إن شاء الله، إن شاء الله

السلام عليكم



" إن شاء الله "



كلمة عظيمة

وأمرنا بالتمسك بها في قول الله تعالى: وَلَا تَقُولَنَّ لِشَيْءٍ إِنِّي فَاعِلٌ
ذَلِكَ غَدًا * إِلَّا أَن يَشَاء اللَّهُ وَاذْكُر رَّبَّكَ إِذَا نَسِيتَ وَقُلْ
عَسَى أَن يَهْدِيَنِ رَبِّي لِأَقْرَبَ مِنْ هَذَا رَشَدًا

( الكهف/23،24 )



لكن لاحظنا إن ناس كتير جدا جدا بتستخدم الكلمة دي استخدام خاطئ

استخدام (آسف أقول إنه) بينفر الناس من الكلمة دي

عن غير قصد، سواء من المتكلم، أو السامع



يعني تلاقي عيّل صغير رايح يقول لأبوه: انا عايز أروح الحتة الفلانية

تلاقي الأب يقول له بكل براءة: "إن شاء الله" يا حبيبي

! ! ! فتفاجأ بالابن يصرخ قائلا: ما تقوليش إن شاء الله

ماهو كتير من الآباء والأمهات بيعودوا اولادهم وبناتهم على كده

كلمة "إن شاء الله" ترسخ أذهانهم أن المعنى المقابل لها هو: في المشمش

عن غير قصد من الآباء، وعن جهل وبراءة من الأبناء

طالما قال الأب أو قالت الأم "إن شاء الله"، يبقى مش هينفذ طلب الابن أو البنت



للأسف الموضوع بيتطور بعد كده

وتلاقي الواحد يكبر وتفضل فيه العادة دي

الاول يطلب طلب: ابقى هات لي معاك كذا

الثاني يقول بتلقائية: ربنا يسهل

او يقول: قول يا رب

كده طبعا الاول تأكد بنسبة تقارب الـ100% ان الثاني مش هيعمل له حاجة، هو بيسكته بس
بالكلمة

ولو اعترض الاول، يرد الثاني ويقول: يعني ما اقولش ربنا يسهل؟ ومش عايز تقول يا رب؟
قول يا رب

ويضحك



حتى في وسط المتدينين

تجد كلمة "إن شاء الله" للأسف الشديد لها معنى سلبي

لكن مختلف قليلا

تلاقي الواحد منهم يقصد بها التوكل على الله، لكن ينقلب الأمر إلى "تواكل" سطحي
بغيض



...يعنى

مرة واحد قال لي: تعالى نروح درس الشيخ يعقوب في عابدين

قلت: الشيخ يعقوب؟ ده مالوش درس ثابت دلوقتى خالص

قال لي: لا ما انا سمعته في شريط بيقول انه بيدي درس في عابدين، وبعدين "إن شاء
الله، إن شاء الله" هنلاقيه هناك

ملحوظة: قد يكون تاريخ إصدار الشريط حديثا، لكن تاريخ إلقاء الدرس قد سبقه بما يصل
إلى 10 سنين

! ! ! المهم صاحبي ده ضرب مشوار محترم لعابدين، وفوجىء هناك بإن الشيخ بطل يدي دروس
هناك من 6 سنين



وخد عندك بقى قصص زي دي كتير

واحد تاني جمع اصحابه عشان يزوروا واحد صاحبهم مريض، من غير ما يكلموه ولا يعرفوا
هو موجود الاول ولا لا

وبعد ما جمعوا نفسهم واشتروا له بسبوسة، راحوا لاقوه مش في البيت اصلا

وكانت الحجة إنه "إن شاء الله، إن شاء الله" هيبقى موجود أكيد يعني



واحد تالت كان عامل معرض في الكلية عندنا قبل الامتحانات باسبوعين او 3

ولما قلت له: ماحدش هيروح لك المعرض

قال لي: "إن شاء الله، إن شاء الله" الناس هتيجي



واحد رابع يبقى راكب معايا في العربية واحنا تايهين وانا سايق

يقول لي: خش من الشارع عشان نوصل

اقول له: ايش عرفك؟؟؟

يقول لي: ما اعرفش، "إن شاء الله، إن شاء الله" هو ده الطريق الصح



واحد خامس ييجي واحنا قاعدين في الصف الاول في المسجد مستنيين اقامة الصلاة، ويقوم
حاشر نفسه وسط الناس

نقول له: يا شيخنا المكان مش هيكفي، مش عشان تاخد ثواب الصف الاول تؤذي الناس

يقول: لا "إن شاء الله، إن شاء الله" المكان هيكفي



واحد سادس ناوي يتجوز إن شاء الله، من غير ما يشوف اللى هيتجوزها دي ولا يتكلم
معاها ولا يتعرف عليها، حتى الآن

اقول له: طب افرض ما حصلش توافق بينكم؟

يقول لي: لا "إن شاء الله، إن شاء الله" هيبقى فيه توافق









كفاية كده عليكم

بس انا نفسي الناس تاخد بالها من المشكلة دي

وتعطي الكلمة العظيمة دي قدرها

وتحافظ عليها دايما دايما

لكن ما تبقاش دليل على التواكل، او على الرفض



والسلام عليكم

 

