السلام عليكم
صليت انا العيد في "..." كلوب
عفوا، أقصد مسجد "..." اللى عندنا
انا ماصليتش العيد هناك من كذا سنة
بس كنت باسمع أساطير عن اللي بيحصل عناك
لحد ما شفت بعيني
لاقيت (خير اللهم اجعله خير) ألوان ألوان
بلالين وصواريخ وظيطة
طب جميل والله الواحد حس فعلا بفرحة العيد
ابتدينا نصلي
صلينا على الرصيف عشان مافيش مكان
لاقيت الناس بتعمل حركة غريبة اوى
بيقلعوا الجزم ويقفوا عليها
طب ليه يعنى
ياسيدي لو انت مش عايز تقف برجلك على التراب، صلى بالجزمة
اه ياعم صلى بالجزمة ايه المشكلة
ما النبي صلى الله عليه وسلم قال: صلوا في نعالكم
ليه بقى وجع الدماغ ده
مش مهم
دي مش مشكلة اوي يعنى
لسه التقيل جاى
بعد الصلاة كله بيسلم على كله وده شيء جميل
وفجأة وسط الدوشة والرغي سمعت شتيمتين كده مش تمام من كام شاب كده
طب ايه يا رجالة ده احنا لسه مخلصين صلاة
وبعد شوية عادي جدا اني الاقي كذا واحد راح مطلع سيجارة
ماهو ياعيني بقاله 30 يوم مش عارف يدخن في النهار
وبعدين بلغني (ماشفتش بعيني) إن ممكن ألاقي في بعض الأماكن في المصلى صف كده فيه
بنت وولد جنبها وبعد كده بنتين وبعد كده ولد
يعني ممكن تدخل الصف ده
couples
او الجون سلطة يعني
عادي قشطة يعنى احنا بنصلي صلاة العيد
ده واحد صاحبي بيحكي لى انه كان واحد من اللى واقفين في الصف ده
وبعدين انا كنت واقف بعيد وكان نفسي اسمع الخطبة
والله كان نفسي اسمعها
بس السماعات مش عارف تعبانة ولا هم قافلين السماعات اللى بره ولا صوت الناس هو اللي
عالي
بس كنت احيانا باسمع طراطيش كلام كده
الشيخ كان في وادي تاني خالص
وسط الشباب والبنات والشتايم والسجاير وده عمال يزعق ويقول: يا عباد الله لا تتخذوا
من دون الله أربابا
ياعم هداك الله خاطب الناس على قدر عقولهم
ياعم الشيخ اتكلم كلام الناس دي تفهمه
استكمالا لموضوع الالوان
لاقيت كاسيات عاريات
رايحين يصلوا العيد
أكرر كاسيات عاريات
واللى مش عاجبه التعبير ما يكملش قراية الموضوع
ده تعبير واخده من حديث نبوي
وشايف انه معبر جدا عن اللي انا حاسس بيه
طب انتي يا اختى رايحة تصلى العيد بارك الله فيكي
طب انا ايه ذنبي الاقي المناظر دي قدامي
وغير بقى المتبرجات لاقيت محجبات طبعا وده كان الاغلب
بس حجاب على ستايل دقوا الشماسي
ألوان ألوان ألوان
أو حجاب ستريتش
انا اعتقد اني بالجلبية البيضة اللي كنت لابسها كنت محتشم أكتر من بنات كتير
موجودين هناك
ولاقيت أخيرا عبايات
ولكن
لاقيت بنات لابسين عبايات وكاشفين شعرهم في نفس الوقت
فكرت كده شوية في اللغز ده وافتكرت أخيرا
ما هو ربنا ابتلانا باللى كنا بنتتريق على السعوديات بسببه
بعض السعوديات (بعض مش كل) يبقوا في بلدهم عبايات ونقاب وحاجة تمام
تيجى بقى عندنا مثلا في مصر أم الدنيا تلاقي اللي عمرك ما هتشوفه هناك
عندنا في "..." كلوب كده برضه
الواحدة منهم تخش الكلوب بالعبايا من غير حجاب
بس قبل ما تبتدى تصلى ترفع التندة، عفوا أقصد الحجاب اللى رامياه على كتفها ترفعه
على راسها لزوم الصلاة
تخلص الصلاة خلاص بقى
كل سنة وانتوا طيبين ونبقى نشوف العبايا العيد اللى جاى ان شاء الله او في جنازة لا
قدر الله ولا حاجة
ده غير بقى اني ممكن ألاقي محجبات واقفين على الناصية قدام الكلوب وأسمع أحلى ضحك
وهزار ولا كأني واقف قدام شوية شباب صيع
جه في بالي دعاء النبي صلى الله عليه وسلم
اللهم اهد قومي، فإنهم لا يعلمون
بس مش عارف أقول ايه؟ أقول إنهم لا يعلمون؟
معقولة كل دول مش عارفين؟
وبعدين قلت الأهم
اللهم اهدني
ربنا يهديني الأول وبعد كده نبقى نشوف الناس التانية
دي كانت خواطر صلاة العيد في "..." كلوب
معلش دوشتكم
كل سنة وانتوا طيبين
والسلام عليكم
14 comments:
أبدعت وأوجزت يا أخي ..
وأسلوبك في العرض ممتاز للغاية :)
أحيانًا حاجات زي كده بتنغص عليا عيشتي لأقصى درجة .. ممكن أنسى حالي عشان بنظر في حال من حولي .. فالأحسن (لي ولمن في مثل حالي) ألا ألتفت بنظري عن الطريق إلى ما يحيط به ..يكفي فقط أن اطمئن أني لحقت بذيل الركب !
