حكايتي مع الفيس بوك

Facebook

كلمة بقيت باسمعها كتير اوي اوي، وعلى طول الكلام عنه في كل حتة، وكل الناس عمالين يسألوني: "انت لسه ما عملتش اكاونت ع الفيس بوك؟"، يعني كان ناقص ألاقي عم محمد البواب بيسألني: "انت ليه مش عامل اكاونت ع الفيس بوك؟"ـ


قعدت أسأل ناس كتير عن أي فايدة ممكن اطلع بيها من السايت العجيب ده، مع ان اخويا قعد يشرح لي شرح مفصل للحوار، ومع ان فيه ناس قالوا لي انه ممكن بطريقة ما يفيد عم متولي

ومع ان موضة الاضرابات العقيمة بتاعت اليومين دول مش بتطلع الا من هناك، بس برضه مالاقيتش حاجة مفيدة خالص


المهم اني في الاخر اتخذت القرار، وقلت اشوف الاختراع ده فيه ايه، اشتركت في الفيس بوك، وبدأت اسكشف عالم جديد من الانبهار اللا إرادي


دخلت على الفيس بوك، وفوجئت بيه بيقول لي: انت فين؟ تعالى الحق فيه كذا واحد مستنيك هنا، قلت ايه ده؟؟؟ ده الفيس بوك يعرفني من زمان بقى وانا مش واخد بالي، عادي كان مخزن ايميلي عشان الناس اللي بتبعت لي invitations


مسخرة جدا بقى لما اجي اقبل صديق جديد يقول لي: Osama and Folan are now friends، يا حلاوتنا، حسسني اني لابس كاسكيتة وفي بؤي مصاصة وعمال اقول لفلان ده: كابتن كابتن، ممكن نبقى اصحاب؟ طب ممكن لفة بالعجلة؟، ده غير اني كل ما اجي اضيف صديق الاقيه يقول لي اكتب الكلمتين دول، ويجيب لي كلمتين غير مقروئين بالعين البشرية اصلا، واقعد اقول له هات لي غيرهم طيب، لحد ما أعرف أجيب واحدة منهم بالشبه كده


دخلت بقى على صفحتي الرئيسية، واتفاجئ بصورة كبير لإليسا، من أولها كده؟؟؟ وتحتها كمان كام واحدة من اياهم، وفوق كل واحدة مكتوب: Folan has become a fan of Folana، ده غير اني ممكن الاقي فيديوهات وصور اباحية حاططها فلان او علان، طبعا اي حد من نوعية الناس دي كنت باشيل اسمه من قائمة الاصدقاء على طول، انا ناقص تلوث بصري؟


"da yadoll enak bgd hate2fel el account kaman 30 min as a maaaaaaaaaaaaaaax"
دي كلمة قالها لي واحد صاحبي، والظاهر ان كلامه ممكن يكون صح، على العموم لسه مش عارف، لما نشوف ربنا يستر


طبعا لازم بقى كعادتي اتتريق شوية على الفيس بوك ده، من الحاجات المؤثرة جدا اللي شفتها جملة كالتالي: Folan gave a sweet kiss to 3ellan، يا فرحة طنط تيتي بيكم، طب وانا مالي؟؟؟، وزي كده بقى حاجات كتير، وعند ناس كتير جدا في صفحاتهم الاقي gifts، فلان جاب لي قلب، وفلانة اديتني دبدوب، وعلان اداني قـُلة، وعلانة ادتني بوسة
(ده مثلا مثلا يعني، انا شخصيا ماعنديش حوار الهدايا ده الحمد لله)


حاولت أشوف ازاي أتحكم في الحاجات دي زي ما واحد صاحبي نصحني from Preferences، بس لاقيت الموضوع كبير كبير كبير، والظاهر إنها مش هتنفع في الآخر


من الحاجات اللي عجبتني الى حد ما، حوار الشخبطة ع الحيطة ده، مصداقا لقول الفنانة القديرة "شخبط شخابيط"، (ملحوظة: اكيد انا مش باسمع الحاجات دي، هم اللي بيحكوا لي)، فممكن اقعد اكتب حاجات، وناس تكتب لي حاجات، مسخرة جدا بقى لما حد يكتب لي حاجة والاقي مكتوب تحت كلامه: Write on Folan's Wall، اللي هو يعني نظام زي ماهو شخبط لك على حيطتك، روح بقى شخبط له على حيطته، واللي بيته من إزاز.. قصدي اللي حيطته ع الفيس البوك، ما يشخبطش للناس ع الحيطان، لا مش كده وبس، ده بقى فيه: fun wall, super wall, .. etc.، بالمناسبة أعتقد من بعد حوارات الاضرابات دي الظاهر ان الحيطان فعلا بقى ليها ودان
D:


ابتديت بقى أعدي على صفحات أصحابي أما أشوف فيها، طبعا زي ما قلت قبل كده معظم الحاجات اللي محطوطة من نوعية gifts, super wall, graffiti, dates, hugs, ... etc، سيبكم من التفاهة، المشكلة الأكبر في الناس اللي صفحاتها مليانة حاجات من دي كتير، بتتقل الجهاز عندي اوي اوي وساعات كان بيهنج معايا


من أكتر الحاجات اللي خنقتني في صفحات كثير من الناس جملة زي دي: "Interested In: Women"، ليه ياخويا؟ بتحب على روحك؟ ولا خلاص الواد داخل الفيس بوك وكل همه انه يضبط بنات؟، نأسف على الأسلوب ده، بس الشباب التعبان ده يغيظ بصراحة، ربنا يعافينا، رب اهد قومي


المهم اني قلت لازم نبتدي نشوف حاجة جد بقى، تعالوا معانا نعدي على الجروبس، خاصة الجروبس الدينية، وفجأة (وش واحد مخنوق ومحبط) الاقي بقى جروبس وموضوعات كالتالي
"الفيشاوي شاف النبي (صلى الله عليه وسلم) في المنام وبيقول لكم انشروا الرسالة دي 25 مرة (جديدة حكاية الفيشاوي دي)"
"تعالوا نجمع 10,000,000 واحد بيحب ربنا"
"صورة جديدة فيها استهزاء، فلازم نقاطع كوكا كولا"
دي أمثلة على الحاجات اللي شفتها من اول كان نظرة كده، طبعا لما شفت الجهل والسطحية والدماغ الفاضية، حسيت بحاجة ماسة تدعوني لاستدعاء صديقي "متولي هايزمان"
هيتعب اوي اوي متولي معانا هنا الظاهر، الله المستعان


اعتقد كفاية كده كلام بقى، اكيد طبعا كل شوية الاقي حاجات عجيبة تظهر لي، مين عارف، يمكن لو جمعت شوية حاجات تانية كده أبقى أكتبها إن شاء الله