مجلة ميكي

 

السلام عليكم



مجلة ميكي

مجلة عاشت معانا سنين طويلة

وعاشت مع أجيال وأجيال مننا

مجلة ميكي ظلت تصدرها "دار الهلال" حاولي 40 سنة

ثم استلمت "نهضة مصر" الراية بعدها



مجلة ميكي قصصها كلها مستوردة بالطبع من ديزني

وهنا في مصر ينقوا القصص اللي تتناسب مع ثقافتنا (على حد زعمهم) وينزلوها لنا

بس أنا بعد ما كبرت على (إدمان) مجلة ميكي

وبعد بضع سنوات بدأت أتفكر في المادة المقدمة لأطفالنا في المجلة دي

لاقيت الآتي



أنا لا أرى مطلقا أن هذه القصص تتناسب مع ثقافتنا وديننا

إذ تفاجئنا هذه المجلة بمخالفات صارخة لثقافتنا وديننا بين طياتها

مما يشكل خطورة كبيرة على فكر أطفالنا



أمثلة

عادي جدا جدا إنهم يهرونا قصص عن الكريسماس، واحتفالات الكريسماس، وشجرة الكريسماس،
كأن الكريسماس ده شيء مقدس عند البشرية

بصرف النظر عن إن ديننا كأغلبية مسلمة في بلد إسلامي لا يتفق إطلاقا مع هذا



مثال ثانٍ

تكرر كتير جدا جدا قصص عن عرافين وسحرة ودجالين

والمصيبة انه يقنع الطفل ان الكلام ده قد يكون حقيقي دون أن يشعر

تلاقي مثلا ست قاعدة قدام البلورة السحرية وبتعرف الغيب والمستقبل

وتلاقي في الاول "ميكي" مثلا او غيره (بما ان الموقف ده متكرر) يقول في الاول انه
لا يؤمن بالخرافات دي اطلاقا

لكن تفاجأ في نهاية القصة إن كلام العرافة دي طلع صحيح

قل لي بقى لما الموضوع ده يتكرر كتير في قصص مختلفة، ايه اللى هيثبت في ذهن الطفل؟؟؟



مثال ثالث

والمصيبة في المثال الثالث ده

من أساسيات شخصيات المجلة والعلاقات بينهم، عادي جدا جدا انك تلاقي علاقات حب وعشق
وخطوبة ومصاحبة

يعني "ميكي"، و"ميني" أو "ميمي" من أشهر الحبّيبة اللى في المجلة

و"بطوط" أو "دونالد دك"، و"زيزي" أو "ديزي" أو "بطوطة"، كل دي اسماء لشخصية واحدة

ومش غريب ابدا ان "زيزي" احيانا تفضل انها تخرج مع "محظوظ"
بدل ما تخرج مع "بطوط"،
يعني قشطة شوية مع ده وشوية مع ده

او تلاقي علاقات حب جانبية في قصص مختلفة في المجلة مع شخصيات مختلفة

قولوا لي بالله عليكم، ازاي بقى ده يتفق مع ثقافتنا وديننا على حد زعمهم؟؟؟



أنا شخصيا كطفل نشأ في أسرة ملتزمة (نحسبهم على خير ولا نزكيهم على الله) كنت
بالاقي تناقد شديد بين اللي اهلي بيقولوا لي عليه من حرمة المصاحبة بين الولد
والبنت والحوارات دي

والاقي المجلة اللي باحبها مليانة بقصص حب عادي جدا

ده غير المجتمع والاعلام والاغاني والافلام اللى بتحسسنا ان مافيش ورانا حاجة في
دنيتنا دي الا اني احب واحدة ولما تسيبني اقعد اعيط واحب واحدة غيرها ونعيش قصة حب،
والجواز ده ييجي وقت ما ييجي بقى، مش مستعجلين



وده بقى ينقلنا لجزئية أخرى مهمة



مجلة جديدة مخصصة للبنات

" أميرات "

 

دي مجلة فيها قصص للأميرات اللي اشتهرن في أفلام ديزني

"ياسمين" من فيلم علاء الدين، "سنو وايت" ، "بيلا" من الجميلة والوحش، "سندريلا"

...وهكذا



هي فكرة جميلة، أعجبت بها بصراحة

لكن لما تصفحت إحدى مجلات "أميرات" دي لاقيت ما لا يسر

اولا باين من الصورة اللى فاتت دي (غلاف إحدى المجلات) شكل ملابسهن مثلا

انا مش باتكلم في حلال وحرام ودي صور مرسومة يمكن مافيهاش فتنة، الله أعلم

لكن أنا عايز اقول الناس دي بتربي بناتنا على ايه؟؟؟

الواقع إن بناتنا بيتربوا على ان الملابس الفاضحة دي شيء عادي وطبيعي من غير ما
يحسوا



