Saturday, December 8, 2007

متولي هاينزمان

تابعوا مغامرات متولي هاينزمان
metwallyheinzmann.blogspot




الآن .. متولي على الـfacebook

http://www.facebook.com
group.php?gid=33279432264









السلام عليكم



ملحوظة هامة جدا: هذه القصة غير واقعية، إنما الهدف منها السخرية من الجهل

أكرر: هذه القصة غير واقعية

أكرر عشان فيه ناس لا مؤاخذة بتتظاهر إنها تحت خط الذكاء: هذه القصة غير واقعية



ده نموذج (غير حقيقي ومبالغ فيه) للرسايل العقيمة اللى المسلمين بيتداولها دلوقتى



كان ياما كان

كان فيه راجل ملحد معادي للإسلام اسمه

" هاينزمان "

راح الراجل ده في مرة عشان يناظر أحد علماء المسلمين في القرن الثاني الهجري

ولما قابل فعلا أحد العلماء قال له بخبث ودهاء: تعالى بقى يا شيخ لما أغلبك في
مناظرة

تقدر تقول لي لما رقم اتنين قبله رقم واحد، يبقى رقم واحد قبله رقم كام؟؟؟

قال له الشيخ بكل ثقة: صفر



اندهش الملحد من ذكاء وعبقرية الشيخ

وقال: كيف لرجل في القرن الثاني الهجري أن يعرف هذه المعلومات

أشهد أن لا إله إلا الله

ورمى طاقية اليهود اللي كان لابسها على الارض، مع انه ملحد

ونزل على الأرض ليقبل تراب مصر عشان بلد الأزهر الشريف

والناس لما شافوه السنة اللي بعدها بيحج قالوا له: مش انت الراجل اليهودى الملحد (مش
عارف ازاى) اللي كنت بتحارب الاسلام طول عمرك؟

قال لهم: أنا أسلمت وغيرت اسمي لـ

" متولي هاينزمان "



وبعدها اترقى لحد ما بقى الرجل الاول والاوحد في وكالة ناسا لعلوم الفضاء

واتعمل له تمثال في ميدان العباسية نظرا لدفاعه المستميت عن الاسلام

لكن الانجليز لما دخلوا مصر قالوا: مش ده هاينزمان الرجل اليهودي الملحد اللى اسلم

ومن ساعت ما اسلم وهو مسهرنا الليل وعامل لنا رعب وقلق بدفاعه المستميت عن الاسلام

فلما جم يكسروا التمثال ... سبحان الله ... لقوا ايد التمثال اترفعت

والتمثال بيقول لهم، انا الجنى حارس التمثال

...امشوا من هنا يا اولاد الـ



ومن ساعتها والناس بتروح ميدان العباسية عشان تزور مقام سيدي هاينز

والعجيب والغريب والمريب والرهيب إنهم لما صوروا قبره بالليل لاقوه بينور

والراجل اللى صوره (اللى لحد دلوقتى مش عارفين هو مين) بيحلف انه شافه منور

يا حلاوة



وبعدين لما الامريكان حبوا يشوهوا صورة هاينز مان

عملوا كاتشب بلون الدم سموه "هاينز" في اشارة الى الارهاب والعنف والدموية فى
الاسلام

شفتوا المؤامرة اللي ضد الاسلام عاملة ازاى

بعد كده الراجل صاحب فكرة الكاتشب دي لاقوه في شقته ميت محروق، مخنوق، غرقان، مضروب
بالنار، مشنوق

بس كوندوليزا رايس مكتمة على الخبر



ودي كانت قصة متولي هاينزمان

الشخصية الاسطورية اللي اخترعها صديقي أسامة عباس



اوعى تكون مش مصدق الاعجاز العلمي الجديد ده ولا حاجة

لو مش مصدق ابعت رسالة لـ"متولي هاينزمان" على الايميل ده

metwally.heinzmann@gmail.com



ده حتى بالأمارة الحاج أحمد حامل مفتاح الكعبة (شخصية أسطورية برضه) شاف "متولي
هاينزمان" في المنام

وغير كده فيه واحدة اسمها فاطمة لما كان عندها الحصبة والدكاترة قالوا لها هتموتي
يعني هتموتي، شافت "متولي هاينزمان" برضه في المنام

