السلام عليكم
مجلة ميكي
مجلة عاشت معانا سنين طويلة
وعاشت مع أجيال وأجيال مننا
مجلة ميكي ظلت تصدرها "دار الهلال" حاولي 40 سنة
ثم استلمت "نهضة مصر" الراية بعدها
مجلة ميكي قصصها كلها مستوردة بالطبع من ديزني
وهنا في مصر ينقوا القصص اللي تتناسب مع ثقافتنا (على حد زعمهم) وينزلوها لنا
بس أنا بعد ما كبرت على (إدمان) مجلة ميكي
وبعد بضع سنوات بدأت أتفكر في المادة المقدمة لأطفالنا في المجلة دي
لاقيت الآتي
أنا لا أرى مطلقا أن هذه القصص تتناسب مع ثقافتنا وديننا
إذ تفاجئنا هذه المجلة بمخالفات صارخة لثقافتنا وديننا بين طياتها
مما يشكل خطورة كبيرة على فكر أطفالنا
أمثلة
عادي جدا جدا إنهم يهرونا قصص عن الكريسماس، واحتفالات الكريسماس، وشجرة الكريسماس،
كأن الكريسماس ده شيء مقدس عند البشرية
بصرف النظر عن إن ديننا كأغلبية مسلمة في بلد إسلامي لا يتفق إطلاقا مع هذا
مثال ثانٍ
تكرر كتير جدا جدا قصص عن عرافين وسحرة ودجالين
والمصيبة انه يقنع الطفل ان الكلام ده قد يكون حقيقي دون أن يشعر
تلاقي مثلا ست قاعدة قدام البلورة السحرية وبتعرف الغيب والمستقبل
وتلاقي في الاول "ميكي" مثلا او غيره (بما ان الموقف ده متكرر) يقول في الاول انه
لا يؤمن بالخرافات دي اطلاقا
لكن تفاجأ في نهاية القصة إن كلام العرافة دي طلع صحيح
قل لي بقى لما الموضوع ده يتكرر كتير في قصص مختلفة، ايه اللى هيثبت في ذهن الطفل؟؟؟
مثال ثالث
والمصيبة في المثال الثالث ده
من أساسيات شخصيات المجلة والعلاقات بينهم، عادي جدا جدا انك تلاقي علاقات حب وعشق
وخطوبة ومصاحبة
يعني "ميكي"، و"ميني" أو "ميمي" من أشهر الحبّيبة اللى في المجلة
و"بطوط" أو "دونالد دك"، و"زيزي" أو "ديزي" أو "بطوطة"، كل دي اسماء لشخصية واحدة
ومش غريب ابدا ان "زيزي" احيانا تفضل انها تخرج مع "محظوظ"
بدل ما تخرج مع "بطوط"،
يعني قشطة شوية مع ده وشوية مع ده
او تلاقي علاقات حب جانبية في قصص مختلفة في المجلة مع شخصيات مختلفة
قولوا لي بالله عليكم، ازاي بقى ده يتفق مع ثقافتنا وديننا على حد زعمهم؟؟؟
أنا شخصيا كطفل نشأ في أسرة ملتزمة (نحسبهم على خير ولا نزكيهم على الله) كنت
بالاقي تناقد شديد بين اللي اهلي بيقولوا لي عليه من حرمة المصاحبة بين الولد
والبنت والحوارات دي
والاقي المجلة اللي باحبها مليانة بقصص حب عادي جدا
ده غير المجتمع والاعلام والاغاني والافلام اللى بتحسسنا ان مافيش ورانا حاجة في
دنيتنا دي الا اني احب واحدة ولما تسيبني اقعد اعيط واحب واحدة غيرها ونعيش قصة حب،
والجواز ده ييجي وقت ما ييجي بقى، مش مستعجلين
وده بقى ينقلنا لجزئية أخرى مهمة
مجلة جديدة مخصصة للبنات
" أميرات "
دي مجلة فيها قصص للأميرات اللي اشتهرن في أفلام ديزني
"ياسمين" من فيلم علاء الدين، "سنو وايت" ، "بيلا" من الجميلة والوحش، "سندريلا"
...وهكذا
هي فكرة جميلة، أعجبت بها بصراحة
لكن لما تصفحت إحدى مجلات "أميرات" دي لاقيت ما لا يسر
اولا باين من الصورة اللى فاتت دي (غلاف إحدى المجلات) شكل ملابسهن مثلا
انا مش باتكلم في حلال وحرام ودي صور مرسومة يمكن مافيهاش فتنة، الله أعلم
لكن أنا عايز اقول الناس دي بتربي بناتنا على ايه؟؟؟
الواقع إن بناتنا بيتربوا على ان الملابس الفاضحة دي شيء عادي وطبيعي من غير ما
يحسوا
ده غير المصيبة الأكبر
جابين في المجلة دي صفحتين فيهم تعريف لأشهر أميرات ديزني
كل واحدة، اسمها، وظهرت في فيلم ايه، وايه قصتها
وصورة لكل واحدة منهن
لكن الصور عاملة ازاى؟؟؟
كل واحدة (بلا استثناء) جايبين لها صورة وهي في حضن حبيبها أو بترقص مع حبيبها في
أوضاع مخلة جدا
هل ترضي ان بنتك الصغيرة تتربى على المناظر دي
طيب لو اتربت التربية دي، تتوقع منها تبقى عاملة ازاى لما تكبر