ده غير المصيبة الأكبر

جابين في المجلة دي صفحتين فيهم تعريف لأشهر أميرات ديزني

كل واحدة، اسمها، وظهرت في فيلم ايه، وايه قصتها

وصورة لكل واحدة منهن

لكن الصور عاملة ازاى؟؟؟

كل واحدة (بلا استثناء) جايبين لها صورة وهي في حضن حبيبها أو بترقص مع حبيبها في
أوضاع مخلة جدا



هل ترضي ان بنتك الصغيرة تتربى على المناظر دي

طيب لو اتربت التربية دي، تتوقع منها تبقى عاملة ازاى لما تكبر

طبعا معروف ان الطفل بيخزن كل حاجة بيشوفها او بيسمعها حتى تترسخ في ذهنه

والحصاد بقى لما يكبر أو تكبر وتشوف بقى جيل المستقبل عامل ازاى؟



رب اهد قومي فإنهم لا يعملون



والسلام عليكم

 

devil inside

السلام عليكم



لفت نظري في القرآن الكريم تكرار قصة سجود الملائكة لسيدنا آدم عليه السلام، وعصيان إبليس لأمر الله عز وجل
وكنت بأتساءل: ايه يا ترى الحكمة من تكرار القصة دي في كذا سورة في القرآن؟

اكتشفت مؤخرًا إن أحد الحكم وراء هذا التكرار ظهر جليا في الآيتين دول



( وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ كَانَ مِنَ الْجِنِّ فَفَسَقَ عَنْ أَمْرِ رَبِّهِ أَفَتَتَّخِذُونَهُ وَذُرِّيَّتَهُ أَوْلِيَاء مِن دُونِي وَهُمْ لَكُمْ عَدُوٌّ بِئْسَ لِلظَّالِمِينَ بَدَلًا )

الكهف/50



( إِنَّ الشَّيْطَانَ لَكُمْ عَدُوٌّ فَاتَّخِذُوهُ عَدُوًّا إِنَّمَا يَدْعُو حِزْبَهُ لِيَكُونُوا مِنْ أَصْحَابِ السَّعِيرِ )

فاطر/6



إذن الأمر واضح بإننا نتخذ الشيطان عدوا ولا نتخذه وذريته أولياء من دون الله

لكن حاليا بقيت بأشوف حاجة غريبة منتشرة اوى اوى



دلوقتي ناس كتير تحب الصور (التخيلية) للشيطان وأمثاله، وتحتفظ بيها

وتحطها كصور في المسنجر مثلا وفي المنتديات

وتعلقها في غرف النوم وفي العربيات



يعني على سبيل المثال، لاقيت مرة واحد حاطط ستيكر على ازاز عربيته مكتوب عليه

devil inside

نوع من أنواع التهريج يعني زي مابيبقى مكتوب عن بروسسر انتل في الكمبيوتر

intel inside

كان نفسي أسأله ساعتها: قصدك ايه؟ انت فاهم معني الكلام ده ايه؟

ماهو لما تقول لي ان فيه شيطان في العربية يبقى ده معناه حاجة من اتنين

يا اما الشيطان راكبك (لا مؤاخذة) وانت فخور بكده لدرجة انك كاتب على ازاز عربيتك

يا اما (بما ان مافيش غيرك في العربية) انت تقصد انك انت الشيطان شخصيا، أحد شياطين الإنس

أكيد طبعا ماكنتش هاكلمه بالطريقة دي ولا أسأله الأسئلة دي، بس ده اللى خطر في بالي



وغير كده بقى تلاقي ناس تحب أسماء الشياطين

وتحطها وتتمنظر بيها كأسماء مستعارة

nick names

وياما شفنا كتير ناس مسمية نفسها

devil, demon, satan, evil

وبالمناسبة، إحدى الأغاني اللى كان يترقص عليها في الديسكوهات أغنية اسمها

dance with the devil

يا حلاوة

وتلاقي شباب عندنا كتير الظاهر إنهم مسلمين، بس ده مايمنعش إنهم يرقصوا على الأغنية



مش عارف بصراحة الناس دي بتفكر ازاى

هل ماخطرش في بالها إن اللى فات ده يعتبر من صور اتخاذ الشيطان وذريته أولياء؟

هل الأفعال دي تدل على إن اللى بيعملها متخذ الشيطان عدوا فعلا؟

ولا الناس دي مش واخدة بالها إن الشيطان ده عدو أصلا؟

سبحان الله

مع إن الواحد منهم أكيد مش محتاج حد يقول له قد ايه الشيطان ده سبب له متاعب في الدنيا وقد يسبب له لا قدر الله متاعب وعذاب في الآخرة



وبالمرة بقى نتكلم في حاجة تانية قريبة من الموضوع

لاقيت مرة شركة اسمها

" شركة قارون "

يا سلام يا سلام

هو اللى سمى الاسم ده عارف مين قارون ده؟

ولا مش واخد باله انه مسمي شركته على اسم واحد اتخسف بيه الأرض وقصته مذكورة في القرآن؟



كذلك المحلات التجارية أو الشركات اللى (عندنا في مصر) تلاقي أساميها على أسامي آلهة فرعونية

