنة وصلح الحديبية


ثم أكلما تجرأ كافر بالإساءة لديننا، قاطعنا بضائع دولته حتى وإن تقدمت الدولة باعتذارات رسمية؟ هذا والله يشوه صورتنا أكثر


جدير بالذكر أن النبي (صلى الله عليه وسلم) لم يأمر بقتل ولا بإهدار دماء هؤلاء إلا بعد أن تجاوزوا الحدود وخاض بعضهم في أعراض أمهات المؤمنين، وأثاروا حمية الكفار للتجمع والتوحد لاستئصال شأفة المسلمين، فكان لهؤلاء خطر إعلامي كبير، كما أنه (صلى الله عليه وسلم) لم يأمر بإهدار دم إلا عدد محدود من المسيئين يعد على الأصابع


ولو قال قائل: إننا نقاطعهم ليفرضوا قوانينا تعاقب على الإساءة للأديان، إذن فلنقاطع بضائع دولنا العربية التي تحتضن المسيئين لديننا من جلدتنا أمثال "أسامة أنور عكاشة" و"عادل إمام" وغيرهم الكثيرين من المسيئين لديننا ولكل ماهو متعلق بالدين، إما بالسب وإما بالسخرية والاستهزاء


هذا بالإضافة إلى أن بعض الذين يقاطعون البضائع الهولندية، لا يجرؤون على النداء بمقاطعة البضائع الأمريكية لاحتلالها للعراق، أو لدعمها لإسرائيل، أو حتى للإساءات التي تعرضت لها بعض المصاحف منذ بضع سنين في جوانتانامو، أو المصاحف التي استخدمها أحد الجنود الأمريكيين في العراق كأهداف للرماية مؤخرا
فمالهم، كيف يحكمون؟


نرى أنه علينا مقاطعة بضائع الدول والحكومات التي تقتل إخواننا، أو تغتصب أراضينا، أو تسيء إلى ديننا رسميا وعلنا، كما فعلت الدنمارك التي أقرت تلك الإساءات
أما أن نقاطع بضائع دولة ما بسبب إساءة بعض المنتمين إليها على الرغم من اعتذارات الحكومة، فهذا يعود بالضرر على صورة الإسلام، وليس هذا من أخلاق النبي (صلى الله عليه وسلم) في شيء
فلنلتفت إلى ما هو أهم، ولندعهم "يشتمون مذمما"
فالكلاب تعوي والقافلة تسير


لمزيد من التفاصيل أدعوكم لقراءة: الناقة الثائرة











حكايتي مع الفيس بوك




Facebook

كلمة بقيت باسمعها كتير اوي اوي، وعلى طول الكلام عنه في كل حتة، وكل الناس عمالين يسألوني: "انت لسه ما عملتش اكاونت ع الفيس بوك؟"، يعني كان ناقص ألاقي عم محمد البواب بيسألني: "انت ليه مش عامل اكاونت ع الفيس بوك؟"ـ


قعدت أسأل ناس كتير عن أي فايدة ممكن اطلع بيها من السايت العجيب ده، مع ان اخويا قعد يشرح لي شرح مفصل للحوار، ومع ان فيه ناس قالوا لي انه ممكن بطريقة ما يفيد عم متولي

ومع ان موضة الاضرابات العقيمة بتاعت اليومين دول مش بتطلع الا من هناك، بس برضه مالاقيتش حاجة مفيدة خالص


المهم اني في الاخر اتخذت القرار، وقلت اشوف الاختراع ده فيه ايه، اشتركت في الفيس بوك، وبدأت اسكشف عالم جديد من الانبهار اللا إرادي


دخلت على الفيس بوك، وفوجئت بيه بيقول لي: انت فين؟ تعالى الحق فيه كذا واحد مستنيك هنا، قلت ايه ده؟؟؟ ده الفيس بوك يعرفني من زمان بقى وانا مش واخد بالي، عادي كان مخزن ايميلي عشان الناس اللي بتبعت لي invitations


مسخرة جدا بقى لما اجي اقبل صديق جديد يقول لي: Osama and Folan are now friends، يا حلاوتنا، حسسني اني لابس كاسكيتة وفي بؤي مصاصة وعمال اقول لفلان ده: كابتن كابتن، ممكن نبقى اصحاب؟ طب ممكن لفة بالعجلة؟، ده غير اني كل ما اجي اضيف صديق الاقيه يقول لي اكتب الكلمتين دول، ويجيب لي كلمتين غير مقروئين بالعين البشرية اصلا، واقعد اقول له هات لي غيرهم طيب، لحد ما أعرف أجيب واحدة منهم بالشبه كده


دخلت بقى على صفحتي الرئيسية، واتفاجئ بصورة كبير لإليسا، من أولها كده؟؟؟ وتحتها كمان كام واحدة من اياهم، وفوق كل واحدة مكتوب: Folan has become a fan of Folana، ده غير اني ممكن الاقي فيديوهات وصور اباحية حاططها فلان او علان، طبعا اي حد من نوعية الناس دي كنت باشيل اسمه من قائمة الاصدقاء على طول، انا ناقص تلوث بصري؟


"da yadoll enak bgd hate2fel el account kaman 30 min as a maaaaaaaaaaaaaaax"
دي كلمة قالها لي واحد صاحبي، والظاهر ان كلامه ممكن يكون صح، على العموم لسه مش عارف، لما نشوف ربنا يستر


طبعا لازم بقى كعادتي اتتريق شوية على الفيس بوك ده، من الحاجات المؤثرة جدا اللي شفتها جملة كالتالي: Folan gave a sweet kiss to 3ellan، يا فرحة طنط تيتي بيكم، طب وانا مالي؟؟؟، وزي كده بقى حاجات كتير، وعند ناس كتير جدا في صفحاتهم الاقي gifts، فلان جاب لي قلب، وفلانة اديتني دبدوب، وعلان اداني قـُلة، وعلانة ادتني بوسة
(ده مثلا مثلا يعني، انا شخصيا ماعنديش حوار الهدايا ده الحمد لله)


حاولت أشوف ازاي أتحكم في الحاجات دي زي ما واحد صاحبي نصحني from Preferences، بس لاقيت الموضوع كبير كبير كبير، والظاهر إنها مش هتنفع في الآخر


من الحاجات اللي عجبتني الى حد ما، حوار الشخبطة ع الحيطة ده، مصداقا لقول الفنانة القديرة "شخبط شخابيط"، (ملحوظة: اكيد انا مش باسمع الحاجات دي، هم اللي بيحكوا لي)، فممكن اقعد اكتب حاجات، وناس تكتب لي حاجات، مسخرة جدا بقى لما حد يكتب لي حاجة والاقي مكتوب تحت كلامه: Write on Folan's Wall، اللي هو يعني نظام زي ماهو شخبط لك على حيطتك، روح بقى شخبط له على حيطته، واللي بيته من إزاز.. قصدي اللي حيطته ع الفيس البوك، ما يشخبطش للناس ع الحيطان، لا مش كده وبس، ده بقى فيه: fun wall, super wall, .. etc.، بالمناسبة أعتقد من بعد حوارات الاضرابات دي الظاهر ان الحيطان فعلا بقى ليها ودان
D:


ابتديت بقى أعدي على صفحات أصحابي أما أشوف فيها، طبعا زي ما قلت قبل كده معظم الحاجات اللي محطوطة من نوعية gifts, super wall, graffiti, dates, hugs, ... etc، سيبكم من التفاهة، المشكلة الأكبر في الناس اللي صفحاتها مليانة حاجات من دي كتير، بتتقل الجهاز عندي اوي اوي وساعات كان بيهنج معايا