طبعا معروف ان الطفل بيخزن كل حاجة بيشوفها او بيسمعها حتى تترسخ في ذهنه
والحصاد بقى لما يكبر أو تكبر وتشوف بقى جيل المستقبل عامل ازاى؟
رب اهد قومي فإنهم لا يعملون
والسلام عليكم
6 comments:
السلام عليكم
هي فعلا قضية خطيرة يا اسامه
بس انا رأيي ان دي تيجي في الاخر لما بقى نصلح تفكير ال الاباء و الامهات
لان من رأيي ان هما دول لو اتصالحوا كله هيتصلح حاله
طب انت اتربيت على مجلة ميكي زي ما بتقول ......انت شايف انك بقيت منحرف ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
"لن ينتصر التخلف في بلدي ولو حاربته وحدي"
Anonymous 1
كلامك صحيح إلى حد ما
ولكن
متى يبلغ البنيان تمامه ان كنت تبني وغيرك يهدم
والمشكلة مش في "ميكي" بس، المشكلة في ثقافة مجتمع
جزاك الله خيرا على التعليق وفي انتظار المزيد
Anonymous 2
أنا شايف إني قضيت فترة من عمري متربي على بعض مفاهيم خاطئة لا ترضي الله
الحمد لله الذي عافاني منها
على العموم ربنا يعينك في حرب التخلف
شكرا على التعليق
وشكرا على علامات الاستفهام الكتير
شيء عجيب أنا كنت فاهم ان دول أجانب و كنت عارف أنهم مش محافظين زينا و كنت بأقرأها و أتسلى و أنا فاهم ان أنا مش هاقلدهم و أن احنا مسلمين نأخذ ما ينفعنا و نترك ما يتعارض ...الان كل حاجة يقولو هذا فسق هذا يتعارض و يتمارض واننا أمة ولن يحدث أبدا والنصر لنا والله طول مانتوا مش راضيين ترجعوا لليوم اللي كان الاسلام يتعانق فيه مع العقل و التفكير ابقوا قابلوني لو شوفتوا أي انتصار في أي مجال في الحياة أيوة أنا اللي (نفسي) أحارب التخلف ..على فكرة التخلف مش راجل مربي دقنه أو ست لابسة ماعرفش ايه التخلف أن الناس دي تفتكر انها عملت اللي عليها و زيادة و ربنا يوم القيامة هيشوف اللي بدقن يقوله بس انت مش هاتتحاسب ياللا على الجنة
انزل اسأل أي واحدمربي دقنه ولابس باكستاني من الاخر و قوله تعرف ايه عن نظرية الكم مثلا ولما يعملوا مظاهرة و يقولوا الجهاد اسأل هل حد يعرف أساسا اسم سلاح غير الكلاشنكوف الصعيدي
أهلا بك مرة أخرى في مدونتي المتواضعة
النقطة الوحيدة اللي مش بره الموضوع هي كلامك عن إنك "كنت بأقرأها و أتسلى و أنا فاهم ان أنا مش هاقلدهم و أن احنا مسلمين نأخذ ما ينفعنا و نترك ما يتعارض"ـ
فده شيء جميل ما شاء الله إن واحد في السن بتاع "ميكي" يبقى عارف الكلام ده
أنا ماكنتش عارف الكلام ده أوي بصراحة، أو على الأقل كنت باتمنى ييجي اليوم اللي أكبر وأقلد فيه الناس دول
ده كان تفكيري وأنا صغير
فمعلش راعي نظرتي "المتخلفة" وأنا صغير، واعتبر كلامي ده لكل الناس "المتخلفين" اللي زيي
أما لو الكلام مش هيفيدك في حاجة، خلاص اتركه، خذ من مدونتي ما ينفعك واترك ما يتعارض
باقي الكلام ده بقى كله خارج الموضوع تماما
حوار "ربنا يوم القيامة هيشوف اللي بدقن يقوله ياللا على الجنة"ـ و"نظرية الكم" و"الكلاشنكوف" أنا مش عارف انت جبته (أو افترضته) منين، مش عارف بصراحة إيه الرابط بيني وبين الكلام ده كله
ولا أعتقد إنه من "العقل والتفكير" إني أبقى باتكلم في موضوع، وألاقيك فتحت 3 أو 4 مواضيع تانيين مالهمش أي علاقة باللي أنا باقوله، إلا بناءً على شوية افتراضات انت افترضتها من نفسك
عموما لو تحب تتناقش في الموضوع فأهلا بك
غير كده ممكن تفتح موضوع جديد عن "اللحية والجنة" أو
"quantum theory"
أو "الأسلحة المستخدمة عند الصعايدة" وابقى ادعني عنك نقعد نتناقش فيها برضه
أهلا بك مرة أخرى في مدونتي
سعدت بالحديث معك
:)
صدقني كل شيء متوحد تماما ومتداخل وكل ما تكلمت عنه هو حالة عامة يطلق عليها ثقافة المجتمع وعلى فكرة انت مش متخلف ولا أنا أسمح لنفسي اني أقول لحد انه متخلف يا ريت تحذف الكلمة من تعليقاتي أو تحذف التعليق كله لأني عبرت خطأ عما أقصد
Post a Comment