حورس، رع، سكم، إيزيس، نفتيس

أو يعملوا شعار للشركة فيه إله فرعوني

طب هو اللى بيختار اسم زي ده مش واخد باله إن دي كانت آلهة تعبد من دون الله؟

طب على كده بقى ممكن أفتح محل وأسميه مثلا عطارة اللات، أو جزارة العزي

تخيلوا كده مثلا شركة هُبَل، شركة مساهمة جاهلية

مش دي كانت آلهة تعبد من دون الله برضه؟

ولا القومية الفرعونية ساعات بتنأح علينا وتنسينا اللى بيغضب ربنا؟؟؟



ده غير أعياد غير المسلمين اللي كتير مننا استوردوها زي ماهي كده

ونسمع بقى عن شخصيات زي كيوبيد، إله الحب في عقيدة الرومان

وسانتا كلوز وفالنتاين، دول شخصيتين أسطوريتين مقتبسين من شخصيتي قديسين عند النصارى



شوية أفعال غريبة فيها سوء أدب مع الله

ومش عارف ازاى الناس دي مش خايفة (في الظاهر) من غضب ربنا بسبب الأفعال دي



رب اهد قومي فإنهم لا يعلمون



والسلام عليكم

قشور وسفاسف

السلام عليكم



دلوقتى لما ييجي واحد يتكلم مع واحد تانى عن حكم السواك مثلا أو اللحية أو الختان
أو نتف الحواجب أو الأغاني أو امتى الصلاة تبقى سرية وامتى تبقى جهرية أو أقرا
الفاتحة وانا بأصلي ورا الإمام ولا لا

مثلا مثلا يعني

تلاقي بقى بعض الناس هاجت وماجت وشنوا هجوم بري ضده ويقولوا له:

ماتتكلمش في سفاسف الأمور، دي قشور، ديننا دين عظيم، شوف حاجة تانية تتكلم فيها
تفيد الأمة



الكلام ده بصراحة بيستفزني



أولا أنا عايز أسأل واحد من الناس دي سؤال

يعنى لو جينا نتكلم عن نتف الحواجب ولاقينا النبي (صلى الله عليه وسلم) بيقول: لعن
الله النامصة

هل كده بقى النبي (صلى الله عليه وسلم) بيتكلم في قشور؟ وسفاسف الأمور؟ النبي (صلى
الله عليه وسلم) كان سايب أحوال الأمة وعمال يتكلم في كلام مالوش أهمية؟؟؟

ما أعتقدش إن فيه مسلم يقدر يقول كده، والمفروض نتأدب شوية مع الله ومع رسوله صلى
الله عليه وسلم

وعلى هذا فقس



ثانيا سؤال تانى

طب ايه بقى من وجهة نظر سعادتك اللى يعتبر لب الدين ويفيد الأمة؟

ساعتها تلاقي كل واحد منهم بقى وليه تفكيره، واحد يقول لك اتكلموا عن فلسطين، وواحد
تانى يقول اتكلموا ازاى نصلح البلد، تالت يقول الدين المعاااااااااملة، ورابع يقول
اتكلموا عن الغش والكذب والرشوة

كل واحد ودماغه بقى، وزي ما يكون الناس اللى من النوعية دي مافكروش في إن الإسلام
في الحقيقة يشمل كل الكلام ده وأكتر، ووالواحد ممكن يتكلم في كل ده، لكن كل واحد
يحب يتكلم في اللى على مزاجه بس، واللى مايجيش على مزاجه يبقى قشور وسفاسف وتفاهات

وبعدين إذا كان على فايدة الأمة، فأغلب الحاجات اللى هي من وجهة نظره السطحية تعتبر
قشور، هي تعتبر مفيدة للأمة برضه، ماهو الواحد لما يعرف معلومة جديدة ويطبقها وياخد
ثوابها ويرضي بيها ربنا مهما كان الثواب بسيط، دي فايدة كبيرة في حد ذاتها، خاصة لو
ماضيعتش في الكلام ده وقت أكثر من اللازم

وده اللى يدخلنا على ثالثا



ثالثا

اللى بيقول الكلام ده بقى تلاقيه مثلا في وقت تانى عمال يقول: فلان البقال بيبيع
اللبن أغلى من علان ب20 قرش، فتلاقيه تلقائيا بيحب يشتري من علان الأرخص قال يعني
بيوفر

نقول له بقى يعنى الـ20 قرش هم دول اللى انت وفرتهم، ليه تحط في دماغك سفاسف الأمور
دي، ليه تفكر في قشور، كل ده عشان 20 قرش؟؟؟

أو غير اللبن، تلاقي الواحد مثلا رايح يسأل على هارد ديسك معين، يلاقيه عند واحد
بـ410، وعند واحد تانى بـ400، فتلاقيه تلقائيا عايز يوفر الـ10 جنيه دي ويشتري من
التاني

وهكذا في كل حاجة تقريبا طالما الجودة واحدة

طب جميل، فكر اقتصادي جميل، بس بتنكروا علينا ليه اننا نعمل كده مع ربنا سبحانه
وتعالى

