Thursday, May 29, 2008

حكايتي مع الفيس بوك




Facebook

كلمة بقيت باسمعها كتير اوي اوي، وعلى طول الكلام عنه في كل حتة، وكل الناس عمالين يسألوني: "انت لسه ما عملتش اكاونت ع الفيس بوك؟"، يعني كان ناقص ألاقي عم محمد البواب بيسألني: "انت ليه مش عامل اكاونت ع الفيس بوك؟"ـ


قعدت أسأل ناس كتير عن أي فايدة ممكن اطلع بيها من السايت العجيب ده، مع ان اخويا قعد يشرح لي شرح مفصل للحوار، ومع ان فيه ناس قالوا لي انه ممكن بطريقة ما يفيد عم متولي

ومع ان موضة الاضرابات العقيمة بتاعت اليومين دول مش بتطلع الا من هناك، بس برضه مالاقيتش حاجة مفيدة خالص


المهم اني في الاخر اتخذت القرار، وقلت اشوف الاختراع ده فيه ايه، اشتركت في الفيس بوك، وبدأت اسكشف عالم جديد من الانبهار اللا إرادي


دخلت على الفيس بوك، وفوجئت بيه بيقول لي: انت فين؟ تعالى الحق فيه كذا واحد مستنيك هنا، قلت ايه ده؟؟؟ ده الفيس بوك يعرفني من زمان بقى وانا مش واخد بالي، عادي كان مخزن ايميلي عشان الناس اللي بتبعت لي invitations


مسخرة جدا بقى لما اجي اقبل صديق جديد يقول لي: Osama and Folan are now friends، يا حلاوتنا، حسسني اني لابس كاسكيتة وفي بؤي مصاصة وعمال اقول لفلان ده: كابتن كابتن، ممكن نبقى اصحاب؟ طب ممكن لفة بالعجلة؟، ده غير اني كل ما اجي اضيف صديق الاقيه يقول لي اكتب الكلمتين دول، ويجيب لي كلمتين غير مقروئين بالعين البشرية اصلا، واقعد اقول له هات لي غيرهم طيب، لحد ما أعرف أجيب واحدة منهم بالشبه كده


دخلت بقى على صفحتي الرئيسية، واتفاجئ بصورة كبير لإليسا، من أولها كده؟؟؟ وتحتها كمان كام واحدة من اياهم، وفوق كل واحدة مكتوب: Folan has become a fan of Folana، ده غير اني ممكن الاقي فيديوهات وصور اباحية حاططها فلان او علان، طبعا اي حد من نوعية الناس دي كنت باشيل اسمه من قائمة الاصدقاء على طول، انا ناقص تلوث بصري؟


"da yadoll enak bgd hate2fel el account kaman 30 min as a maaaaaaaaaaaaaaax"
دي كلمة قالها لي واحد صاحبي، والظاهر ان كلامه ممكن يكون صح، على العموم لسه مش عارف، لما نشوف ربنا يستر


طبعا لازم بقى كعادتي اتتريق شوية على الفيس بوك ده، من الحاجات المؤثرة جدا اللي شفتها جملة كالتالي: Folan gave a sweet kiss to 3ellan، يا فرحة طنط تيتي بيكم، طب وانا مالي؟؟؟، وزي كده بقى حاجات كتير، وعند ناس كتير جدا في صفحاتهم الاقي gifts، فلان جاب لي قلب، وفلانة اديتني دبدوب، وعلان اداني قـُلة، وعلانة ادتني بوسة
(ده مثلا مثلا يعني، انا شخصيا ماعنديش حوار الهدايا ده الحمد لله)


حاولت أشوف ازاي أتحكم في الحاجات دي زي ما واحد صاحبي نصحني from Preferences، بس لاقيت الموضوع كبير كبير كبير، والظاهر إنها مش هتنفع في الآخر