من أكتر الحاجات اللي خنقتني في صفحات كثير من الناس جملة زي دي: "Interested In: Women"، ليه ياخويا؟ بتحب على روحك؟ ولا خلاص الواد داخل الفيس بوك وكل همه انه يضبط بنات؟، نأسف على الأسلوب ده، بس الشباب التعبان ده يغيظ بصراحة، ربنا يعافينا، رب اهد قومي


المهم اني قلت لازم نبتدي نشوف حاجة جد بقى، تعالوا معانا نعدي على الجروبس، خاصة الجروبس الدينية، وفجأة (وش واحد مخنوق ومحبط) الاقي بقى جروبس وموضوعات كالتالي
"الفيشاوي شاف النبي (صلى الله عليه وسلم) في المنام وبيقول لكم انشروا الرسالة دي 25 مرة (جديدة حكاية الفيشاوي دي)"
"تعالوا نجمع 10,000,000 واحد بيحب ربنا"
"صورة جديدة فيها استهزاء، فلازم نقاطع كوكا كولا"
دي أمثلة على الحاجات اللي شفتها من اول كان نظرة كده، طبعا لما شفت الجهل والسطحية والدماغ الفاضية، حسيت بحاجة ماسة تدعوني لاستدعاء صديقي "متولي هايزمان"
هيتعب اوي اوي متولي معانا هنا الظاهر، الله المستعان


اعتقد كفاية كده كلام بقى، اكيد طبعا كل شوية الاقي حاجات عجيبة تظهر لي، مين عارف، يمكن لو جمعت شوية حاجات تانية كده أبقى أكتبها إن شاء الله








Thursday, May 15, 2008

مساعدات خارجية




السلام عليكم


من غير مقدمات، وبمناسبة الامتحانات، اقرأ الحوار ده



ايه حكم الغش فى الامتحانات؟
طب ما انت جاوبت على نفسك، انت سميته غش

لا هو مش غش يعنى
طب هو ايه، استعانة بصديق؟

لا أصل أنا أعرف إن الغش ده بيبقى فى التجارة والحاجات دى بس
طب انت جبت الكلام ده منين، حد أفتاك الفتوى دى ولا انت جبتها من عندك؟
الغش معروف، فى أى حاجة اسمه غش، وحتى لو اتغير اسمه فهو ما زال غش
أنا عن نفسى ما أعرفش عالم أو مفتى أجاز الغش فى الامتحانات، لو انت تعرف هات لى الفتوى
ملحوظة: من أسباب تحريم الكوتشينة مثلا انها بتدعو الناس للغش، وماتقولش لا، انا عارف الحتة دى أكتر منك


طب هو الغش هنا غلط ليه؟ ما أنا باخد المعلومة من صاحبى وهو راضى، أو أنا باغش من ورق معايا، يعنى مش باخد حق حد ولا باضر حد
ماهو لو صاحبك ده راضى، فباقى الدفعة مش راضية
الواحد ما يرضاش إن حد يجيب درجات أعلى منه بالغش
يعنى هو يتعب ويذاكر وانت تجيب أعلى منه بالغش؟؟؟
والمصيبة تبقى أكبر لو النتيجة دى حددت مصيرك في كلية معينة أو قسم معين أو كده
ساعتها اللى اتظلم ده مش هيسامحك وهتتحاسب قدام ربنا


طب لو الدفعة كلها عارفة وكلهم بيغشوا؟
ده مابيحصلش، ناس كتير مش بتغش، ولازم تلاقى ولو واحد بس على الأقل مش بيغش ومش راضى عن غشك

طب افترض جدلا ان الدفعة كلها راضية؟
يبقى المراقب مش راضى وانت كده بتغشه

طب لو المراقب راجل محترم وسايبنا نغش؟
هو كده يبقى محترم؟؟؟
على العموم ساعتها يبقى الدكتور اللى بيصحح مش راضى وانت كده بتغشه


طب لو اتأكدنا إن الدكتور راضى؟
يبقى العميد اللى هيديك شهادة إن شاء الله بإنك ناجح مش راضي وانت كده بتغشه
ده غير انك كده ممكن تنجح وانت ما تستاهلش النجاح ده
وتشتغل شغلانة وانت ماتستاهلش الشغلانة دى


طيب طيب، بس يعنى لما أنا أنسى معلومة وربنا يبعت لى واحد هدية عشان يقولها لى، ارفض النعمة دى؟
وانت ليه اعتبرتها نعمة؟ ده ابتلاء ربنا حطك فيه عشان يختبرك ويشوفك هتغش ولا لأ

طيب يعنى أنا لو مذاكر كويس بس نسيت معلومة فى الامتحان، ليه ما اخدهاش من حد، ما أنا مذاكرها أصلا كويس؟
لأ ما هو انت لو مذاكر أصلا كويس ما كنتش نسيتها
وبعدين الموضوع هيبقى ظيطة كده، كل واحد يبص مثلا فى القوانين قبل الامتحان مرة واحدة ويقول ما أنا ذاكرت كده كويس
هو شايف انه ذاكر كويس، لكن ييجى فى الامتحان يلاقى نفسه ناسى اللى كان كَرْوِتُه ده، فيطمن لأنه هيغشه
طب دى هتحددها ازاى دى بقى


ماهو احنا بقى من الاخر كده بناخد حاجات مالهاش لزمة وحشو على الفاضى، ليه اتعب نفسى فى الحاجات دى؟
أولا مش انت اللى تحدد اذا كان اللى بتاخده ده مفيد ولا لأ، فيه ناس بتفهم أكتر منك فى المجال ده
وبعدين حتى لو فيه حاجات مش مهمة، يعنى كل اللى انت بتاخده مالوش لزمة؟ ولا حاجات بسيطة هى اللى ممكن تكون مش مهمة؟
طيب انت بقى ساعتها هتقعد تحدد الحاجات اللى مهمة ماتغشهاش، والحاجات اللى مش مهمة تغشها؟
ولو افترضنا جدلا ان 100% من اللى انت بتاخده ده مالوش لزمة، طب ايه اللى دخلك الكلية دى أصلا؟؟؟
انت دخلتها بكامل قواك العقلية، ورضيت بشروط الكلية، يبقى انت لازم كمسلم انك تحافظ على الشروط دى، وإلا تبقى بيغش الكلية


وبعدين بقى ماهو الدين يسر برضه، وربنا غفور رحيم
هو عشان الدين يسر يبقى نغش عادى كده؟؟؟
هو عشان ربنا غفور رحيم يبقى نعصيه عادى كده؟
ده بدل ما نشكره على انه سبحانه وتعالى غفور ورحيم بنا؟


خلاص يا عم خلاص، ده انت سودتها فى وشى
طب انا اسف جدا، انسى كل الكلام اللى فات ده وحط فى دماغك حاجة واحدة بس
حبك لربنا وخوفك منه سبب كافى يخليك ماتغشش






صدق أو لا تصدق

احنا دلوقتى فى القرن الواحد والعشرين الميلادى يعنى الألفية التالتة
والقرن الخامس عشر الهجرى يعنى الألفية التانية
ومع ذلك لسة فيه ناس بتغش فى الامتحانات
! ! !


دلوقتى الانسان وصل للقمر
والعالم أصبح قرية صغيرة
وبقينا فى عصر الانترنت والموبايل والـFacebook
ومع ذلك لسة فيه ناس بتغش فى الامتحانات
! ! !


الواحد وقت الامتحانات بيبقى عايز ان ربنا ينجحه ويوفقه
وبيبقى متعلق بربنا قوى وعمال يدعى كتير كتير
ومع ذلك لسة فيه ناس بتغش فى الامتحانات
! ! !


الواحد بيقول انه بيحب ربنا وعايز يرضيه
سواء فى الامتحانات او فى غيره
ومع ذلك لسة فيه ناس بتغش فى الامتحانات
! ! !