يعني لما أعرف أنا معلومة هي في نظره السطحي من القشور، ولما أطبقها هاخد عليها
ثواب ولو قليل أوي أوي، ايه المانع يعني؟؟؟ مش ده تفكير كويس برضه ومنطقي واقتصادي؟



رابعا بقى

العجيب إنك تكون فاكر بقى إن الواحد من الناس دي مابيتكلمش في حاجة في حياته مع أي
حد إلا في نهضة الأمة، لكن تكتشف بعد كده إنه ساعات يتكلم عن الأفلام، وماتشات
الكورة، والأغاني، ويجيب في سيرة الناس، وقيل وقال، أو يقعد يقول ويسمع نكت وهكذا

تقول له يعني انت كده مش بتضيع وقتك في سفاسف الأمور؟

يقول لك ماهو أنا لازم كمان أرفه عن نفسي، مش كل كلامي يبقى جد كده

طيب ياعم، سيبني أنا في حالى بقى أتكلم في اللى انا عايزه، لما تلاقيني باتكلم عن
حاجات من القشور في وجهة نظرك السطحي اعتبرني بأرفه عن نفسي أنا كمان، والحمد لله
إن ترفيهي ممكن ييجي بفايدة، مش أفلام وماتشات ونكت

أنا قصدي من الجزئية دي إن ماحدش ينكر على حد بقى، طالما الواحد لازم يجي له وقت
يرفه عن نفسه ويتكلم في اللى يعجبه



من الآخر كده، ديننا مافيهوش قشر ولب، ديننا كله لب، كله مهم

أي حاجة وردت في القرآن أو في السنة الصحيحة لا يمكن لا يمكن تكون من القشور،
حاشى
لله



والله لو لاقيتني عمال اتكلم في حاجة لا ينبني عليها عمل، زي مثلا يا تري لون كلب أهل الكهف كان ايه، ولون عصا سيدنا سليمان كان ايه، ساعتها اعترض براحتك


لكن لو كانت حاجة ينبني عليها عمل ولو بسيط، فمش من حقك تنكر علي


أنا الموضوع ده كان غايظني، وكويس إني قدرت أطلع اللى جوايا



والسلام عليكم



 

متولي هاينزمان

تابعوا مغامرات متولي هاينزمان
metwallyheinzmann.blogspot

الآن .. متولي على الـfacebook

http://www.facebook.com
group.php?gid=33279432264

السلام عليكم



ملحوظة هامة جدا: هذه القصة غير واقعية، إنما الهدف منها السخرية من الجهل

أكرر: هذه القصة غير واقعية

أكرر عشان فيه ناس لا مؤاخذة بتتظاهر إنها تحت خط الذكاء: هذه القصة غير واقعية



ده نموذج (غير حقيقي ومبالغ فيه) للرسايل العقيمة اللى المسلمين بيتداولها دلوقتى



كان ياما كان

كان فيه راجل ملحد معادي للإسلام اسمه

" هاينزمان "

راح الراجل ده في مرة عشان يناظر أحد علماء المسلمين في القرن الثاني الهجري

ولما قابل فعلا أحد العلماء قال له بخبث ودهاء: تعالى بقى يا شيخ لما أغلبك في
مناظرة

تقدر تقول لي لما رقم اتنين قبله رقم واحد، يبقى رقم واحد قبله رقم كام؟؟؟

قال له الشيخ بكل ثقة: صفر



اندهش الملحد من ذكاء وعبقرية الشيخ

وقال: كيف لرجل في القرن الثاني الهجري أن يعرف هذه المعلومات

أشهد أن لا إله إلا الله

ورمى طاقية اليهود اللي كان لابسها على الارض، مع انه ملحد

ونزل على الأرض ليقبل تراب مصر عشان بلد الأزهر الشريف

والناس لما شافوه السنة اللي بعدها بيحج قالوا له: مش انت الراجل اليهودى الملحد (مش
عارف ازاى) اللي كنت بتحارب الاسلام طول عمرك؟

قال لهم: أنا أسلمت وغيرت اسمي لـ

" متولي هاينزمان "



وبعدها اترقى لحد ما بقى الرجل الاول والاوحد في وكالة ناسا لعلوم الفضاء

واتعمل له تمثال في ميدان العباسية نظرا لدفاعه المستميت عن الاسلام

لكن الانجليز لما دخلوا مصر قالوا: مش ده هاينزمان الرجل اليهودي الملحد اللى اسلم

ومن ساعت ما اسلم وهو مسهرنا الليل وعامل لنا رعب وقلق بدفاعه المستميت عن الاسلام

فلما جم يكسروا التمثال ... سبحان الله ... لقوا ايد التمثال اترفعت

والتمثال بيقول لهم، انا الجنى حارس التمثال

...امشوا من هنا يا اولاد الـ



ومن ساعتها والناس بتروح ميدان العباسية عشان تزور مقام سيدي هاينز

والعجيب والغريب والمريب والرهيب إنهم لما صوروا قبره بالليل لاقوه بينور

والراجل اللى صوره (اللى لحد دلوقتى مش عارفين هو مين) بيحلف انه شافه منور

يا حلاوة



وبعدين لما الامريكان حبوا يشوهوا صورة هاينز مان

عملوا كاتشب بلون الدم سموه "هاينز" في اشارة الى الارهاب والعنف والدموية فى
الاسلام