هدانا الله وإياك ..
السلام عليكم
ربنا يكرمك يافندم
صدقت والله في كلامك عن الالتفات عن الطريق
هدانا الله جميعا
والسلام عليكم
حجاب على ستايل دقوا الشماسي
شكر البلية ما يضحك
علي فكرة الكلام ده متهيقللي بيحصل في أغلب المساجد
يعني مثلا مرة كنت بصلي العيد ولما طلعت وقربت علي الباب اللي بتخرج منه السيدات شميت ريحة الرفانات والعطور اللي البنات اللي رايحيين يصلوا حطينها ...والريحة كانت جامدة كأنهم خلصوا الازازيز قبل ما ينزلوا
ربنا يهدي
* قليل من التفكير
اه صحيح
نسيت انا اتكلم عن الروايح دي
تلاقي الريحة تتشم من على بعد امتار
وعلى رأيك
ربنا يهدي
اسمحلي اخد دور الشيطان (مؤقتا) في موضوعك هنا
واتكلم بالنيابة عنه وأرد عليك
( يا سيدي انت محبكه اوي كده ليه
محنا اديلنا مسكين نفسنا شهر اهو .. فيها ايه يعني بصة ولو مرة في السنه ده غير كمان ان انا صايم اديلي 30 يوم ايه يعني بصة صغيرة اكيد يعني مش هتطير ثواب ال30 يوم دول وفيها ايه لماالواحد يصليلو جنب بنت مين عارف مش يمكن ده يخليني اعرف اركز في الصلاة اكتر واحس بلذة الصلاة اللي بيقولو عليها دي
وبعدين فيها ايه الراويح محنا طول عمرنا بنشم ريحة شرابات وما خفي كان أعظم ايه يعني لما نشم ريحة حلوة مرة في السنه وبعدين فيها ايه يعني دحنا النهاردة عيد خليك فري وكول يا مان
وبعدين ان مش واخد بالك يا عم من حاجة
البنت اللي انا بصلي جنبيها دي ولا التانية اللي أنا بشوفها بعد الصلاة ممكن ربنا يجمعنا بيها في الحلال
مش المفروض الواحد يتجوز واحدة متدينة واللي بتصلي العيد دي اكيد متدينه يعني
ولا انت ايه رايك
:D :D :D
:D
جامد كالعاده
بس أنا مش فاهم يعنى إيه ("..." كلوب)
النقط اللى بين علامات تنصيص دى إيه ؟
وإيه كلوب دى ؟
السلام عليكم
بجد حلو اووى
وبتحكى فيه فعلا اللى بنشوفه فى الحقيقه
لكن بصراحه انا مسمعتش عن البنات اللى بتصلى جنب الولاد
يمكن لانى مش من القاهره :)))
بجد حلو اوى
لكن انا مش فاهمه ايه النقط دى و يعنى ايه الكلوب ده
لو حاجه مش ظريفه
وكل سنه وانتوا طيبين
* shehab
جزاك الله خيرا على زيارتك يا ريس
وجامد السيناريو اللي انت ألفته ده
واقعي جدا
* mo'men & Anonymous
جزاكما الله خيرا على زيارتكما للمدونة
أولا النقط دي تعبر عن اسم مسجد معين، بس قلت بلاش أذكر أسماء
كلمة "كلوب" دي بكل بساطة يعني
"club"
بس ما عرفتش اكتبها ازاي بالعربي، كان ممكن اكتبها "كلب" بس الناس مش هتفهم ايه اللي جاب الكلاب هنا
:D
فالخلاصة اننا نعرف مسجد بيحصل فيه الحاجات اللي انا ذكرتها في التدوينة دي
فبدل ما نسميه "مسجد كذا" بقينا بنقول عليه "كذا كلوب" أو يعني
"kaza club"
وربنا يهدنا أجمعين
مفهوم
"لكن بصراحه انا مسمعتش عن البنات اللى بتصلى جنب الولاد "
انا شفت صور قبل كده بس كانت عائلات ....الراجل وجنبه زوجته والعيال حواليهم.....يجوز يجوز
بس بصراحة مشفتهاش قبل كده في المسجد المقصود
طيب دلوقتي سنكتفي بالصلاة في مسجد تاني ونقضيها تريقة
متهيئلي لازم نتصرف تصرف اكثر ايجابية
ايه النظام؟؟
* mohamed
جزاك الله خيرا على زيارتك وتعليقك
انت قصدك على المسجد المقصود بالذات؟
أعتقد صعب لأن الموضوع مش بإيدك
ده فكر إدارة مسجد أولا، ثانيا فيه حاجات كمان مش بإيد حتى الإدارة
فلو قصدك على فكر المسلمين عموما
فأعتقد أدينا بنحاول نوعي الناس على قد ما نقدر
وربنا يوفقنا لما يحب ويرضى ويتقبل منا
http://www.youm7.com/News.asp?NewsID=55430
رجال يصلون جنبا إلى جنب مع النساء
صلاة عيد الأضحى كما أقيمت صباح الاثنين في ميدان مصطفى محمود بالمهندسين في السادسة و39 دقيقة.
http://www.2shared.com/file/4421559/842ae32d/Newsasp.html
هع هع هع
يا حلاوة
ماهو طبعا لازم نكون مع المساواة
ولا انت مش مع المساواة؟؟؟
شر البلية ما يضحك
رب اهدِ قومي
شكرا على اللينك
Post a Comment