( ماهى طبعا لازم يكون اسمها فاطمة عشان تبقى ماشية مع القصة، يعني هيبقى اسمها
فكيهة مثلا؟؟؟ )

وقال لها حال المسلمين مش عاجبني يافاطمة والناس بقيت وحشة اوي اوي

والحل (ومافيش حل غيره) إنك تبعتي الرسالة اللى انا كاتبها لك على حتة القماش دي
لكل الناس

( ماهي لازم برضه تبقى قماشة، يعني هيعملها لها على ورقة "ايه فور" مثلا؟؟؟ )



فضلا، مش امرا ولا بالعافية

ما تخليش الرسالة دي تقف عند جهازك

ولا تخليها تقعد عند جهازك

اقول لك ... امسحها من سكات كده



او ابعتها لـ13 شخص عشان "متولى هاينزمان" يجي لك فى المنام وهيقول لك على خبر كويس

واحد ضابط بعت الرسالة دي جت له ترقية في نفس اليوم بعد 13 دقيقة وماحدش عرف موضوع
الـ3 اللى كان بيعذبهم يومها

وواحد تاجر اهملها وقعد يتتريق عليها خسر كل ثورته فى 13 دقيقة

واحد في هندسة عين شمس نشرها جاله امتحان الفيلد سهل جدا جدا ولقى نفسه عمال يحل
كويس

وواحد زميله فى نفس السكشن اهمل الرسالة جاله امتحان الميكانيكا صعب

واحد تاجر أدوات صحية كبير، استهزأ بيها فاتحشر في التواليت اللي في المحل عنده

وواحد تاجر مخدرات رهيب، فنشرها 1256934 مرة فوروورد فالحمد لله، صفقة الهيروين
اللي جاية من ليبيا عدّت على خير



انشرها يمكن تاخد ذنب حلو

او يمكن تكون تلكيكة عشان تاخد ايميل صاحبتك وتبعتها لها

بس خليها

BCC

والا مصر كلها هتعرف ايميل صاحبتك

ويا سلام بقى لو هي ترد عليك بنفس الرسالة

عشان تتطمنوا ان الحب بينكم لسه مستمر مهما كانت الظروف



وبعدين خلى بالك من حاجة مهمة جدا

شركة هوت ميل برعاية "هاينزمان" وشركاه بقالهم 5 سنين بيقولوا ان الشركة خلاص بتفلس
والخدمة هتبقى بفلوس بعد كده

الا لو انت بعت رسالة "هاينزمان" دي لـ13 شخص، ساعتها هتفضل الخدمة بالنسبة لك
ببلاش

وطبعا مش لازم يقعدوا يحلفوا ان المرة دي هم صادقين، عشان الشعب المصري غلبان
وبقاله 5 سنين بيصدق على طول



أنشرها فقط لأن فيها

" لا إله إلا الله "

يعني مش مهم كل الهجص اللي مكتوب ده، المهم تنشرها عشان فيها

" لا إله إلا الله "



وده كان مثال مبسط للجهل اللى احنا عايشين فيه

ربنا يهدينا



ملحوظة: يمكن ناس كتير تبقى مش عارفة أنا باتتريق على ايه بالضبط

بس معلش، اعتبروا المعني في كرش الشاعر



والسلام عليكم

 






تابعوا مغامرات متولي هاينزمان
metwallyheinzmann.blogspot




22 comments:

Yasser said...

موضوع جامد يا اسامه

لسه جايالي رساله النهارده كده

و المشكله ان اكتر من 70 واحد عاملين لها
forward
الناس بتحاف بجد

ولا اشيخ احمد ده كمان

يلا كل واحد منه لربنا

nice blog

Osama Sherif said...

السلام عليكم

جزاك الله خيرا يافندم
رب اهد قومي فإنهم لا يشعرون
أنشر بقى القصة بنية توعية الناس
لو كانت فعلا مفيدة

والسلام عليكم

GHANIM said...

ya bashmohandes enta ra2e3 ... besm ellah ma sha2 allah ....
hyya aqwa wa7da fehom fe3lan hwwa mawdo3 el ragel elly rasam el karekater mat ma7ro2 wel danemark mekatema 3la el 5abaar :D
yalla rabena yehdy el game3
Nice Work !