دلوقتى لو رحت لواحد وقلت له: من غشنا
هيقول لك من غير تفكير: فليس منا
الناس حفظت الحديث زى اسمها، زى اسمها فعلا
قارن كده بين حفظك لاسمك الرباعى وبين حفظك للحديث
ومع ذلك لسة فيه ناس بتغش فى الامتحانات
! ! !


ارجو ان المعنى يكون وصل
يكون وصل بجد
من القلب للقلب
ربنا يوفقنا كلنا فى الامتحانات ويرضى عننا
ومع ذلك لسة فيه ناس بتغش فى الامتحانات
! ! !


جزاكم الله خيرا
والسلام عليكم









Monday, April 28, 2008

الأفلام الإسلامية




السلام عليكم


من المواضيع الخفيفة السريعة اللي كان نفسي اتكلم فيها
مواضيع "الأفلام الإسلامية" كما يزعمون
والأخطاء العديدة اللي بتبقى فيها
وآثارها البشع على فكر الناس


زمان الواحد وهو صغير، كان يقعد يتفرج على الفيلم منهم، وهو فاكر ان هو ده كده الدين، هي المعلومات دي كده صح اكيد
لكن لما الواحد (بفضل الله) ابتدى يفهم شوية، عرف ان الحاجات دي فيها هجس كتير
يعني مثلا...


نبدأ بالفيلم الشهير الرهيب اللي كنت باعتبره أفضل الأفلام الإسلامية
الشيماء
فيلم يحسسك إن اللي مألف قصته ده واحد ما يعرفش عن السيرة النبوية إلا اللي سمعه من حواديت جدته
مبدأيا الشيماء (رضي الله عنها) لم يرد عنها إلا أنها كانت أخت النبي (صلى الله عليه وسلم) من الرضاعة
وكانت من السبي في غزوة حنين
فلما عرفت نفسها للنبي (صلى الله عليه وسلم) بعلامة معينة، أكرمها ومن عليها فردها إلى قومها
ده كل اللي ورد على حد علمي

أما بقى عشان نلاقيها موجودة من بداية البعثة

ونلاقيها بتغني مع الهجرة "لقد نجا لقد نجا"
وانها كانت بتعرف تكشف المنافقين في مكة (مع إن النفاق لم يظهر أصلا إلا في المدينة بعد غزوة بدر)
وانها راحت للنبي (صلى الله عليه وسلم) يوم الفتح، وقالت له: دول برضه أعمامك وأخوالك، فاعف عنهم
كل ده هجس


فيلم تاني بتاع ماجدة تلاقي فيه قصة حب بين اتنين من الصحابة
وفي نص الفيلم الصحابية تتعمي من التعذيب
ومع الهجرة تقعد تقول: أبصرت بنور محمد، أبصرت بنور محمد
كل ده وحبيبها الصحابي واقف جنبها واخد بايدها


فيلم غيره تلاقي فيه المشركين عمالين يتناقشوا وهم متضايقين
يقولوا: نعمل ايه؟ أسلم أبو بكر الصديق، وأسلم عمر بن الخطاب، وأسلم عثمان بن عفان
لاحظوا إنهم خايفين منهم عشان الشخصيات الثلاثة دول شخصيات لها ثقل في مكة
لاحظوا بقى إن أصلا عمر بن الخطاب أسلم بعد أبي بكر وبعد عثمان بـ6 سنين، يعني المفاجأة ماكانتش في نفس الوقت
الجميل بقى ان دخل واحد يقول ينقل لهم خبر جديد ومرعب: أسلم علي بن أبي طالب!!!
طب هو ايه المرعب في اسلام على بن ابي طالب اللي كان لسه صبي
مع العلم ان على بن ابي طالب اسلم برضه قبل عمر بن الخطاب بـ6 سنين، بس الظاهر اللي نقل الخبر ده كان لسه واصل له الخبر متأخر
هو الظاهر ان المؤلف حب يرص لنا الخلفاء الراشدين كلهم وخلاص، يمكن لو كنا استنينا شوية كنا لاقينا واحد داخلي يقول: أسلم عمر بن عبد العزيز!!!


سيبنا من الحتة اللي تلخبط دي
اللي يضحكك بقى لما تلاقي واحد مشرك في فيلم يقول لعمرو بن هشام: يا أبا جهل
هم الكفار كانوا بيقولوا له "أبو جهل"؟ هم كانوا عارفين انه أبو الجهل فعلا يعني؟ وهو كان راضي وساكت، عادي أصحابه بيهزروا معاه ولا ايه؟
الاسم ده النبي (صلى الله عليه وسلم) أطلقه عليه لكفره وعناده، لكن الكفار كانوا يقولوا له "أبو الحكم"


فيلم غيرهم عن أبرهة ومحاولة هدم الكعبة
لازم برضه تلاقي قصة حب في الفيلم وخلاص، بس ده كان فيلم قديم بقى أيام عمر الحريري في شبابه ومش عارف دي كانت اسمهان ولا ايه، المهم واحدة من ممثلات الإغراء بتوع الخمسينات
والظاهر انها ماقدرتش تتخلى عن الاغراء حتى في فيلم عن أصحاب الفيل
وطبعا مافيش مانع تلاقي لغة عربية ضايعة، تلاقي واحد يقول: أجل خزني إليه، لاحظ ان مافيش تعطيش للجيم، و"خزني" بالـ"ز" مش بالـ"ذ"، اللي قال كده كان حسين رياض، بتاع انت اللي هتغني يامنعم


طبعا مافيش مانع نذكر بالمرة فيلم قطز وجهاد اللي كانوا بيحبوا في بعض تحت السلم
ده غير ان موضوع الحجاب ده ماكانش في بالهم اوي يعني


طب بلاش
خلونا نتكلم كلام عام شوية
جميل جدا جدا انك تلاقي صحابي بـ"سكسوكة"، أو حالق ذقنه قبل ما يصور المشهد ومضبطها تمام، عشان يبقى صحابي حلو ونضيف كده
لكن الكفار كلهم بلحى جامدة كده
وبعدين لازم المسلمين دايما دايما يلبسوا أبيض في أبيض، والكفار يلبسوا ألوان، ولما واحد من الكفار يسلم، يقوم يلبس أبيض على طول
ومسخرة اوي لما يجيب لك الكافر ريحته وحشة على طول، ولما واحد يشم ريحته فيلاقيها بقت كويسة، يقول له: انت اسلمت ولا ايه؟؟؟
يا حلاوة، معلش اهبل انا بقى
وبعدين لما ييجي يجيب لك الكفار والفساد اللي كانوا فيه، لازم يجيب لك رقاصة، او اكتر، وتقعد انت بقى تتفرج على الرقاصة، في سبيل الله طبعا، عشان تستشعر قد ايه الاسلام ده نور، وهو اللي خلصننا من الفساد ده، بص كده اتفرج على الفساد
أما لما ييجي يجيب لك المسلمين، فلازم يجيب لك واحد طيب اوي اوي، وغلبان، وسهتان، وميت على روحه، وبيتكلم بابتسامة بلهاء
ويا سلام بقى لما يجيب لك اتنين بيتكلموا مع بعض بالفصحى، الظاهر ان الممثلين مش متعودين على الفصحي ولا ايه، اصلك تلاقي مشهد مثلا كالتالي
الاول (ببطئ شديد): السلام عليكم ورحمة الله وبركاته
الثاني (ببطء برضه): وعليكم السلام ورحمة الله وبركاته
الاول: كيف حالك يا ابن ابي شخلعة
الثاني: بخير حال والحمد لله يا ابن فلتعة،
الاول: ماذا كنت .... مش عارف ايه
طبعا انت على ما تسمع للحوار البطئ الممل ده، تكون نسيت اصلا هو كان ايه الموضوع، وتكون زهقت اصلا من اللغة العربية ومن اللي بيتكلموها