من الحاجات اللي عجبتني الى حد ما، حوار الشخبطة ع الحيطة ده، مصداقا لقول الفنانة القديرة "شخبط شخابيط"، (ملحوظة: اكيد انا مش باسمع الحاجات دي، هم اللي بيحكوا لي)، فممكن اقعد اكتب حاجات، وناس تكتب لي حاجات، مسخرة جدا بقى لما حد يكتب لي حاجة والاقي مكتوب تحت كلامه: Write on Folan's Wall، اللي هو يعني نظام زي ماهو شخبط لك على حيطتك، روح بقى شخبط له على حيطته، واللي بيته من إزاز.. قصدي اللي حيطته ع الفيس البوك، ما يشخبطش للناس ع الحيطان، لا مش كده وبس، ده بقى فيه: fun wall, super wall, .. etc.، بالمناسبة أعتقد من بعد حوارات الاضرابات دي الظاهر ان الحيطان فعلا بقى ليها ودان
D:


ابتديت بقى أعدي على صفحات أصحابي أما أشوف فيها، طبعا زي ما قلت قبل كده معظم الحاجات اللي محطوطة من نوعية gifts, super wall, graffiti, dates, hugs, ... etc، سيبكم من التفاهة، المشكلة الأكبر في الناس اللي صفحاتها مليانة حاجات من دي كتير، بتتقل الجهاز عندي اوي اوي وساعات كان بيهنج معايا


من أكتر الحاجات اللي خنقتني في صفحات كثير من الناس جملة زي دي: "Interested In: Women"، ليه ياخويا؟ بتحب على روحك؟ ولا خلاص الواد داخل الفيس بوك وكل همه انه يضبط بنات؟، نأسف على الأسلوب ده، بس الشباب التعبان ده يغيظ بصراحة، ربنا يعافينا، رب اهد قومي


المهم اني قلت لازم نبتدي نشوف حاجة جد بقى، تعالوا معانا نعدي على الجروبس، خاصة الجروبس الدينية، وفجأة (وش واحد مخنوق ومحبط) الاقي بقى جروبس وموضوعات كالتالي
"الفيشاوي شاف النبي (صلى الله عليه وسلم) في المنام وبيقول لكم انشروا الرسالة دي 25 مرة (جديدة حكاية الفيشاوي دي)"
"تعالوا نجمع 10,000,000 واحد بيحب ربنا"
"صورة جديدة فيها استهزاء، فلازم نقاطع كوكا كولا"
دي أمثلة على الحاجات اللي شفتها من اول كان نظرة كده، طبعا لما شفت الجهل والسطحية والدماغ الفاضية، حسيت بحاجة ماسة تدعوني لاستدعاء صديقي "متولي هايزمان"
هيتعب اوي اوي متولي معانا هنا الظاهر، الله المستعان


اعتقد كفاية كده كلام بقى، اكيد طبعا كل شوية الاقي حاجات عجيبة تظهر لي، مين عارف، يمكن لو جمعت شوية حاجات تانية كده أبقى أكتبها إن شاء الله








11 comments:

عصفور المدينة said...

بيجيله ساعات بينفع يا عم أسامة
واعتبر إنك ماشي في السوق
:)

AHMED SAMIR said...

بص يا اسامة
انت من الاساس داخل عليه ومش مقتنع بيه
ومهيأ نفسك لأنك تنتقده
يعني من الاخر داخل عليه وعندك رأي مسبق انه موقع تافه ومالوش لزمة وبالتالي عينك رايحة على السلبيات
بس على فكرة هو زيه زي اي حاجة فيه كدة وفيه كدة وعليك ان تختار
تحياتي

مـحـمـد مـفـيـد said...

زي ما عصفور قال
خذ فتره وبعدها قول ايوه والا لاء
ساعات بينفع
:))

Anonymous said...

