الأفلام الإسلامية

السلام عليكم


من المواضيع الخفيفة السريعة اللي كان نفسي اتكلم فيها
مواضيع "الأفلام الإسلامية" كما يزعمون
والأخطاء العديدة اللي بتبقى فيها
وآثارها البشع على فكر الناس


زمان الواحد وهو صغير، كان يقعد يتفرج على الفيلم منهم، وهو فاكر ان هو ده كده الدين، هي المعلومات دي كده صح اكيد
لكن لما الواحد (بفضل الله) ابتدى يفهم شوية، عرف ان الحاجات دي فيها هجس كتير
يعني مثلا...


نبدأ بالفيلم الشهير الرهيب اللي كنت باعتبره أفضل الأفلام الإسلامية
الشيماء
فيلم يحسسك إن اللي مألف قصته ده واحد ما يعرفش عن السيرة النبوية إلا اللي سمعه من حواديت جدته
مبدأيا الشيماء (رضي الله عنها) لم يرد عنها إلا أنها كانت أخت النبي (صلى الله عليه وسلم) من الرضاعة
وكانت من السبي في غزوة حنين
فلما عرفت نفسها للنبي (صلى الله عليه وسلم) بعلامة معينة، أكرمها ومن عليها فردها إلى قومها
ده كل اللي ورد على حد علمي

أما بقى عشان نلاقيها موجودة من بداية البعثة

ونلاقيها بتغني مع الهجرة "لقد نجا لقد نجا"
وانها كانت بتعرف تكشف المنافقين في مكة (مع إن النفاق لم يظهر أصلا إلا في المدينة بعد غزوة بدر)
وانها راحت للنبي (صلى الله عليه وسلم) يوم الفتح، وقالت له: دول برضه أعمامك وأخوالك، فاعف عنهم
كل ده هجس


فيلم تاني بتاع ماجدة تلاقي فيه قصة حب بين اتنين من الصحابة
وفي نص الفيلم الصحابية تتعمي من التعذيب
ومع الهجرة تقعد تقول: أبصرت بنور محمد، أبصرت بنور محمد
كل ده وحبيبها الصحابي واقف جنبها واخد بايدها


فيلم غيره تلاقي فيه المشركين عمالين يتناقشوا وهم متضايقين
يقولوا: نعمل ايه؟ أسلم أبو بكر الصديق، وأسلم عمر بن الخطاب، وأسلم عثمان بن عفان
لاحظوا إنهم خايفين منهم عشان الشخصيات الثلاثة دول شخصيات لها ثقل في مكة
لاحظوا بقى إن أصلا عمر بن الخطاب أسلم بعد أبي بكر وبعد عثمان بـ6 سنين، يعني المفاجأة ماكانتش في نفس الوقت
الجميل بقى ان دخل واحد يقول ينقل لهم خبر جديد ومرعب: أسلم علي بن أبي طالب!!!
طب هو ايه المرعب في اسلام على بن ابي طالب اللي كان لسه صبي
مع العلم ان على بن ابي طالب اسلم برضه قبل عمر بن الخطاب بـ6 سنين، بس الظاهر اللي نقل الخبر ده كان لسه واصل له الخبر متأخر
هو الظاهر ان المؤلف حب يرص لنا الخلفاء الراشدين كلهم وخلاص، يمكن لو كنا استنينا شوية كنا لاقينا واحد داخلي يقول: أسلم عمر بن عبد العزيز!!!


سيبنا من الحتة اللي تلخبط دي
اللي يضحكك بقى لما تلاقي واحد مشرك في فيلم يقول لعمرو بن هشام: يا أبا جهل
هم الكفار كانوا بيقولوا له "أبو جهل"؟ هم كانوا عارفين انه أبو الجهل فعلا يعني؟ وهو كان راضي وساكت، عادي أصحابه بيهزروا معاه ولا ايه؟
الاسم ده النبي (صلى الله عليه وسلم) أطلقه عليه لكفره وعناده، لكن الكفار كانوا يقولوا له "أبو الحكم"