آخر حاجة
انا مقتنع بالفتوى اللى تحرم تمثيل أدوار الصحابة في الأفلام والمسلسلات، مش مجرد الأنبياء بس
لأن فعلا ليها تأثير سلبي، بتخلي الواحد يربط دايما بين الصحابي الفلاني، وبين الممثل العلاني
يعني انا مثلا للأسف، كل ما افتكر حمزة بن عبد المطلب، افتكر شكل عبد الله غيث، كل ما افتكر أبو سفيان، افتكر شكل حمدي غيث، كل اما افتكر سمية، افتكر سناء جميل النصرانية (على حد علمي)ـ
فده شيء مش كويس ان صور الصحابة ترتبط في اذهاننا بصور الممثلين دول


بس كفاية كده رغي بقى
الموضوع طول منى اوي بصراحة
بس اديني وصلت لكم اللي كان جوايا











Wednesday, April 2, 2008

الناقة الثائرة




مش ممكن الجهل ده


واحد عضو برلماني في هولندا
عرض فيلم قصير أهبل على النت
والحكومة كانت منعته من النشر
وتبرأت منه واستنكرته
مزيد من التفاصيل
إذن...


لازم لازم لازم نقاطع الحكومة الهولندية مزيد من التفاصيل
ونطرد سفير هولندا مزيد من التفاصيل
ونطلع اشاعات على ناس ماتت محروقة في هولندا مزيد من التفاصيل
وماحدش يتفرج على فيلم "همام في امستردام"ـ
ونعمل تصويت في السايت الهولندي اللي كان من شوية بيقول للمسلمين: ارحمونا كفاية تصويت بالغلط مزيد من التفاصيل
ونعمل فوروود كتير، عشان نفضل محافظين على مستوى السطحية مزيد من التفاصيل


وسلم لي على متولي هاينزمان مزيد من التفاصيل


رب اهدِ قومي



وبعدين يا فرحتي لما الهولنديين يخافوا على زعلي، عشان مصالحهم
لكن مايحترمونيش
زي الجمل الهايج بالضبط
اخاف منه، لكنه في النهاية جمل، حيوان بنركبه


استفدنا إيه لما الحكومة الهولندية منعت الفيلم وفي المقابل الشعب الهولندي تأكد عن يقين إن الإسلام دين عنف وقتل حتى مع اعتذار الحكومة
أنا اعتقد الإساءة تتنشر ونسيبها تتنشر أكثر، وفي الاخر الناس تسمع فعلا عن الإسلام والعقلاء يبحثون عن الحقيقة
أحسن من إن الناس تخاف على زعل الجمال الهائجة
زي ما النبي صلى الله عليه وسلم كان بيسيب كفار مكة ينفـّروا أفواج الحجاج منه، وعمره ما تصدى لهم بالعنف أبدا (وقت الاستضعاف في مكة)ـ
فكانت النتيجة إنه ذاع صيته والناس عرفته، ودخل الإسلام واحد زي الطفيل بن عمرو (رضي الله عنه)، اللي جاب وراه قبيلة دَوس كلها مسلمة


والمصيبة إنهم من اندونيسيا كمان، يعني مش عرب بس
لا الموضوع بقى خاص بالمسلمين فقط
إذن الاسلام يدعو إلى الجهل والثورة والقتل وكبت الحريات
ولا يراعي الاعتذارات، ولا يدعو إلى التثبت من الأخبار
هي دي الصورة المنطقية اللي ممكن توصل لأي واحد غير مسلم
ولا نلومهم بصراحة
أنا شخصيا لو رجل أعمال هولندي، وتجارتي في الدول الإسلامية أو العربية خسرت بسبب الجهل ده، كنت هأنتج فيلم كرتون قصير بعنوان "الناقة الثائرة"ـ


يمكن حد دلوقتى يفتكرني برضه (زي ما قيل قبل كده) إني مش مسلم ولا عربي وعايز أتتريق على المسلمين وخلاص
لا والله، بالعكس، ده يعتبر نقد لاذع للذات
عشان فعلا كده تجاوز للحدود الشرعية والعقلية والمنطقية والأخلاقية


رب اهدِ قومي


تحديث:ـ
جار البحث والتفكر في وجهة النظر الأخرى
لأن فيهم بعض العقلاء اللي بيقولوا كلام شبه منطقي







ماهو لازم كلاكس




كان فيه حاجة صغيرة كده نفسي أقولها
دار بيني وبين بعض الناس نقاش بسيط حول موضوع كلاكسات العربيات
موضوع الدوشة والصداع ولازم نقلل ولازم نعمل ونسوي وهكذا
بس انا بصراحة ضد منع او تقليل الكلاكسات
في إسكندرية مثلا علامات كتير ممنوع استخدام الكلاكس، وجرب القيادة بدون "مش عارف اسمه ايه بالفصحى"ـ
لكن انا ضد الكلام ده هنا في مصر تماما
رأي غريب مش كده؟
بس اي حد بيعرف يسوق هيحس بيّ ان شاء الله لما يعرف وجهة نظري


عندنا في مصر معظم الناس في الشارع تحس انهم سكرانين
نادرا ما بتلاقي حد ماشي محترم في الحارة بتاعته
صلاح سالم مثلا 4 حارات، والعربيات بتمشي فيه 5 صفوف
ولو الشارع فاضي شوية، تلاقي واحد فاكر نفسه ماشي في الصحرا لوحده
ماشي بين حارتين وببطء، ولا سايب يمينه فاضي ولا سايب شماله فاضي، وينحرقوا الناس اللي وراه بقى مش مهم


و الستات (مع احترامي لهن)، تبقى ماشي انت في امان الله، وفجأة تلاقي عربية كسرت عليك، تعرف على طول تلقائيا ان العربية دي فيها واحدة ست
مرة واحدة عملتها معايا اكتر من مرة، تكسر عليّ يمين، اجي انا شمال واحاول اعدي، لاقتها كسرت عليّ شمال، اضطريت اروح يمين، كل ده وهي مش عارفة ولا واخدة بالها ان فيه واحد دمه بيتحرق وراها
وانا بالمناسبة دي اقترح عمل سيارات مخصوصة للسيدات تتميز بحاجتين
1-
مافيهاش مرايات جانبية: نظرا لأنهم مش بيستخدموها اطلاقا، فنوفر تكلفتها احسن
2-
يكون فيها 2 سنسورز على الجناب مكان المرايات: عشان لو حد جنبها يديها انذار صوته عالي يخضها


ملحوظة هامة جدا جدا: انا مش متجني على السيدات، والدتي بتسوق وهي معترفة بالحقيقة دي ومقتنعة بها تماما
وفي المقابل فيه حاجات تانية الرجالة مالهمش فيها برضه وممكن نتتريق عليهم فيها، بس كلامنا هنا عن السواقة