Duo said...

ما شاء الله

والله يا فندم قصة في منتهى البلاغة وجمعت فيها كل القصص الفارغة المنتشرة بغزارة هذه الأيام


هبدأ أنشرها ولو إني لست من هواة ثقافة الـ forward .. لكن دي بالذات تستاهل تنشر بهذا الأسلوب

ومتخافش .. مش هكتب في آخر الرسالة (ارسلها ل10 أشخاص الآن وستسمع خبر سار) !! :D



أكرمك الله وأعزك يابو خالد

Osama Sherif said...

السلام عليكم

for ghanim
rabbena yekremak yafandem :)
rabbena yehdeina kollena

for eiaus
والله انا يسعدني انك تنشر موضوعي ان كان مفيد حقا
ربنا يتقبل مني ومنك

والسلام عليكم

Anonymous said...

حلوه منك
الميزه إنك لامم كل الحاجات والأفكار تقريبا

بس العيب إنها طويله ومش بالإمتاع الكافى إنها تتقرى كلها من معظم الناس

Osama Sherif said...

السلام عليكم

* mo2men
يعني حلوة مني على قد سني؟
جزاك الله خيرا على نقدك

والسلام عليكم

Sara said...

بجد هايلة بتفكرني برضه بقصة نزلت قبل كده بتتريق على الموضوع ده كانت بقى نظام لو ماتفرجتش عالكرتون ده هايطلعلك الوحش بليل وتريقة من دي
بس دي احلى حاجة فيها انها جااااااابت كلللللللل اللى بيتبعت وشملتهم كلهم وبعد اذنك انا هاعملها فورورد لمصر كلها ومتخافش هانكتب حقوق الطبع والنشر والنقل محفوظة ليك طبعا:)

Osama Sherif said...

انا فعلا قرأت القصة بتاعت الكرتون دي، وعجبتني جدا
على العموم ده شيء يسعدني جدا جدا انك تنشري الموضوع
وربنا يتقبل منا جميعا

عصفور المدينة said...

إيه الحلاوة دي يابوخالد عجبتني جدا لو كنت شفتها ما كنتش كتبت كنت حطيت رابط بس عن الموضوع ده

حفظك الله وبارك في قلمك

*سمر* said...

اعجبنى اسلوبك جدا يا ..ابو خالد ولا أسامة ..اصل انا لسه عامله مدونة جديدة ..بس بحاول ابص على مدوناتك من فترة للتانية ..لان اسلوبك بجد عاجبنى جدا ..اتمنى مزيد من التواصل ..والى لقاء

Osama Sherif said...

* عصفور المدينة

والله كلامك ده أسعدني جدا جدا وإن كنت حاسس إنه كلام كبير عليّ
جزاك الله خيرا على تشجيعك

* pinkyrose

والله يعدني جدا متابعتك لمدونتي المتواضعة من حين لآخر
أنا قمت بزيارة سريعة لمدونتك، وعجبني كام موضوع كده عمال أقرأ فيهم
ربنا يوفقك

Anonymous said...

موضوع جامد جدا يااسامة
بس انا مش بهتك بالحاجات دي
قل لن يصيبنا الا ماكتب الله لنا

Anonymous said...

المصريين لانهم جهلاء في الدين دائما يخافون إن حذرتهم بما يشبه الدين..فهم لا يفقهون شيئا..ف فوروورد و خلاص المهم العفريت ميقعدش عندي أنا

Osama Sherif said...

* Anonymous
جزاك الله خيرا على مشاركتك
حتى لو مش بتهتم بالخرافات دي
مافيش مانع تساعدنا في القضاء على جهل الناس اللي بتهتم دي

* porto ( man )
فعلا كلامك صح إلى حد بعيد
الجهل بالدين ليه أثر كبير في تعلق الناس بالخرافات
ودلوقتى السطحية كمان في التفكير سبب مؤثر جدا في الموضوع
في انتظار المزيد من مشاركاتك يافندم

Anonymous said...

to7faaaaaaaaa we blzabt zay elly bttba3t lena bgd bysta5efo
be32olna حسبنا الله ونعم الوكيل

Osama Sherif said...