فيلم غيرهم عن أبرهة ومحاولة هدم الكعبة
لازم برضه تلاقي قصة حب في الفيلم وخلاص، بس ده كان فيلم قديم بقى أيام عمر الحريري في شبابه ومش عارف دي كانت اسمهان ولا ايه، المهم واحدة من ممثلات الإغراء بتوع الخمسينات
والظاهر انها ماقدرتش تتخلى عن الاغراء حتى في فيلم عن أصحاب الفيل
وطبعا مافيش مانع تلاقي لغة عربية ضايعة، تلاقي واحد يقول: أجل خزني إليه، لاحظ ان مافيش تعطيش للجيم، و"خزني" بالـ"ز" مش بالـ"ذ"، اللي قال كده كان حسين رياض، بتاع انت اللي هتغني يامنعم


طبعا مافيش مانع نذكر بالمرة فيلم قطز وجهاد اللي كانوا بيحبوا في بعض تحت السلم
ده غير ان موضوع الحجاب ده ماكانش في بالهم اوي يعني


طب بلاش
خلونا نتكلم كلام عام شوية
جميل جدا جدا انك تلاقي صحابي بـ"سكسوكة"، أو حالق ذقنه قبل ما يصور المشهد ومضبطها تمام، عشان يبقى صحابي حلو ونضيف كده
لكن الكفار كلهم بلحى جامدة كده
وبعدين لازم المسلمين دايما دايما يلبسوا أبيض في أبيض، والكفار يلبسوا ألوان، ولما واحد من الكفار يسلم، يقوم يلبس أبيض على طول
ومسخرة اوي لما يجيب لك الكافر ريحته وحشة على طول، ولما واحد يشم ريحته فيلاقيها بقت كويسة، يقول له: انت اسلمت ولا ايه؟؟؟
يا حلاوة، معلش اهبل انا بقى
وبعدين لما ييجي يجيب لك الكفار والفساد اللي كانوا فيه، لازم يجيب لك رقاصة، او اكتر، وتقعد انت بقى تتفرج على الرقاصة، في سبيل الله طبعا، عشان تستشعر قد ايه الاسلام ده نور، وهو اللي خلصننا من الفساد ده، بص كده اتفرج على الفساد
أما لما ييجي يجيب لك المسلمين، فلازم يجيب لك واحد طيب اوي اوي، وغلبان، وسهتان، وميت على روحه، وبيتكلم بابتسامة بلهاء
ويا سلام بقى لما يجيب لك اتنين بيتكلموا مع بعض بالفصحى، الظاهر ان الممثلين مش متعودين على الفصحي ولا ايه، اصلك تلاقي مشهد مثلا كالتالي
الاول (ببطئ شديد): السلام عليكم ورحمة الله وبركاته
الثاني (ببطء برضه): وعليكم السلام ورحمة الله وبركاته
الاول: كيف حالك يا ابن ابي شخلعة
الثاني: بخير حال والحمد لله يا ابن فلتعة،
الاول: ماذا كنت .... مش عارف ايه
طبعا انت على ما تسمع للحوار البطئ الممل ده، تكون نسيت اصلا هو كان ايه الموضوع، وتكون زهقت اصلا من اللغة العربية ومن اللي بيتكلموها


آخر حاجة
انا مقتنع بالفتوى اللى تحرم تمثيل أدوار الصحابة في الأفلام والمسلسلات، مش مجرد الأنبياء بس
لأن فعلا ليها تأثير سلبي، بتخلي الواحد يربط دايما بين الصحابي الفلاني، وبين الممثل العلاني
يعني انا مثلا للأسف، كل ما افتكر حمزة بن عبد المطلب، افتكر شكل عبد الله غيث، كل ما افتكر أبو سفيان، افتكر شكل حمدي غيث، كل اما افتكر سمية، افتكر سناء جميل النصرانية (على حد علمي)ـ
فده شيء مش كويس ان صور الصحابة ترتبط في اذهاننا بصور الممثلين دول


بس كفاية كده رغي بقى
الموضوع طول منى اوي بصراحة
بس اديني وصلت لكم اللي كان جوايا