ثالثا بقى الناس الماشية، فعلا ماشية، مش من المشي، من الماشية (القطيع) اللي عايزين لهم راعي غنم
طبعا اختراع الرصيف ده بدأ يثبت فشله عندنا في مصر، الناس كلها سايباه وماشية في وسط الشارع
أنا أعي ما أقول، وسط الشارع فعلا، الاقي حبة شباب 4 او 5 سادين الشارع وبيتمشوا كأنهم بيصوروا فيديو كليب، طيب يا أذكيا المخرج اللي بيصور فيديو كليب بالمنظر ده بيبقى مفضي الشارع عشان التصوير، مش بيحرق في دم الناس اللى سايقة
وتلاقيه يتضايق اوي اوي لو اديته كلاكس او كلمته كلمة وحشة، فما بالك لو خبطته بمراية العربية
وطبعا صعب جدا جدا انه يتلفظ بألفاظ مش كويسة للناس دي، ما يصحش ولا يجوز أصلا، فانا بابقى ماسك نفسي بالعافية
بس مافيش وقت اكتر من كده اقعد احكي لكم مواقف لناس زي دي كتير حصلت معايا كنت فعلا فعلا هاشيلهم، او هاتسبب في مشكلة للعربيات اللي معايا
ووالله لولا خوفي من الله، انا اعتقد اني ممكون ابقى شايل 30 بني ادم لحد دلوقتى من ساعة ما ابتديت اسوق
فعلا وجديةً
ألاقي واحد سكران كده قدامي، أشيله، ألاقيه يطير في الهوا، ويتهبد على اللأرض، وأنا أطير بالعربية عشان ماحدش يجيبني، وأضحك ضحكة شيطانية
بس لا يجوز لا يجوز


المهم الشاهد من كلامي ده كله إن الكلاكس مهم
الكلاكس ضروري عشان نفوّق الناس السكرانة دي، سواء اللي بيسوقوا او الماشية
وفي الحتت الزحمة خصوصا بيبقى لازم لازم ايدي تبقى على الكلاكس، عشان الناس كتييييير، وماحدش ماشي على الرصيف
عشان كده ابتديت اراعي سواقين الميكروباص اللي بيبقوا (من خبرتهم) متوقعين جثث ناس سكرانة عمالة تترمي عليهم من كل ناحية


كفاية كده بقى
اديني طلعت شوية من اللي شايلهم في قلبي









كافر


قَدْ كَانَتْ لَكُمْ أُسْوَةٌ حَسَنَةٌ فِي إِبْرَاهِيمَ وَالَّذِينَ مَعَهُ إِذْ قَالُوا لِقَوْمِهِمْ إِنَّا بُرَءَاؤاْ مِنكُمْ وَمِمَّا تَعْبُدُونَ مِن دُونِ اللَّهِ كَفَرْنَا بِكُمْ (الممتحنة 4)ـ


لَقَدْ كَفَرَ الَّذِينَ قَالُواْ إِنَّ اللّهَ هُوَ الْمَسِيحُ ابْنُ مَرْيَمَ (المائدة 72)ـ
لَّقَدْ كَفَرَ الَّذِينَ قَالُواْ إِنَّ اللّهَ ثَالِثُ ثَلاَثَةٍ (المائدة 73)ـ


مش ملاحظين وجه شبه بين أول آية، والآيتين اللي تحتها هنا؟
باين ان فيه كلمة مشتركة وهي "الكفر"ـ


باين مما سبق إن اليهودي كافر، والنصراني كافر، موضوع بقى يخش الجنة ولا النار دي مش بتاعتي، والله لو بلغته الدعوة مضبوط ورفضها يبقى في النار زي ماهو باين من الحديث السابق، ولو ما بلغتوش أو بلغته بصورة مشوهة فده مش هيخش النار طبعا، وإنما ليه قصة تانية
من سمع بي من أمتي أو يهودي أو نصراني , فلم يؤمن بي , لم يدخل الجنة (وفي رواية دخل النار)ـ
صححه أحمد شاكر 2/66


طب إيه علاقة الكلام ده بالمؤمنين من قوم إبراهيم؟
أو السؤال الأهم: هو ليه اليهودي أو النصراني بيزعل لما أقول إنه كافر؟؟؟


هي يعني ايه كلمة "كافر" أصلا؟
كافر يعني المنكر والجاحد أو المكذب، يعني مش مؤمن بكذا
يعني أنا مثلا كافر بالكوكب (موضوع التنجيم يعني ومعرفة الغيب عن طريقه)ـ
وأنا برضه كافر بنظرية داروين، يعني مش مؤمن بيها
كذلك أنا كافر بصلب سيدنا عيسى (عليه السلام)، مش مؤمن بأن سيدنا عيسى اتصلب
زي بالضبط ما اليهودي أو النصراني كافر ببعثة محمد صلى الله عليه وسلم
والمؤمنون مع سيدنا إبراهيم قالوا لقومهم: إنا برآء منكم ومما تعبدون من دون الله "كفرنا" بكم


فكلمة "كافر" لا تحتمل أي إساءة، ومش شرط أبدا إنها تعبر عن إلحاد، بل هي تعبر عن اعتقاد شخص ما وتكذيبه لخبر ما
والله أعلم








Friday, March 7, 2008

مغامرات متولي هاينزمان




تم بحمد الله افتتاح مدونة جديدة بعنوان

مغامرات


متولي هاينزمان








Saturday, February 23, 2008

شايف الزبالة؟




السلام عليكم


انزل الشارع كده
واتمشى شوية
في أي حتة عند الست أم دنيا
(مصر أم الدنيا)
بص
شايف اللى انا شايفه؟
شايف؟
شايف الزبالة؟
عفوا.. شايف القمامة؟
شايف القذارة؟



واحد ممكن يقول لي: انت قصدك ايه بالزبالة؟
يابا الحاج كلامي واضح
الزبالة اللي مرمية في الشارع
شايفها؟


انت السبب
انت
ايوة انت
انت ياللى بتقرا كلامي دلوقتى
(مع احترامي لكل من يعلوني قدرا)

ايوة انت
انت ياللى فاتح ازاز (شباك) عربيتك عشان ترمي منه المنديل المستعمل بتاع سعادتك في الشارع
انت ياللى ماشي وايديك في ايد خطيبتك (هداك الله) وعمال تتف قشر اللب من بقك جنب سور الكورنيش
انت ياللى عامل فيها أحمد السقا (ربنا يهديه) وبتشد آخر نفس من السيجارة، وتقوم راميها بعنف على الأرض
انت ياللي مش عارف تودي كيس الزبالة بتاع بيتكم فين، فتروح راميه وسط اخواتهم على الرصيف
انت ياللى مش عاجبك الناس اللي بتكنس الشارع كل يوم عشان خاطر سيادتك
انت ياللى بتقول: هو فييييين صندوق الزبالة؟ وهو على بعد 3 متر منك
انت ياللى بتقول: طب ما كل الناس كده

انت ياللى بتقول: معلش.. ماهو.. يعني قشطة يعني
انت ياللى مش مهتم بكلامي ده أصلا



أنا عايز أقول حاجة مهمة
لو افترضنا جدلا إن كل الناس كده
يبقى أولا أنا عايز لما أقف قدام ربنا يوم القيامة ما يحاسبنيش على الزبالة اللى أنا مشارك فيها
ثانيا أنا لا يشرفني إني أكون من الناس اللي كده، وإن كثر عددهم



رب اهد قومي فإنهم لا يعلمون
وأعتذر عن الحدة في الكلام
فالأمر مستفز





سرد مواقف للتسلية




السلام عليكم



الواحد وهو ماشي في الشارع، راكب مواصلة، واقف في مكان ما، بالاقي بعض المواقف العجيبة اللي بتحصل من بعض الناس
بعضها يضحك، بعضها يبكي، بعضها يخليك تضرب كف بكف، بعضها الواحد بيتعلم منها
قلت أرص بعض المواقف اللي باعدي عليها، من باب التسلية، وقد يكون فيها بعض الاتعاظ مثلا



متولي هاينزمان

بعد ما ألفت قصة متولي هاينزمان حبيبي، وبعد ما ابتديت أنشر القصة دي عبر الايميلات بهدف توعية المسلمين بخطورة الجهل اللي بالمنظر ده، ووسط ردود الأفعال المتفقة على خطورة الأمر، صادفني هذا التعليق من أحد الناس اللي ما يعرفونيش
اللى ألف القصة دي واحد مش مسلم ومش عربي
ده هدفه السخرية من الإسلام والمسلمين
طب هو الجهل مضايقه في ايييييييه؟
ما الجهل موجود في كل حتة