السلام عليكم و رحمه الله و بركاته
انا على يقين تام ان هذا الامر ليس من شانى و لكن هذا الامر متعلق بموضوع الفيس بوك الا قمت حضرتك بذكره
و بالاخص الجروبات

حضرتك انتظرت اى تعليق من اخت او اخ و لكن حتى الان لم اجد
على جروب حضرتك

نرجو من حضرتك بضروره الاطلاع على الصور الشخصيه للاعضاء على جروب حضرتك
استحيت ان اذكر هذا الامر على جروب الخاص بحضرتك حتى لا اسبب ضيق-حرج لاى احد- لهذه الاخت
بالاخص

فلو امكن ممكن حضرتك تقوم بالنظر فى هذا الامر و لحضرتك الحريه فى قبول هذا الامر او رفضه

و هو ان حضرتك تقوم بالتنبيه على ان تكون الصور الشخصيه تتناسب مع جروب حضرتك خاصا كونه اسلامى -و ايضا مختلط
و لا يامن احد على نفسه الفتن

ارجو ان يكون كلامى هذا لا يسبب لحضرتك ضيق -ما ارت الا النصح

امه الله

Osama Sherif said...

نأسف للتأخر في الرد نظرا للامتحانات
ادعوا لي بقى

* عصفور المدينة
والله الواحد عمال يدور على قد ما يقدر على الحاجات المفيدة اللي فيه
وعلى العموم انا فتحت جروب هناك باسم صديقي متولي هاينزمان
http://www.facebook.com/group.php?gid=33279432264
ادعي لنا بقى نطلع منه بفايدة
ملحوظة: مستني تعليق حضرتك على موضوع
"موضة مقاطعة البضائع"

* a.samir
ما أنكرش طبعا اني داخل ومش مقتنع اوي بفايدته
لكن ابتديت والله الاقي بصيص من النور يمكن نعرف نستغله ان شاء الله
سعدت بزيارتك وفي انتظار المزيد من تعليقاتك

* محمد مفيد
ربنا يسهل كده وبعد الفترة دي اعرف استفيد منه
على العموم ابقى عدي على جروب متولي ومستني رأيك

* أمة الله
معلش أعذريني انا مش فاهم الجملة دي
"انتظرت اى تعليق من اخت او اخ ولكن حتى الان لم اجد على جروب حضرتك"
بالنسبة لموضوع الصور الشخصية
أنا مش عارف هل اقدر اطلب من الناس فعلا تغير صورها قبل ما تشترك في الجروب؟
طب ولو غيروها ماهم ممكن يرجوعها تاني او يحطوا غيرها في اي وقت؟
طب هل أنا علي ذنب لما الصور دي تظهر وسط أعضاء الجروب؟
مش عارف بصراحة
انا اللي باعمله دلوقتى اني (على قد ما باقدر) لما الاقي صور مبالغ فيها اوي باشيل الشخص ده خالص من الجروب
على العموم جزاكِ الله خيرا على النصيحة وفي انتظار المزيد من حضرتِك
وما زلت بادعوكِ تبقي أدمن معايا في جروب الشيخ مهاب

Anonymous said...

السلام عليكم و رحمه الله و بركاته

انتظرت اى تعليق من اخت او اخ ولكن حتى الان لم اجد على جروب حضرتك
----
اى ان احد يلاحظ وجود صوره مخالفه بعض الشيىء و يقوم بابلاغ حضرتك - حتى الان لم اجد

----
أنا مش عارف هل اقدر اطلب من الناس فعلا تغير صورها


حضرتك كادم لك الاولويه فى حذف اى عضو ترى انه او انها - الصوره الشخصيه غير لائقه بعض الشيىء
لانه كجروب ممكن ان يحدث بعض المخلفات
فاحرى ان حضرتك تقوم بكتابه هذا الامر على
الصفحه الرئيسيه على جروب حضرتك
او ممكن حضرتك تقتبسها من جروب الشيخ مهاب

او من خلال ارسال رساله لجميع الاعضاء
بضروره ان تكون الصور الشخصيه ملائمه بعض الشيىء لجروب حضرتك
كونه
جروب اسلامى