شفتوا المؤامرة اللي ضد الاسلام عاملة ازاى

بعد كده الراجل صاحب فكرة الكاتشب دي لاقوه في شقته ميت محروق، مخنوق، غرقان، مضروب
بالنار، مشنوق

بس كوندوليزا رايس مكتمة على الخبر



ودي كانت قصة متولي هاينزمان

الشخصية الاسطورية اللي اخترعها صديقي أسامة عباس



اوعى تكون مش مصدق الاعجاز العلمي الجديد ده ولا حاجة

لو مش مصدق ابعت رسالة لـ"متولي هاينزمان" على الايميل ده

metwally.heinzmann@gmail.com



ده حتى بالأمارة الحاج أحمد حامل مفتاح الكعبة (شخصية أسطورية برضه) شاف "متولي
هاينزمان" في المنام

وغير كده فيه واحدة اسمها فاطمة لما كان عندها الحصبة والدكاترة قالوا لها هتموتي
يعني هتموتي، شافت "متولي هاينزمان" برضه في المنام

( ماهى طبعا لازم يكون اسمها فاطمة عشان تبقى ماشية مع القصة، يعني هيبقى اسمها
فكيهة مثلا؟؟؟ )

وقال لها حال المسلمين مش عاجبني يافاطمة والناس بقيت وحشة اوي اوي

والحل (ومافيش حل غيره) إنك تبعتي الرسالة اللى انا كاتبها لك على حتة القماش دي
لكل الناس

( ماهي لازم برضه تبقى قماشة، يعني هيعملها لها على ورقة "ايه فور" مثلا؟؟؟ )



فضلا، مش امرا ولا بالعافية

ما تخليش الرسالة دي تقف عند جهازك

ولا تخليها تقعد عند جهازك

اقول لك ... امسحها من سكات كده



او ابعتها لـ13 شخص عشان "متولى هاينزمان" يجي لك فى المنام وهيقول لك على خبر كويس

واحد ضابط بعت الرسالة دي جت له ترقية في نفس اليوم بعد 13 دقيقة وماحدش عرف موضوع
الـ3 اللى كان بيعذبهم يومها

وواحد تاجر اهملها وقعد يتتريق عليها خسر كل ثورته فى 13 دقيقة

واحد في هندسة عين شمس نشرها جاله امتحان الفيلد سهل جدا جدا ولقى نفسه عمال يحل
كويس

وواحد زميله فى نفس السكشن اهمل الرسالة جاله امتحان الميكانيكا صعب

واحد تاجر أدوات صحية كبير، استهزأ بيها فاتحشر في التواليت اللي في المحل عنده

وواحد تاجر مخدرات رهيب، فنشرها 1256934 مرة فوروورد فالحمد لله، صفقة الهيروين
اللي جاية من ليبيا عدّت على خير



انشرها يمكن تاخد ذنب حلو

او يمكن تكون تلكيكة عشان تاخد ايميل صاحبتك وتبعتها لها

بس خليها

BCC

والا مصر كلها هتعرف ايميل صاحبتك

ويا سلام بقى لو هي ترد عليك بنفس الرسالة

عشان تتطمنوا ان الحب بينكم لسه مستمر مهما كانت الظروف



وبعدين خلى بالك من حاجة مهمة جدا

شركة هوت ميل برعاية "هاينزمان" وشركاه بقالهم 5 سنين بيقولوا ان الشركة خلاص بتفلس
والخدمة هتبقى بفلوس بعد كده

الا لو انت بعت رسالة "هاينزمان" دي لـ13 شخص، ساعتها هتفضل الخدمة بالنسبة لك
ببلاش

وطبعا مش لازم يقعدوا يحلفوا ان المرة دي هم صادقين، عشان الشعب المصري غلبان
وبقاله 5 سنين بيصدق على طول



أنشرها فقط لأن فيها

" لا إله إلا الله "

يعني مش مهم كل الهجص اللي مكتوب ده، المهم تنشرها عشان فيها

" لا إله إلا الله "



وده كان مثال مبسط للجهل اللى احنا عايشين فيه

ربنا يهدينا



ملحوظة: يمكن ناس كتير تبقى مش عارفة أنا باتتريق على ايه بالضبط

بس معلش، اعتبروا المعني في كرش الشاعر



والسلام عليكم

 

تابعوا مغامرات متولي هاينزمان
metwallyheinzmann.blogspot

خرافات

السلام عليكم



تمر بالأمة الإسلامية فترات ازدهار وتقدم، وتمر بها أيضًا فترات اضمحلال وتخلف

وذلك بحسب مدى تمسك أبناء الأمة الإسلامية بدينهم

ومن الملاحظ أنه كلما تأخر أبناء الأمة الإسلامية عن ركب التقدم والتحضر، كلما
ازداد ارتباطهم بالخرافات، ربما كان ذلك هروبا من الواقع

