مساعدات خارجية

السلام عليكم


من غير مقدمات، وبمناسبة الامتحانات، اقرأ الحوار ده



ايه حكم الغش فى الامتحانات؟
طب ما انت جاوبت على نفسك، انت سميته غش

لا هو مش غش يعنى
طب هو ايه، استعانة بصديق؟

لا أصل أنا أعرف إن الغش ده بيبقى فى التجارة والحاجات دى بس
طب انت جبت الكلام ده منين، حد أفتاك الفتوى دى ولا انت جبتها من عندك؟
الغش معروف، فى أى حاجة اسمه غش، وحتى لو اتغير اسمه فهو ما زال غش
أنا عن نفسى ما أعرفش عالم أو مفتى أجاز الغش فى الامتحانات، لو انت تعرف هات لى الفتوى
ملحوظة: من أسباب تحريم الكوتشينة مثلا انها بتدعو الناس للغش، وماتقولش لا، انا عارف الحتة دى أكتر منك

طب هو الغش هنا غلط ليه؟ ما أنا باخد المعلومة من صاحبى وهو راضى، أو أنا باغش من ورق معايا، يعنى مش باخد حق حد ولا باضر حد
ماهو لو صاحبك ده راضى، فباقى الدفعة مش راضية
الواحد ما يرضاش إن حد يجيب درجات أعلى منه بالغش
يعنى هو يتعب ويذاكر وانت تجيب أعلى منه بالغش؟؟؟
والمصيبة تبقى أكبر لو النتيجة دى حددت مصيرك في كلية معينة أو قسم معين أو كده
ساعتها اللى اتظلم ده مش هيسامحك وهتتحاسب قدام ربنا

طب لو الدفعة كلها عارفة وكلهم بيغشوا؟
ده مابيحصلش، ناس كتير مش بتغش، ولازم تلاقى ولو واحد بس على الأقل مش بيغش ومش راضى عن غشك

طب افترض جدلا ان الدفعة كلها راضية؟
يبقى المراقب مش راضى وانت كده بتغشه

طب لو المراقب راجل محترم وسايبنا نغش؟
هو كده يبقى محترم؟؟؟
على العموم ساعتها يبقى الدكتور اللى بيصحح مش راضى وانت كده بتغشه

طب لو اتأكدنا إن الدكتور راضى؟
يبقى العميد اللى هيديك شهادة إن شاء الله بإنك ناجح مش راضي وانت كده بتغشه
ده غير انك كده ممكن تنجح وانت ما تستاهلش النجاح ده
وتشتغل شغلانة وانت ماتستاهلش الشغلانة دى

طيب طيب، بس يعنى لما أنا أنسى معلومة وربنا يبعت لى واحد هدية عشان يقولها لى، ارفض النعمة دى؟
وانت ليه اعتبرتها نعمة؟ ده ابتلاء ربنا حطك فيه عشان يختبرك ويشوفك هتغش ولا لأ

طيب يعنى أنا لو مذاكر كويس بس نسيت معلومة فى الامتحان، ليه ما اخدهاش من حد، ما أنا مذاكرها أصلا كويس؟
لأ ما هو انت لو مذاكر أصلا كويس ما كنتش نسيتها
وبعدين الموضوع هيبقى ظيطة كده، كل واحد يبص مثلا فى القوانين قبل الامتحان مرة واحدة ويقول ما أنا ذاكرت كده كويس
هو شايف انه ذاكر كويس، لكن ييجى فى الامتحان يلاقى نفسه ناسى اللى كان كَرْوِتُه ده، فيطمن لأنه هيغشه
طب دى هتحددها ازاى دى بقى

ماهو احنا بقى من الاخر كده بناخد حاجات مالهاش لزمة وحشو على الفاضى، ليه اتعب نفسى فى الحاجات دى؟
أولا مش انت اللى تحدد اذا كان اللى بتاخده ده مفيد ولا لأ، فيه ناس بتفهم أكتر منك فى المجال ده
وبعدين حتى لو فيه حاجات مش مهمة، يعنى كل اللى انت بتاخده مالوش لزمة؟ ولا حاجات بسيطة هى اللى ممكن تكون مش مهمة؟
طيب انت بقى ساعتها هتقعد تحدد الحاجات اللى مهمة ماتغشهاش، والحاجات اللى مش مهمة تغشها؟
ولو افترضنا جدلا ان 100% من اللى انت بتاخده ده مالوش لزمة، طب ايه اللى دخلك الكلية دى أصلا؟؟؟
انت دخلتها بكامل قواك العقلية، ورضيت بشروط الكلية، يبقى انت لازم كمسلم انك تحافظ على الشروط دى، وإلا تبقى بيغش الكلية

وبعدين بقى ماهو الدين يسر برضه، وربنا غفور رحيم
هو عشان الدين يسر يبقى نغش عادى كده؟؟؟
هو عشان ربنا غفور رحيم يبقى نعصيه عادى كده؟
ده بدل ما نشكره على انه سبحانه وتعالى غفور ورحيم بنا؟

خلاص يا عم خلاص، ده انت سودتها فى وشى
طب انا اسف جدا، انسى كل الكلام اللى فات ده وحط فى دماغك حاجة واحدة بس
حبك لربنا وخوفك منه سبب كافى يخليك ماتغشش





صدق أو لا تصدق

احنا دلوقتى فى القرن الواحد والعشرين الميلادى يعنى الألفية التالتة
والقرن الخامس عشر الهجرى يعنى الألفية التانية
ومع ذلك لسة فيه ناس بتغش فى الامتحانات
! ! !


دلوقتى الانسان وصل للقمر
والعالم أصبح قرية صغيرة
وبقينا فى عصر الانترنت والموبايل والـFacebook
ومع ذلك لسة فيه ناس بتغش فى الامتحانات
! ! !


الواحد وقت الامتحانات بيبقى عايز ان ربنا ينجحه ويوفقه
وبيبقى متعلق بربنا قوى وعمال يدعى كتير كتير
ومع ذلك لسة فيه ناس بتغش فى الامتحانات
! ! !


الواحد بيقول انه بيحب ربنا وعايز يرضيه
سواء فى الامتحانات او فى غيره
ومع ذلك لسة فيه ناس بتغش فى الامتحانات
! ! !


دلوقتى لو رحت لواحد وقلت له: من غشنا
هيقول لك من غير تفكير: فليس منا
الناس حفظت الحديث زى اسمها، زى اسمها فعلا
قارن كده بين حفظك لاسمك الرباعى وبين حفظك للحديث
ومع ذلك لسة فيه ناس بتغش فى الامتحانات
! ! !


ارجو ان المعنى يكون وصل
يكون وصل بجد
من القلب للقلب
ربنا يوفقنا كلنا فى الامتحانات ويرضى عننا
ومع ذلك لسة فيه ناس بتغش فى الامتحانات
! ! !


جزاكم الله خيرا
والسلام عليكم