دي كانت الاتهامات اللى وجهت لي، بس انا ناقلها بالمعنى، مش بالنص
لكن أخيرا اكتشفت إني (من وجهة نظره) مش مسلم ولا عربي، لا ده أنا واحد مستشرق مستغرب مزبهل من بتوع المؤامرة على الإسلام ومن الصهاينة ولاد اللذينَ اللي كتبوا كوكا كولا بطريقة تخليك لما تقراها قدام المرايا تلاقيها لا محمد لا مكة
بس بصراحة، على الرغم من إنه صعبان عليّ اللى كتب الكلام ده، إلا إني ضحكت من قلبي والله بعد ما قريت كلامه، وكان نفسي أقول له: لا ياعم، أنا مسلم عربي مصري سلفي إرهابي متشدد متنطع متحذلق متفزلك متأنتخ
ملحوظة للناس اللى تحت خط الغباء: لا يصح من الأوصاف اللي فاتت دي إلا أول 4 بس


العساكر والموبايلات

كنت راكب المترو، ولاقيت واحدة محجبة قاعدة لوحدها
وفجأة لاقيت 3 عساكر أمن مركزي، الظاهر انهم مروحين فركبوا المترو
وراحوا محوّطين على الست الغلبانة يا عيني وقعدوا جنبها

لاقيت بقى اتنين منهم معاهم موبايلات 6600 ومنهم اللى معاه سماعات في ودنه وعمالين ينقلوا لبعض حاجات بالبلوتوث، ودار بينهم (العساكر) أحاديث زي دي
* طيب ياعم ماعندكش حاجة حلوة كده.. حاجة حلوة كده يعني.. اه حاجة حلوة.. (والمعنى في بطن العسكري)ـ
* طيب عندك ايه ألعاب؟
* عندي دبابات، وطيارات، وحرب الكواكب ،وماريو، وأكالة الجبنة
* أكالة الجبنة؟
* أيوة أكالة الجبنة

بعد كده فوجئت بالست اللي كانت صعبانة عليا عشان محبوسة وسطهم، عمالة ترغي بقى معاهم
وعمالة تسأل: الموبايل ده مستعمل طبعا، انت جبته بكام؟ ومين اللي باعهولك؟
وهاتك يا رغي مع العساكر

ومش لاقي تعليق


المتحف

بما اني من المهتمين (إلى حد ما) بالتاريخ الفرعوني، فزرت المتحف المصري كذا مرة
وكنت بأشوف المرشدين السياحيين اللي بيتكلموا بلغات تانية
وبصراحة كانوا بيعجبوني جدا في اتقانهم للغاتهم

ماعدا بتوع الانجليزي، بيتكلموا
egyptian english
ده غير ان كتير منهم مش فاهمين حاجة اصلا الا شوية كلام حافظينه

كان فيه تمثال يوناني بلبس مصري مكتوب عليه "الاسكندر الثاني"، وده في حد ذاته شيء عجيب لأن الاسكندر الأكبر يبقى الثالث، وقبله ماحدش دخل مصر، فازاى الاسكندر الثاني يتعمل له تمثال على الطراز المصري؟
المهم دخل المرشد الرهيب ووقف عند التمثال وقال بعظمة
ALEXANDER THE GREAT
وقعد يشرح لهم عظمة الاسكندر وعمل ايه وسوى ايه، ولما خلص سألته بسرعة كده بالعربي: ده مش الاسكندر الاكبر، ده مكتوب الاسكندر الثاني
قال لي: لا ماهو ابنه، ابنه
! ! ! ! !
يعني حتى لو افترضنا ان الاسكندر الثاني يبقى ابن الاسكندر الأكبر اللي هو الثالث (مش عارف ازاى)، طب بيقول لهم ليه ان ده تمثال الاسكندر الاكبر مش الثاني؟

واحد تاني غيره كان واقف عند تمثال سنفرو والد خوفو، وعايز يقول لهم انه "أبو خوفو"، فراح واقف قدامه بإثارة وحماس وقال
KHOFO THE BABA

ولا تعليق

المهم إني كل ما أخش المتحف لوحدي، ألاقي مخبر جالي على طول، ويدور بيننا حوار زي ده
هو: أيوة
أنا: نعم
هو: بطاقتك
أنا: اهي
هو: هاتها عشان أشوفها ا أسامة (أكيد عرف اسمي من البطاقة)ـ
أنا: اتفضل
هو: انت بتشتغل ايه؟
أنا: طالب، في هندسة (وكنت باقولها بفخر بصراحة)ـ
:D
هو: داخل المتحف ليه؟
بيني وبين نفسي: يعني ايه داخل المتحف ليه؟ داخل أفجره مثلا؟
أنا: أنا كنت جوه أصلا بس خرجت أصلي العصر وداخل تاني، حتى معايا التذكرة
هو: فين التذكرة دي
أنا: اهي
هو: طب اتفضل

الحمد لله مافيش حاجة بتحصل، ومافيش مشاكل، بس باحس انها نوع من الرخامة عشان بس فيه سياح هنا


انقطاع النت

وانا عمال باتكلم مع واحد عن ان قطاع النت بسبب انقطاع كابل الالياف الضوية اللي في البحر المتوسط
لاقيت واحد تاني بيسألني بعدها: هو ايه الموضوع؟ انا سامعكم بتتكلموا في حاجة كده
فقلت له اصل حصل كذا كذا والنت قطع والخ الخ
فقال لي: اه، طيب، انا كنت فاكرها كارثة ولا حاجة

ولا تعليق


ممكن منديل

ايام المدرسة، وانا في إعدادي، كنت في مرة محتاج منديل ضروري. واليوم ده ماحدش في الفصل كله كان معاه مناديل
المهم قلت أروح أطلب من المُدرسة، فدار بيني وبينها الحوار ده
أنا: ميس، يا ميس، ممكن منديل؟
المُدرسة: انت بتطلب مني منديل؟
أنا: اه
المُدرسة (بصوت أعلى): انت بتطلب مني أنا منديل؟؟؟
أنا (متعجبا): اه !!!ـ
المُدرسة (بغضب شديد): ما تطلبش مني منديل، شوف زمايلك اطلب منهم منديل
أنا: ماهو ماحدش معاه منديل
المُدرسة: ولو برضه، ما تطلبش مني أنا منديل

وانتهى الحوار على كده، وبقى عندي استعجاب واستغراب شديدين، بالإضافة إلى كراهية للست دي
مش عارف، طب ايه؟
هل انا طلبت طلب غريب مثلا؟ ولا كلمة منديل دي ليها معني مش كويس؟ ولا ايه؟
يا ريت لو حد يعرف يقول لي، بدل ما احط نفسي في المواقف دي اني


السجاير

كنت قاعد مع واحد كبير في مطعم، كنا على طاولة لوحدنا وعمالين نتكلم
المهم إنه راح مطلع علبة السجاير، وقبل ما يولع واحدة قال لي: انت بتتضايق من السجاير ولا حاجة؟ لو بتتضايق قول عادي
فكرت قليلا وقلت: هو الموضوع مش إني أنا اللى اتضايق، الموضوع ان ده يغضب ربنا
فقال بنبرة حزينة: ربنا يهدينا، وراح مولع السيجارة
فكرت بعد كده، طب هل كان المفروض أقول له: ايوة انا باتضايق من السجاير؟
هل هو كان هيراعي شعوري وما يضايقنيش؟ أكيد
طب الفكرة بقى هل هو بيراعي شعوري ومضايقتي أكتر ما بيخاف من غضب ربنا؟
سبحان الله، ربنا يهديه، ويهدينا