ومن أهم مظاهر تلك الخرافات في عصرنا الحالي هو مايدعي جهلة الناس أنه إعجاز علمي،
ولا هو بإعجاز ولا هو بعلمي



مهلا.. فنحن لسنا ضد الإعجاز العلمي مطلقا، بل إننا ننصح المسلمين وغير المسلمين
بأهمية معرفة ذلك العلم

لكن أي إعجاز علمي ننصح بمعرفته؟

إنه الإعجاز العلمي المأخوذ عن علماء ثقات أمثال
د.زغلول النجار و د.عبد الله المصلح
وغيرهما ممن هو أهل لذلك العلم، دارس لعلوم القرآن والسنة، ويتحدث في تخصصه

فيجب أن نتحرى عمن نأخذ ذلك الإعجاز العلمي عبر الشروط التي وضعها من هم أهل لذلك
العلم



لكن للأسف بدأ عوام المسلمين باختلاق أي شيء قد يكون غريبا على أذهانهم واستغلاله
لما يسمونه بالإعجاز العلمي

سواء كان بحسن نية لدعوة غير المسلمين أو ما شابه ذلك، أو بسوء نية للتلبيس على
المسلمين وهدم الثوابت لديهم، فإن ذلك الذى نسميه نحن بـ(الافتكاس اللا علمي) يضر
الإسلام والمسلمين أكثر مما يفيده

حيث يظهر الإسلام لغير المسلمين كأنه دين قائم على الخرافات ولا ثوابت له، ويظهر
أتباعه أناسًا يتسمون بالجهل ويتمسكون بتلك الخرافات حتى يعودوا إلى عصور ظلام



لذا فقد علمنا أنه علينا محاربة ذلك الخطر، وتبصرة المسلمين بحقيقة دينهم، وإرشادهم
إلى ما هو أهم من ذلك

ونسأل الله تعالى أن يوقفنا لما يحب ويرضى، وأن يتقبل هذا العمل منا

www.altazkia.com/khorafat

في انتظار آرائكم



والسلام عليكم

فرحت بدياب وحماقي

السلام عليكم

والله الواحد فرح لما عمرو دياب رجع يعمل إعلانات بيبسي تاني
وفرحت كمان وكمان لما لاقيت عم حماقي بقى بيعمل إعلانات كوكا كولا
ماتفهمونيش غلط
الموضوع مش موضوع دياب ولا حماقي
الموضوع موضوع اني بافرح لما الاقي اي "راجل" عامل اعلانات

مع حرارة الصيف وسخونة الجو
كوكا كولا زي ماهي معودانا دايما على أحلى صور لسيدة الغناء العربي
بيبسي طبعا لما لاقيت كده ما سكتتش
قاموا اختاروا أكتر 3 مغنيات محترمات في الوطن العربي والشرق الأوسط عشان يمتعونا بصورهم

وأرخم حاجة بقى إن الصور كل شوية يكبروها أكتر وأكتر
ويحطوها لك في يُفَط (لافتات إعلانات يعني) في كل حتة
وعربيات الكوكا كولا والبيبسي
تلاقي عربية منهم حاطين عليها صورة كبيرة وتبقى العربية ماشية قدامك وانت سايق عربيتك خاصة في الزحمة
ورينا بقى هتغض بصرك ازاي وانت سايق
وحتى على الكانز
ويا سلام بقى لما تلاقي الكانز دي مترمية على الأرض في كل حتة
حتى وانت رايح تصلي هتلاقيهم في طريقك

ده انا حتى سافرت السعودية وهناك بقى ارتحت من الهم ده
بس أول ما رجعت تاني للحاجّة أم دنيا (يعني مصر، أم الدنيا) لاقيت في استقبالي أول حاجة تقع عيني عليها هي صورة سيدة الغناء العربي
ومش صورة واحدة، ولا اتنين، دول تلاتة

عشان كده فرحت لما شالوا الصور القذرة دي وحطوا لنا صور أنضف شوية
صور دياب وحماقي

رب اهدِ قومي فإنهم لا يعلمون
ربنا يهديكي ياست أم دنيا
ربنا يهديكي يابلدي

والسلام عليكم

الخالدون مائة

السلام عليكم



أردت أن أقرأ كتاب

The 100

A Ranking of the Most Influential Persons in History

by Michael H. Hart



لكني لم أجد إلا ترجمته

الخالدون مائة

أعظمهم محمد رسول الله صلى الله عليه وسلم

لأنيس منصور



أنيس منصور لم يلتزم بحرفية ما جاء في الكتاب، لكنه لم يخل بما أراده المؤلف مايكل
هارت



أنا لم أكمل الكتاب بعد، لكني أرد أن أدون بعض الملاحظات التي خطرت ببالي



مايكل هارت عالم فلكي في وكالة ناسا ومهتم بقراءة التاريخ. نشر هذا الكتاب عام
1978. ومن أهم من وردوا في قائمته الآتي ذكرهم