و اذا لم يثمر من هذا الامر بفائده حضرتك تقوم بالحذف بعض النصح


----------
طب ولو غيروها ماهم ممكن يرجوعها تاني او يحطوا غيرها في اي وقت؟

ما حضرتك تقوم بالاطلاع دائما -قدر الاستطاعه
على جميع الاعضاء الجدد او القدامه

على ان تكون الصور الشخصيه للاعضاء
مناسبه كجروب اسلامى

و ان حضرتك كادمن لك الاولويه فى هذا الجروب

---------

لان ليس العبره بكثره الاعضاء و لكن العبره بان هذا الامر يرضى الله و رسوله صلى الله عليه وسلم

------

اما بالنسبه لجروب الشيخ مهاب
اذا لم يسبب هذا الامر اى مشاكل- حضرتك تضيفنى كادمن


ارجو ان كلامى لا يسبب لحضرتك ضيق-ما ارت الا النصح -
اسفه على الاطاله

Anonymous said...

لان ليس العبره بكثره الاعضاء و لكن العبره بان هذا الامر يرضى الله و رسوله صلى الله عليه وسلم

عملت جاهدا على حذفها و لكن للاسف دون جدوى-اعتذر لحضرتك

lilly said...

انت انسان غريب وتفكيرك غريب بالسبة لعصرنا
ده وبتقول انك عندك حاجة وعشرين سنة يعنى مش عارفة اقولك ايه انت بتفكرنى بناس بتوع زمان انت انسان مختلفة جدا وواضح من كلامك عشان انا مش شايفة اى حاجة غريبة فى الفيس بوك عادى بس تعرف انا مقصدش بكلامى ده انى انتقدك لا بجد انا مبسوطة ان فى ناس لسة بالاخلاق دى ياريت بجد تبعتى ايميلك او تسجل ايميلى اكيد دلوقتى هتقول ايه البنت الهايفة دى وتدى فيا رائيك بس بجد انا حابة اتعرف عليك عشان انت ىانسان مختلف جدا ده ايميلى بليز اقصد ارجوك سجلنى عندك lilly_105@hotmail.com

Anonymous said...

السلام عليكم
أولا مدونتك رائعة جزاكم الله خيرا وجعلها في ميزان حسناتك

غاظني جدا التعليق الأخير بتاع ليلي مش عارف مين ده
والذي أظنه ولد وبيستعبط

أسأل الله لك التثبيت والحماية من الفتنة

د./ أيمن بهاء

Osama Sherif said...

* Anonymous
هل أنتِ أمة الله؟
لو أنت هي فأين أنتِ، لم تركتي جروب الشيخ مهاب؟
الجروب محتاج شغل وانا مش قادر اركز فيه لوحدي

* lilly
غريب جدا إني إنسان غريب بالشكل ده
:D
بس أنا شاب عادي، باحب اتتريق كتير على الحاجات الغريبة أو الحاجات اللي ما ترضيش ربنا إن وجدت
لكن عادي يعني اشتركت على الفيس بوك برضه وعملت جروب لمتولي هاينزمان لو تعرفيه، وشغال اهه الحمد لله، ربنا يستر
بالنسبة لموضوع ايميلي ده فمعلش أنا باعتذر مش هينفع، مش موضوع بنت هايفة ولا حاجة، لا مش كده خالص، لكن أنا من الناس المؤمنة بعدم جواز الدردشة بين ولد وبنت على المسنجر
عندِك المدونة بتاعتي، وفيه لينك للمدونة القديمة بتاعتي كمان، اعتقد من خلالهم تقدري تتعرفي على الشخصية الغريبة اللي هي انا
فرصة سعيدة
:)

Osama Sherif said...

الدكتور أيمن شرفني والله بزيارته لمدونتي
آمين، جزاك الله خيرا على الدعاء