ما ترَقـّصش قدام الجون

من كام سنة كده، رجعت مرة من صلاة الفجر، وقعدت ألعب فيفا 2002 يمكن أفوق شوية، عشان كنت تعبان لكن مش عايز أنام
وقلت في نفس الوقت أستفيد من وقتي وأسمع درس للشيخ محمد حسين يعقوب. فحطيت الهيد فونز في وداني وقعدت ألعب
المهم بعد شوية فوجئت بالشيخ وهو بيقول لي بنبرة حازمة:
ما ترقصش قدام الجون!!!ـ
طبعا لك أن تتخيل مدى فزعي، لما ألاقي الشيخ يعقوب زي ما يكون قاعد ورايا وعمال يوجهني وأنا بالعب، خاصة واني كنت فعلا بالعب قدام الجون بتاعي
الفكرة إن الشيخ كان بيتكلم عن إن الواحد لازم يخلي فيه مسافة بينه وبين الحرام، ما يفضلش شغال في الشبهات عشان ما يقعش في الحرام، زي بالضبط اللى بيرقـّص قدام الجون

مرة تانية كنت سايق العربية، وكان الشيخ يعقوب برضه شغال درس ليه في الكاسيت
فقال: أول حاجة تعملها للاستعداد لرمضان . . .(وسكت الشيخ شوية)ـ
فقلت أعلى الكاسيت شوية يمكن انا مش سامع
لاقيته فجأة بيقول لي: دوووووس دبريااااج
ولك أن تتخيل فزع مشابه تقريبا للفزع الأولاني
هو كان قصده دوس دبرياج وهدي كده وقلل ذنوب ومعاصي عشان تستعد لرمضان

ده غير بقى الناس اللى بتحكي انها شافت الشيخ على الدش وهو بيقول للمشاهد: ارمي السيجارة من ايدك، سيب الريموت، نزل رجلك وانت قاعد، وركز معايا
ويطلع اللى بيتفرج فعلا بيعمل الحاجات دي
سبحان الله


وقد يكون للحديث بقية إن شاء الله



Tuesday, February 5, 2008

خالدو مصر




تفكرت في أشهر الشخصيات التي كان لها تأثيرا جليا على مصر (بالسلب أو بالإيجاب). استعرضت كل من أثر على تاريخها، وحضارتها، وفكر شعبها، وعقائد شعبها، وفنون شعبها

ثم بدأت في ترتيب تلك الشخصيات، ترتيبا تنازليا من الأكثر تأثيرا إلى الأقل، فكانت النتيجة كالتالي



ملحوظة هامة: هذه القائمة مرتبة حسب تأثير كل شخصية على مصر، وليست مرتبة حسب العظمة أو الأفضلية، وإلا اختلف الترتيب تمام





مينا نارمر



كان حاكما لمصر العليا إلى أن ضم مصر السفلى إلى ملكه عام 3200 ق.م تقريبا. وكانت هذه هي البداية الحقيقية لمصر ولازدهار الحضارة المصرية الفرعونية.

كان أثره بالغا حيث أن وحدة مصر مستمرة حتى الآن، أي أن أثره استمر لأكثر من 5200 عاما. إلا أنني مالزلت لا أجد مبررا حقيقيا لاحتلال مملكة مصر السفلى.





عمروبن العاص رضي الله عنه



هو الفاتح المسلم العربي الذي جاء من الجزيرة العربية عام 641م لينشر الإسلام في مصر مع الحفاظ على حرية العقيدة لكل فرد، وليخلصها من ظلم الروم لشعبها.

منذ ذلك الحين بدأت مصر تتغير حتى أصبح الإسلام هو دين الأغلبية من الشعب وأصبح هو الدين الرسمي، كما صارت مصر بلدا عربيا إلى الآن. وذلك كله بفضل الله ثم بفضل عمرو بن العاص الذي استمر أثره حتى الآن 1400 عاما تقريبا





مرقس



هو كاتب السفر الثاني من العهد الجديد (إنجيل مرقس). جاء إلى مصر لنشر النصرانية الأرثوذكسية في منتصف القرن الأول. وقتله الوثنيون المصريون بالإسكندرية عام 67م. أنشأ مرقس الكنيسة القبطية الأرثوذكسية بالإسكندرية التي مازالت قائمة إلى الآن، وكان أول بطريرك لها

مرقس هو من أدخل النصرانية إلى مصر حتى صارت مصر دولة نصرانية أرثوذكسية تحت حكم الروم إلى أن جاء الفتح الإسلامي

وحتى الآن تعتبر النصرانية هي الديانة الثانية (بعد الإسلام) من حيث تعداد المؤمنين بها بنسبة تتعدى 10% من الشعب المصري. لذا استمر تأثير مرقس على مصر طويلا إلى ما يقارب 2000 سنة

جاء مرقس في الترتيب بعد عمرو بن العاص لأن الإسلام استمر كديانة رسمية للدولة فترة أكبر من النصرانية، كما أن الإسلام فرض لغته (العربية) أكثر من فرض النصرانية للغتها





المعز الفاطمي



هو معاذ المعز (لدين الله كما يزعمون) الفاطمي، رابع خلفاء الدولة الفاطمية الشيعية الإسماعيلية في تونس، وهو الذي أرسل جيشا جرارا بقيادة جوهر الصقلي لغزو مصر وضمها إلى لدولة الفاطمية عام 953م

يعود تأثير المعز الفاطمي إلى إنشاء جوهر الصقلي لمدينة القاهرة التي ظلت عاصمة لمصر لأكثر من ألف عام حتى الآن

كما كان وراء إنشاء جوهر الصقلي للجامع الأزهر الذي كان مركزا لنشر التشيع في مصر وبعض أقطار العالم الإسلامي. ولا يزال الأزهر شامخا حتى الآن بفضل الله تعالى ولكن لنشر مذهب أهل السنة





صلاح الدين



يوسف بن أيوب الكردي الشهير بصلاح الدين، أتى به عمه أسد الدين شيركوه لصد هجمات الصليبيين على مصر، حتى أصبح أسد الدين وزيرا للخليفة الفاطمي عام 1167م ثم خلفه صلاح الدين على الوزارة حيث قام بإصلاحات داخلية بمصر حتى مات آخر خليفة فاطمي وانتهى حكم الفاطميين بمصر

يرجع تأثير صلاح الدين إلى تخليص مصر من الشيعة الإسماعيلية، وتحويل الأزهر من مركز لنشر التشيع إلى مركز لنشر معتقد أهل السنة. فلنا أن نتخيل مصر شيعية لولا فضل الله ثم فضل صلاح الدين






للمزيد حمل الموضوع كاملاً

من هنا






معرض الكتاب




السلام عليكم



معرض الكتاب

والله بقالي كذا سنة مارحتش معرض الكتاب

وبعدين قعدت أفكر في السبب: أنا ليه ماباروحش معرض الكتاب؟

لاقيت إن الشعب المصري 4 أنواع، ومالاقيتش نفسي في أي نوع منهم



النوع الأول: الأسرة اللي بيجيبوا سندويتشات ويروحوا يقعدوا في الجووونينة في الشمس على الرغم من إن الدنيا مطرت كذا مرة في وقت المعرض



النوع الثاني: الناس اللى تقعد تلف تلف تلف، وتلملم أي حاجة تلاقيها في سكتها، لحد ما فلوسها تخلص. المسخرة بقى انهم مش بيقروا حاجة من اللى بيجيبوها