1- محمد رسول الله صلى الله عليه وسلم

2- إسحاق نيوتن

3- المسيح عليه السلام

4- بوذا

5- كونفوشيوس

15- موسى عليه السلام

51- عمر بن الخطاب رضي الله عنه



الكتاب يتحدث عن

the Most Influential Persons in History

يعني عن الشخصيات المؤثرة في التاريخ، يتحدث عن أكثر الناس تأثيرا. أو كما ترجم
أنيس منصور الاسم إلى "الخالدون" يعني أكثر الناس خلودا بتأثيرهم في التاريخ في هذه
الدنيا من وجهة نظر المؤلف

فلهذا أورد المؤلف في قائمته شخصيات مثل "أدولف هتلر" و"كريستوفر كولومبس"، على
الرغم من أنه ذم كثيرا في هاتين الشخصيتين. ذكر أنه من "القرف" (على حد تعبير
المؤلف الذي ترجمه أنيس منصور) ذِكر شخصية مثل هتلر. وقال أيضا أنه إن أراد ترتيب
الشخصيات التاريخية حسب أخلاقها لجاء كولومبس في ذيل هذه القائمة نظرا لوحشية في
التعامل خاصة مع الهنود الحمر

فهو لم يرتب الشخصيات حسب عظمتهم كما ظن كثير من الناس، بس حسب تأثيرهم في التاريخ،
بالسلب أو بالإيجاب

وهذا رد كاف على النصارى الذين غضبوا لورود اسم المسيح عليه السلام في المركز
الثالث. وأيضا على من غضب من المسلمين لمقارنة بعض الأنبياء والصحابة مع أناس معظهم
من الكفرة والملاحدة. فنقول إن المؤلف لم يرتب الأشخاص حسب عظمتهم، بل حسب مدى
تأثيرهم على البشرية. لكن لو أردت أنا أن أرتب الأشخاص حسب عظمتهم لكان الترتيب
مختلفا تماما بلا شك



لم أعرف حتى الآن هل كان الكاتب نصرانيا أم يهوديا، فقط اختلفت الأنباء، بالإضافة
إلى أنه من الواضح تمام الوضوح أنه كان علمانيا.تبين ذلك من شيئين. أولا حياده
الشديد في الحديث عن الأنبياء ورجال الدين (النصراني أو اليهودي). وهذا كان جيدا
حيث تحدث عن رسول الله (الذي لا يؤمن هو به) بحياد تام وتعظيم ملحوظ. لكن العيب كل
العيب أن يتحدث بهذا الحياد عن الأنبياء (الذين يؤمن هو بهم) كأناس عاديين من آحاد
البشر



ثانيا كان المؤلف شديد الاهتمام بالعلم حيث أن الكثير من هؤلاء المائة من العلماء،
ووضعهم في قائمته نظرا لأهمية اكتشافاتهم أو اختراعاتهم وأولهم إسحاق نيوتن الذي
جعله في المركز الثاني



أعجبني بالطبع حديثه عن رسول الله صلى الله عليه وسلم، وإن كان خاليًا من تعظيمه
كنبي مرسل، لكنه تميز بالتحليل الدقيق لمدى عظمته (صلى الله عليه وسلم)، وقيادته
المبهرة، تأثيره الهائل على البشرية. وهذا أحد أهم الأسباب التي دعتني لقراءة هذا
الكتاب



أعجبني حديثه عن عمر بن الخطاب (رضي الله عنه) وتقديره له. لكن لفتت نظري عبارة
خبيثة، لا أدري إن كان قالها عن جهل أم عن قصد وسوء نية. هذا اقتباس من ترجمة أنيس
منصور لهذه العبارة

" ولم يُفرض الإسلام على أحد بالقوة، ومن هذا يبدو واضحا أن حروب العرب كانت حروبا
قومية، ولم تكن حروبا دينية تفرض الإسلام بالسيف "

جميل أن يعترف المؤلف بأن الإسلام لم يُفرض على أحد، لكن كيف زُيَّن له أن حروب
المسلمين كانت حروبا قومية عنصرية هدفها الأوحد هو نشر العروبة فحسب؟

حروب المسلمين حقا لم تكن لفرض الإسلام على الأفراد، "وقل الحق من ربكم فمن شاء
فليؤمن ومن شاء فليكفر" (سورة الكهف). لكنها كانت لنشر الإسلام في الأرض وإظهاره
للعالم حتى يعتنقه من هداه الله، ويتركه من أضله الله. ثم انتشرت اللغة العربية
لأهميتها المستمدة من قدسية القرآن. لكن لم يكن انتشارها لنزعة قومية أو لدعوة
جاهلية حيث نهانا عنها رسول الله صلى الله عليه وسلم ووصفها بأنها "منتنة". وذكر
أنه لا فضل لعربي على أعجمي إلا بالتقوى



غير ذلك فأعتقد أن الكتاب مفيد. وأهم فائدة هو أنه ملخص سريع لأهم الشخصيات
التاريخية، فيجعل القارئ ملمًا بأهم أحداث التاريخ. لذا أدعوكم لقراءته



والسلام عليكم