والله ربنا يكرمك يافندم
سعدنا بتعليقكم
أنشر تؤجر بقى إن شاء الله

anollipian said...

:)
بجد تحفة ما شاء الله
سبحان الله كنت لسه انهارده بشوف ايميل اكتر من 10 بعتينهولي و لقيته غير صحيح
الموضوع زاد أوي و مينفعش نسكت عليه
ربنا يكرمك و يقدرك تنشر الكلام ده
بس حاول متتريقش على الاحاديث الضعيفة .. لأنها لسه اسمها احاديث و الله اعلم هي ايه اصلها
و جزاك الله خيراً

Osama Sherif said...

* Rana
جزاكِ الله خيرا على تعليقك
وفي انتظار المزيد من التعليقات
بالنسبة للأحاديث فأنا لا أسخر إلا من الأحاديث المكذوبة والضعيفة جدا
اللي هي مستحيل يكون النبي (صلى الله عليه وسلم) قالها
وفيه أمثلة على كده في القصة دي
http://metwallyheinzmann.blogspot.com/2008/05/blog-post_29.html

F o 2 s H said...

ههههههههههههههههههههههههههههههه
بجد انت ملكش حل
تعرف والله انا جتلي رسالة على النت من كام يوم مكتوب فيها ان واحد شاف سيدي جابر في المنام وقاله لازم تقول للناس انك شفتني عشان تحل البركة على اهل بيتك
يعني هو سيدي جابر كان عنده ايميل
سبحان الله
طب ماكان يحطها بوست في البروفايل بتاعه على الفيس بوك
وكمان لقيت مكتوب اني هاخد ثواب عظيم وستسمع خبر حلو الليلة
-------------------------------
بجد بقى فيه سؤال هموت واعرف اجابته
مين اللي ورا كل حواديت سلق البيض دي
وازاي بنصدقهم ؟؟
وبجد مش عارف اقوللك ايه على الفكرة الجميلة دي
تسلم يا حبي

amr zidan said...

انت بتهرج يا اسامه وبتتريق على فكره الموضوع ده حقيقى وبجد وانا مجربه وكل الرسايل اللى اتبعتتلى من النوع ده مسحتها ومارضيتش ابعتها من يومها والكاتشاب مادخلش البيت خالص ومضطر احط مايونيز بس مش عارف اعي ازاى من غير هاينز مان واكس مان وباتمان وسوبر مان والتييييت الالمان
وعلى فكره ان سمعت ان هاينزمان حطك فى ازازته ومش هيسيبك غير لما يكتشبك
طبعا انا بهزر يا جماعه على راي اسامه فى ناس بتتلكك بس اكيد باين انى بهزر ومعاك حق والله وياما حاولت اقول للناس اللى بتبعت الكلام ده مافيش فايده وبتتبعت بصوره غير طبيعيه لا وفى بعضهم تلاقى فى اخر الرساله اقسمت عليك بالعزيز الجبار انك ترسلها
او تلاقى اقسم بالله انى هابعتها لكل اللى عندى قال يعنى كده خلانى احلف بالله بس ببعتلهم كلمه واحده وعذرا للجميع حمرا طبعا اقصد فانلة الاهلى عشان ماحدش سفهمنى صح اصلى اهلاوى اوى هههههه
عالعموم جزاك الله خيرا ويارب تجيب نتيجه

Osama Sherif said...

* Fo2sH
هع هع هع، هي وصلت لسيدي جابر كمان؟
الظاهر اللي مألف الرسالة دي كان اسكندراني
انا فعلا مش عارف مين ورا الرسايل دي، لأن فيه منها عن النبي (صلى الله عليه وسلم) ومنها عن سيدي جابر زي ما انت بتقول، وحتى عند المسيحيين فيه ناس بتألف برضه رسايل زيها عن السيدة مريم
اختلفت الأساليب، والخرافة واحدة
جزاك الله خيرا على ردك وفي انتظار المزيد من التعليقات

* amr zidan
أهلا بيك في مدونتي المتواضعة
وقريبا كده نسمع عنك أخبار كويسة لما الكاتشب يرجع لك تاني :D
جزاك الله خيرا على تعليقك وفي انتظار المزيد
بس بلاش الحاجات بتاعت فانلة النادي الأهلي دي عشان مش لطيفة أوي