النوع الثالث: الراجل اللي عايز كتاب نيل الأوطار في الطماطم والخيار، طبعة الألوسي، تحقيق أبي القاسم اللؤلؤي، طبعة دار الجزائر القومية، ومش هيلاقي اللي هو عايزه ده الا في المعرض



النوع الرابع: هو الراجل المثقف (أو الست طبعا) اللي بيشوف ايه الجديد لكتّاب معينين في مجالات معينة، وبيبقى المعرض بالنسبة له تجمع مفيد جدا يقدر يطلع منه بأكبر فايدة ممكنة من الكتب



انا احترم النوع الثالث والنوع الرابع، لكن انا مش منهم

انا شخصيا لو عايز كتاب مشهور في أي مجال، باخش اشوفه على النت

ولو عايز كتاب ديني، بانزل العتبة الاقي كتب ارخص من اي حتة تانية، فيما أظن

ولو عايز أعرف معلومة معينة أو فكر معين، فربنا يخلي لنا النت اللي مليان حاجات من دي



بس كده

والسلام عليكم

المشاية




اصطحب الأب ابنه الصغير ليتنزها في الحديقة

الأب زار الحديقة مرات ومرات، كما أن له بعد نظر حيث يرى آخرها

الابن أوشك أن يتم عامه الأول، ولا يستطيع المشي، ولا يكاد يفقه قولا



الابن: لقد سئمت تلك "المشاية" التي وضعتني فيها

الأب: ولِمَ السأم وهي من الأهمية بمكان؟

الابن: أريد أن أركض وأقفز وألعب

الأب: لا تتعجل فكل شيء بأوان

الابن: أستطيع أن أفعل أي شيء، فأخرجني وسترى ما أنا فاعل

الأب: ليس قبل أن تتعلم المشي بأمان

الابن: سئمت شكلها ولونها وحركتها

الأب: إن شئت أبدلتك واحدة أخرى من بين مختلف الأشكال والألوان

الابن: هذا والله ابتلاء شديد ومحنة صعبة

الأب: اليوم تختار، فترقب يوما لا تختار فتكون كأخيك المجبر الحيران

الابن: بل دعني اليوم أثبت لك عزمي وجلدي وقوتي

الأب: جادلتني فأكثرت جدالي، فها أنا أرفعك عنها أيها الطفل الولهان



فلما استتب الطفل قائما فوق "المشاية"، امتد بصره إلى آخر الحديقة

فاتسعت عيناه وازداد لمعانهما

وفي فرحة وشهوة واتباع للهوى قال الطفل الولهان: ها أنا البطل قادم



...لكن

سقط الطفل

فكسرت رقبة الطفل

فمات الطفل



Monday, December 31, 2007

إن شاء الله، إن شاء الله

السلام عليكم



" إن شاء الله "



كلمة عظيمة

وأمرنا بالتمسك بها في قول الله تعالى: وَلَا تَقُولَنَّ لِشَيْءٍ إِنِّي فَاعِلٌ
ذَلِكَ غَدًا * إِلَّا أَن يَشَاء اللَّهُ وَاذْكُر رَّبَّكَ إِذَا نَسِيتَ وَقُلْ
عَسَى أَن يَهْدِيَنِ رَبِّي لِأَقْرَبَ مِنْ هَذَا رَشَدًا

( الكهف/23،24 )



لكن لاحظنا إن ناس كتير جدا جدا بتستخدم الكلمة دي استخدام خاطئ

استخدام (آسف أقول إنه) بينفر الناس من الكلمة دي

عن غير قصد، سواء من المتكلم، أو السامع



يعني تلاقي عيّل صغير رايح يقول لأبوه: انا عايز أروح الحتة الفلانية

تلاقي الأب يقول له بكل براءة: "إن شاء الله" يا حبيبي

! ! ! فتفاجأ بالابن يصرخ قائلا: ما تقوليش إن شاء الله

ماهو كتير من الآباء والأمهات بيعودوا اولادهم وبناتهم على كده

كلمة "إن شاء الله" ترسخ أذهانهم أن المعنى المقابل لها هو: في المشمش

عن غير قصد من الآباء، وعن جهل وبراءة من الأبناء

طالما قال الأب أو قالت الأم "إن شاء الله"، يبقى مش هينفذ طلب الابن أو البنت



للأسف الموضوع بيتطور بعد كده

وتلاقي الواحد يكبر وتفضل فيه العادة دي

الاول يطلب طلب: ابقى هات لي معاك كذا

الثاني يقول بتلقائية: ربنا يسهل

او يقول: قول يا رب

كده طبعا الاول تأكد بنسبة تقارب الـ100% ان الثاني مش هيعمل له حاجة، هو بيسكته بس
بالكلمة

ولو اعترض الاول، يرد الثاني ويقول: يعني ما اقولش ربنا يسهل؟ ومش عايز تقول يا رب؟
قول يا رب

ويضحك



حتى في وسط المتدينين

تجد كلمة "إن شاء الله" للأسف الشديد لها معنى سلبي

لكن مختلف قليلا

تلاقي الواحد منهم يقصد بها التوكل على الله، لكن ينقلب الأمر إلى "تواكل" سطحي
بغيض



...يعنى

مرة واحد قال لي: تعالى نروح درس الشيخ يعقوب في عابدين

قلت: الشيخ يعقوب؟ ده مالوش درس ثابت دلوقتى خالص

قال لي: لا ما انا سمعته في شريط بيقول انه بيدي درس في عابدين، وبعدين "إن شاء
الله، إن شاء الله" هنلاقيه هناك

ملحوظة: قد يكون تاريخ إصدار الشريط حديثا، لكن تاريخ إلقاء الدرس قد سبقه بما يصل
إلى 10 سنين

! ! ! المهم صاحبي ده ضرب مشوار محترم لعابدين، وفوجىء هناك بإن الشيخ بطل يدي دروس
هناك من 6 سنين



وخد عندك بقى قصص زي دي كتير

واحد تاني جمع اصحابه عشان يزوروا واحد صاحبهم مريض، من غير ما يكلموه ولا يعرفوا
هو موجود الاول ولا لا

وبعد ما جمعوا نفسهم واشتروا له بسبوسة، راحوا لاقوه مش في البيت اصلا

وكانت الحجة إنه "إن شاء الله، إن شاء الله" هيبقى موجود أكيد يعني



واحد تالت كان عامل معرض في الكلية عندنا قبل الامتحانات باسبوعين او 3

ولما قلت له: ماحدش هيروح لك المعرض

قال لي: "إن شاء الله، إن شاء الله" الناس هتيجي



واحد رابع يبقى راكب معايا في العربية واحنا تايهين وانا سايق

يقول لي: خش من الشارع عشان نوصل

اقول له: ايش عرفك؟؟؟

يقول لي: ما اعرفش، "إن شاء الله، إن شاء الله" هو ده الطريق الصح



واحد خامس ييجي واحنا قاعدين في الصف الاول في المسجد مستنيين اقامة الصلاة، ويقوم
حاشر نفسه وسط الناس

نقول له: يا شيخنا المكان مش هيكفي، مش عشان تاخد ثواب الصف الاول تؤذي الناس

يقول: لا "إن شاء الله، إن شاء الله" المكان هيكفي



واحد سادس ناوي يتجوز إن شاء الله، من غير ما يشوف اللى هيتجوزها دي ولا يتكلم
معاها ولا يتعرف عليها، حتى الآن

اقول له: طب افرض ما حصلش توافق بينكم؟

يقول لي: لا "إن شاء الله، إن شاء الله" هيبقى فيه توافق









كفاية كده عليكم

بس انا نفسي الناس تاخد بالها من المشكلة دي

وتعطي الكلمة العظيمة دي قدرها

وتحافظ عليها دايما دايما

لكن ما تبقاش دليل على التواكل، او على الرفض



والسلام عليكم