السلام عليكم
انزل الشارع كده
واتمشى شوية
في أي حتة عند الست أم دنيا
(مصر أم الدنيا)
بص
شايف اللى انا شايفه؟
شايف؟
شايف الزبالة؟
عفوا.. شايف القمامة؟
شايف القذارة؟
واحد ممكن يقول لي: انت قصدك ايه بالزبالة؟
يابا الحاج كلامي واضح
الزبالة اللي مرمية في الشارع
شايفها؟
انت السبب
انت
ايوة انت
انت ياللى بتقرا كلامي دلوقتى
(مع احترامي لكل من يعلوني قدرا)
ايوة انت
انت ياللى فاتح ازاز (شباك) عربيتك عشان ترمي منه المنديل المستعمل بتاع سعادتك في الشارع
انت ياللى ماشي وايديك في ايد خطيبتك (هداك الله) وعمال تتف قشر اللب من بقك جنب سور الكورنيش
انت ياللى عامل فيها أحمد السقا (ربنا يهديه) وبتشد آخر نفس من السيجارة، وتقوم راميها بعنف على الأرض
انت ياللي مش عارف تودي كيس الزبالة بتاع بيتكم فين، فتروح راميه وسط اخواتهم على الرصيف
انت ياللى مش عاجبك الناس اللي بتكنس الشارع كل يوم عشان خاطر سيادتك
انت ياللى بتقول: هو فييييين صندوق الزبالة؟ وهو على بعد 3 متر منك
انت ياللى بتقول: طب ما كل الناس كده
انت ياللى بتقول: معلش.. ماهو.. يعني قشطة يعني
انت ياللى مش مهتم بكلامي ده أصلا
أنا عايز أقول حاجة مهمة
لو افترضنا جدلا إن كل الناس كده
يبقى أولا أنا عايز لما أقف قدام ربنا يوم القيامة ما يحاسبنيش على الزبالة اللى أنا مشارك فيها
ثانيا أنا لا يشرفني إني أكون من الناس اللي كده، وإن كثر عددهم
رب اهد قومي فإنهم لا يعلمون
وأعتذر عن الحدة في الكلام
فالأمر مستفز
5 comments:
اعتقد ان سبب المشكلة مترسخ في تربيتنا
دايما الواحد بيكبر واهله واللى حواليه محبطين يائسين شايفين ان كل حاجة حواليهم غلط وقاعدين مستنين الدنيا تتغير من حواليهم وهما قاعدين ولما تتغير يبقوا يتحركوا
عشان كده تلاقي اغلب الشعب متبع سياسة واشمعنى يعني انا اللى ابتدي واشمعنى انا اللى اعمل كده ماهو الكل بيرمي ياعم الحكومة المفروض هي اللى تنضف وانا مااااالي
بس انا دايما مع ابتدي بنفسك اولا وبحس حتى لو الانسان كان هو الوحيد اللى ماشي صح وكل اللى حواليه بينتقدوه صدقني اللى حواليه هما اللى هايتغيروا هايتكسفوا من نفسهم
أولا أهلا بيكي في مدوتي المتواضعة
ثانيا كلام جميل حقا ومفيد
وأعتقد كلامك يلخص الحل لمعظم أو كل مشاكلنا في الحياة
جزاك الله خيرا والإيجابية مطلوبة في هذا الأمر فعلا ولابد أن نلفت الناس إلى هذا السلوك وخاصة أن الأمور سهلة ويمكن تجنبها رغم صعوبة العثور على سلة ولكن عايشين وعمرنا مارمينا حاجة على الأرض
لسه انهارده وأنا راجع من الكلية شايف مشهد مقزز لحصان ميت مرمي علي بعد بتاع 20 متر من طريق الاتوستراد
المشكلة أن الواحد سعات بيقول ده من جهل الناس أو بسبب العشوائيات ... بس ما هو حتي الناس اللي راكبه عربية بكام ميت ألف جنيه برضه هوا كمان بيرمي وهوا ماشي بالعربية
* عصفور المدينة
جزاك الله خيرا
شرفنا بزيارتكم لمدونتي
وثبتنا الله وإياكم على عدم رمي حاجة على الأرض
* قليل من التفكير
هو زي ما انت قلت، العيب هنا مش في الجهل
اعتقد العيب في الكسل، أو في أسلوب التفكير وثقافة الشعب عموما
رب اهد قومي
بس جديد حوار الحصان الميت ده
انا لو كنت شفت المناظ دي قبل كده كنت كتبت عنه
Post a Comment